ايماقتاعى بىرەگەي تەحنوپارك

قازىرگى تاڭدا «Astana Hub»-تا «Playrix», «TikTok», «inDrive», «EPAM», «Glovo», «Presight.ai» سياقتى ءىرى حالىقارالىق كومپانيالاردىڭ كەڭسەلەرى ورنالاسقان. سونداي-اق بىلتىر ينفراقۇرىلىم ياندەكس, «Telegram», «Higgsfield», «Naimi.kz», «Funtyx Games» جانە نارىقتىڭ باسقا دا ءىرى ويىنشىلارىمەن تولىقتى. وڭىرلەردە 450 ستارتاپ-يدەيا ازىرلەنىپ, 186 IT-كومپانيا «Astana Hub» تەحنولوگيالىق ەكوجۇيەسىنىڭ ءبىر بولىگىنە اينالدى.

«IT-سالا ەكونوميكانىڭ باسقا باعىت­تارىمەن سالىستىرعاندا وراسان زور ءوسىم كورسەتىپ كەلەدى. بىلتىر ينۆەستيتسيا 40%-عا, IT-قىزمەتتەر ەكسپورتى 52%-عا, سالانىڭ جالپى تابىسى 48%-عا ءوستى, ال جۇ­مىس ورىندارىنىڭ سانى 12%-عا ارتتى. بۇل جەتىستىكتەر, ءبىر جاعىنان, مەملەكەتتىك قول­داۋدىڭ ءتيىمدى مودەلىنىڭ ارقاسىندا مۇم­كىن بولىپ وتىر. باسىمدىق ادام كاپيتالىن دامىتۋعا قويىلدى. كەيىنگى 5 جىلدا مەم­لەكەت «Astana Hub»-قا 15 ملرد تەڭگەگە جۋىق قاراجات سالدى, ال ونىڭ قايتارىمى رەتىندە IT-سالاسىنان 1,5 تريلليون تەڭگە تابىس پەن 1,1 ملرد دوللار تازا ەكسپورتتىق كىرىس الدى. وسىلايشا, مينيمالدى سا­لىممەن IT-سەكتور ۇلكەن سەر­پىلىس جاسادى», دەدى «Astana Hub» باس ديرەكتورى ماعجان ماديەۆ.

بىلتىر «Astana Hub» بازاسىندا ەلىمىزدەگى العاشقى جا­ساندى ينتەللەكت مەكتەبى – «Tomorrow School» اشىلدى. مۇندا ءبىلىم الۋشىلار باعدارلامالاۋدىڭ قىر-سىرىن مەڭگەرىپ, قاۋىم­داس­تىقتار قۇرىپ, وقۋ كلۋبتارىن ۇيىمداستىرىپ, ءوزارا تاجىريبە الماسادى. الدىڭعى جىلى بۇل مەك­تەپ التى ىرىكتەۋ كەزە­ڭىن وتكىزىپ, وعان شاما­مەن مىڭعا جۋىق ادام قاتىستى. قازىرگى تاڭ­دا نەگىزگى وقۋ باعدار­لاماسىندا 216 ستۋدەنت ءبىلىم الىپ جاتىر. قاتىسۋشىلار بىر­قاتار ماماندىقتى تاڭداي الادى, سونىڭ ىشىندە AI-ينجەنەرى, باعدارلامالىق جاساقتامانى, ءموبيلدى قوسىمشانى ازىرلەۋشى, «DevOps» ينجەنەرى, IT جۇيەلەرىنىڭ ارحيتەكتورى, كيبەرقاۋىپسىزدىك مامانى اتانۋعا مۇمكىندىك بار.

