«اق جول» پارتياسىنىڭ ماجىلىستەگى دەپۋتاتتارى ازات پەرۋاشەۆ پەن ەرلان بارلىباەۆ پاۆلودار وبلىسىنا جۇمىس ساپارى اياسىندا اقسۋ قالاسىنداعى گرەس پەن فەرروسپلاۆ زاۋىتىنا باردى. ولار ءوندىرىس ورنى مەن جاڭعىرتۋ جۇمىستارىنىڭ بارىسىمەن تانىستى, دەپ حابارلايدى Egemen.kz.
قازىرگى ۋاقىتتا اقسۋ گرەس-ىندە جەتىنشى ەنەرگوبلوكتى قايتا قۇرۋ جۇرگىزىلۋدە. ەلەكتر ستانتسياسى وسى ماقساتتا جاڭا تۋربينا مەن گەنەراتورلىق قوندىرعى العان. جاڭعىرتۋ ناتيجەسىندە بلوكتىڭ قۋاتى 300 مۆت-تان 325 مۆت-قا دەيىن ۇلعايماق. بۇل جۇمىستار قولدانىستاعى مەنشىك يەلەرىنىڭ جەكە ينۆەستيتسيالارى ەسەبىنەن جۇزەگە اسىرىلۋدا.
اقسۋ گرەس-ىندە كەلەسى كەزەڭ رەتىندە سوڭعى, سەگىزىنشى ەنەرگوبلوكتى جاڭعىرتۋ جوسپارلانعان. بۇل جۇمىستار اياقتالعاننان كەيىن ستانتسيانىڭ جالپى قۋاتى 2400-دەن 2800 مۆت-قا دەيىن وسەدى. بۇل ءوندىرىس نىساندارىن ەلەكترمەن قامتاماسىز ەتۋدە قوسىمشا مۇمكىندىكتەر تۋدىرىپ, وڭىردەگى ونەركاسىپ كولەمىن ۇلعايتۋعا جول اشادى.
ستانتسيا باسشىلىعى دەپۋتاتتارمەن كەزدەسۋدە كادر دايىنداۋ ماسەلەسىن دە كوتەردى. قازىر كاسىپورىندا جۇمىس كۇشى جاسارىپ كەلەدى. قىزمەتكەرلەردىڭ ورتاشا جاسى 41 جاستا. ورتاشا جالاقى – 650 مىڭ تەڭگەنى قۇراپ وتىر. بۇل كوللەدج تۇلەكتەرىن, اسىرەسە اقسۋ مەن جاقىن وڭىرلەردەن, جۇمىسقا تارتۋعا مۇمكىندىك بەرەدى. الايدا, جوعارى بىلىكتى ينجەنەرلىك-تەحنيكالىق ماماندارعا سۇرانىس ءالى دە جوعارى. ال ولاردى دايارلاۋ – جۇيەلى جانە ۋاقىتتى قاجەت ەتەتىن پروتسەسس.
اقسۋ فەرروسپلاۆ زاۋىتى مەتاللۋرگيالىق ءوندىرىس ءۇشىن قاجەتتى ءتۇرلى فەرروسپلاۆ تۇرلەرىن شىعارادى. قازىرگى تاڭدا كاسىپورىندا التىنشى تسەحتاعى پەشتى جاڭارتۋ جۇمىستارى جۇرگىزىلۋدە. جوسپار بويىنشا ءوندىرىس كەزەڭ-كەزەڭىمەن جابىق تيپتەگى, جوعارى ەنەرگيا تيىمدىلىگى بار جانە ەكولوگياعا زيانى از پەشتەرگە تولىق كوشپەك.
– قىزمەتكەرلەردىڭ ايتۋىنشا, قازىرگى اشىق پەشتەردىڭ ورنىنا گەرمەتيكالىق (جابىق) پەشتەر ورناتىلسا, ەڭبەك جاعدايى الدەقايدا جايلى بولادى. جاستار جۇمىسىنا ريزا. مىسالى, 6-تسەحتا جۇمىس ىستەيتىن بالقىتۋشى – جەرگىلىكتى جىگىت, ول اقسۋ قارا مەتاللۋرگيا كوللەدجىن بىتىرگەن. 20 جاسىنان بەرى وسى كاسىپورىندا ەڭبەك ەتىپ كەلەدى, قازىر 35 جاستا. اي سايىن 900 مىڭ تەڭگە جالاقى الادى, – دەدى ازات پەرۋاشەۆ.
كاسىپورىن باسشىلىعىنىڭ ايتۋىنشا, «55+» باعدارلاماسىنىڭ ناتيجەسىندە تاجىريبەلى كادرلاردىڭ ءبىر بولىگى زەينەتكە شىققان. بۇل باعدارلاما زياندى جانە قاۋىپتى وندىرىستە ۇزاق جىل ەڭبەك ەتكەن جۇمىسشىلارعا ەرتەرەك زەينەتكە شىعۋعا مۇمكىندىك بەرەدى.
وسىعان بايلانىستى كومپانيا بىلىكتى مامانداردى دايارلاۋعا ەرەكشە كوڭىل ءبولىپ, ولاردى جوعارى جالاقىمەن ىنتالاندىرۋ ارقىلى ۇجىمدا تۇراقتىلىق ساقتاۋعا تىرىسۋدا.