قىتاي شەتەلدىك تۋريستەردى تارتۋ جانە ەلدىڭ حالىقارالىق بەدەلىن ارتتىرۋ ماقساتىندا 74 مەملەكەتتىڭ ازاماتتارىنا 30 كۇنگە دەيىن ۆيزاسىز كىرۋگە رۇقسات بەردى. بۇل تۋرالى قحر ۇلتتىق كوشى-قون قىزمەتى مالىمدەدى, دەپ جازادى Egemen.kz انادولۋ اگەنتتىگىنە سىلتەمە جاساپ.
ەستەرىڭىزگە سالا كەتەيىك, العاش رەت ۆيزاسىز رەجيم 2023 جىلعى جەلتوقساندا فرانتسيا, گەرمانيا, يتاليا, نيدەرلاندى, يسپانيا جانە مالايزيا ازاماتتارى ءۇشىن ەنگىزىلگەن بولاتىن. كەيىن بۇل ءتىزىم كەڭەيتىلىپ, وعان ەۋروپانىڭ كوپتەگەن ەلدەرى, سونداي-اق ازيا, تاياۋ شىعىس جانە لاتىن امەريكاسىنداعى كەيبىر مەملەكەتتەر كىردى.
سونىمەن قاتار 16 شىلدەدەن باستاپ بۇل تىزىمگە ازەربايجان دا قوسىلادى.
قىتاي بيلىگىنىڭ مالىمەتىنشە, 2024 جىلى ەلگە ۆيزاسىز كەلگەن شەتەلدىكتەر سانى 20 ميلليوننان اسادى. بۇل كورسەتكىش 2023 جىلمەن سالىستىرعاندا ەكى ەسە كوپ.
ال اقش, كانادا, ۇلىبريتانيا, شۆەتسيا, رەسەي جانە كەيبىر وزگە مەملەكەتتەردىڭ ازاماتتارى ءۇشىن ازىرگە تەك قىتاي ارقىلى ءۇشىنشى ەلگە وتەتىن ترانزيتتىك ساپار كەزىندە 10 كۇنگە دەيىن ۆيزاسىز كىرۋگە رۇقسات بەرىلگەن.
قىتاي تۋريزم اكادەمياسىنىڭ ساراپشىسى ليۋ سيانياننىڭ ايتۋىنشا, ۆيزاسىز رەجيم تەك ەكونوميكالىق وسىمگە ەمەس, ەلدىڭ حالىقارالىق يميدجىنە دە وڭ اسەر ەتەدى.