«Tomorrow School»-دىڭ وقۋ ۇدەرىسى «Astana Hub» بازاسىندا ­وفلاين تۇردە وتەدى. مەكتەپ تاۋلىك بويى جۇمىس ىستەيدى, ياعني ءار ستۋدەنت وزىنە ىڭعايلى ۋاقىتتا, ءوز قارقىنىمەن ءبىلىم الادى. 18 اي ىشىندە ولار 50-دەن استام جوبانى جۇزەگە اسىرىپ, «Python», «JavaScript», «Golang, Rust» سەكىلدى 20-عا جۋىق باعدارلامالاۋ ءتىلىن مەڭگەرە الادى. باعدارلاما سوڭىندا ءار ستۋدەنت ءوز باعىتىن تاڭدايدى, ولار AI-ينجەنەر, ويىن جاساۋشى, DevOps-ينجەنەر نەمەسە كيبەرقاۋىپسىزدىك مامانى اتانادى.

سەگىز ايدىڭ ىشىندە «Tomorrow School»-دا مىقتى قاۋىمداستىق قالىپتاستى. بۇل جەردە ستۋدەنتتەر تەك ءوز ءبىلىمىن جەتىلدىرۋمەن عانا شەكتەلمەيدى. اتاپ ايتقاندا, ءبىرى اعىلشىن ءتىلىن ۇيرەتسە, ەندى ءبىرى كوپشىلىك الدىندا سويلەۋ شەبەرلىگىنە نەمەسە AI قۇرالدارىن بيزنەس سالاسىندا قولدانۋعا باۋليدى. ءبىلىم الۋشىلاردىڭ جاس ايىرماشىلىعى, ماماندىقتارى مەن تاجىريبەسى ءارالۋان. دەسە دە, بارلىعىن ءبىر ارناعا توعىستىراتىن ورتاق ماقسات بار. ول – IT سالاسىندا ءوز ورنىن تاۋىپ, جاڭا داعدىنى يگەرۋ.

جاساندى ينتەللەكت مەكتەبىندەگى ەڭ جاس ستۋدەنتتەردىڭ ءبىرى – ستانيسلاۆ كۋلەشوۆ. ول نەبارى 18 جاستا. ستۋدەنت س.سەيفۋللين اتىنداعى قازاق اگرو­تەحنيكالىق ۋنيۆەرسيتەتىندە ءبىلىم الادى. «Tomorrow School»-عا كەلگەنگە دەيىن ونىڭ باعدارلامالاۋ بويىنشا تاجىريبەسى بولماعان. الايدا نەگىزگى داعدىلاردى مەڭگەرىپ, ونى ءىس جۇزىندە قولدانا باستادى. ماسەلەن, استاناداعى كوفەحانالاردىڭ بىرىنە ونلاين تاپسىرىس جاساۋعا ارنالعان «Telegram Mini App» قوسىمشاسىن جاساپ بەردى. سونىمەن قاتار ەۋروپالىق كومپانيادان العاشقى تاپسىرىسىن دا الدى. «ەڭ باستىسى – ىقىلاس پەن تاباندىلىق. قازىرگى تاڭدا ءجۇرىپ وتكەن جولىما كوز جۇگىرتسەم, بۇل مەنىڭ باسىمنان ءوتىپ جاتقان وقيعا ەكەنىنە سەنە الار ەمەسپىن», دەيدى ول تاڭدانىسىن جاسىرا الماي.

ال وسى مەكتەپتىڭ تاعى ءبىر قاتىسۋشىسى ازامات جەڭىسوۆتىڭ IT سالاسىندا از دا بولسا تاجىريبەسى بولعان. 20 جاستاعى ازامات جەڭىسوۆ – AITU-دىڭ ءۇشىنشى كۋرس ستۋدەنتى. ول «كيبەرقاۋىپسىزدىك» ماماندىعى بو­يىن­شا وقيدى. بۇرىن-سوڭدى باسقا دا IT مەك­تەپتەردە ءبىلىم السا دا, ءارتۇرلى سەبەپ­كە بايلانىستى وقۋدى سوڭىنا دەيىن جەتكىزبەگەن ەكەن. ال «Tomorrow School»-عا كەلگەندە بىردەن قولداۋ مەن شى­نايى قى­زىعۋشىلىقتى سەزىنگەنىن ايتا­دى. ناتي­جە­سىندە, ول «Beginner English Club» اشىپ, بۇگىندە باسقا ستۋدەنتتەرگە اعىل­شىن ءتىلىن­ ۇيرەنۋگە كومەكتەسىپ ءجۇر. سونداي-اق ءىرى كومپانيادا تاجىريبەدەن دە ءوتتى. «مەن كۇن سايىن ءوزىمدى 1 پايىزعا بولسىن جاق­سار­تۋعا تىرىسامىن», دەيدى ازامات.

كەيبىر ادامداردىڭ «Tomorrow School»-داعى جولى IT سالاسىنا دەگەن قىزى­­عۋشىلىقتان ەمەس, ءوزىن-ءوزى تانۋ مەن ءومىر­دىڭ ءمانىن ىزدەۋ نيەتىنەن باس­تاۋ العان. ماسەلەن, ءامىر جاقىشەۆ ماماندىعى بو­يىنشا – ەكونوميست. ول 10 جىلدان استام ۋاقىت ءداستۇرلى بيزنەستى دوڭگەلەتكەن, ياعني IT سالاسىنا بويلاماعان. «باعدارلامالاۋ ونەرى – تەك ەرەكشە دارىنى بار ادامدار­عا ءتان دۇنيە دەپ ويلايتىنمىن. بىراق «peer-to-peer» فورماتىمەن تانىسقان سوڭ, بۇل كوزقاراسىم تۇبەگەيلى وزگەر­دى. ەلىمىزدە دە ءدال وسىنداي مەكتەپتىڭ پايدا بولعانىن ەستىگەندە قۋاندىم. «Tomorrow School» – جي مەن IT سالاسىن­دا دامۋدى قالايتىندار ءۇشىن ۇلكەن مۇمكىندىك», دەيدى 36 جاستاعى ءامىر جاقىشەۆ. بۇگىندە ول «Public Speaking Club»-تى جۇرگىزەدى جانە «Astana Hub»-تىڭ «AI’preneurs» اكسەلەراتسيالىق باع­دارلاماسىنا قاتىسادى.

ءار ستۋدەنتتىڭ جولى – ءوز الدىنا ءبىر وقيعا. بۇگىندە مەكتەپ جانىندا «AI Tools Club», «Kazakh Club», «Freelance Club», «Beginner English», «Public Speaking, Startup Club» سياقتى 13 ستۋدەنتتىك كلۋب جۇمىس ىستەيدى. كلۋب قاتىسۋشىلارى ساباقتار وتكىزىپ, ءوزارا تاجىريبە الماسىپ, كوشباسشىلىق داعدىلارىن دامىتادى.

«ستۋدەنتتەر «Astana Hub»-تىڭ «Startup Garage», «AI’preneurs» سياقتى باعدارلامالارىنا جانە «Decentrathon» حاكاتونىنا قاتىسادى. ال ەرەكشە كوزگە تۇسكەندەر «Astana Hub» باس ديرەكتورى ماعجان ماديەۆپەن جەكە كەزدەسۋگە شاقىرىلىپ, ەلىمىزدىڭ IT سالاسىن, ستارتاپتاردى قولداۋ باعدارلامالارىن بىرگە تالقىلادى», دەيدى «Tomorrow School»-دىڭ كوميۋنيتي-مەنەدجەرى ارۋجان تاۋباەۆا.

ءبىلىم بەرۋ الاڭى ودان ءارى دامىپ, IT سالاسىندا ءبىلىمىن جەتىلدىرۋگە نيەت بىلدىرگەن جاندار ءۇشىن ءاردايىم اشىق. قازىر «Tomorrow School»-دىڭ 7-لەگىنە ءوتىنىم قابىلداۋ ءجۇرىپ جاتىر. وقۋعا تىركەلۋ 18 شىلدەگە دەيىن « tomorrow-school.ai» پلاتفورماسىندا قولجەتىمدى.