لوگيكا باعىتىنداعى بايلانىس

قازاق-فرانتسۋز كوللوكۆيۋمىنىڭ تاريحى وسىدان 40 جىلداي بۇرىن, 1986 جىلى باستالعان. نوۆوسىبىردەگى اكادەمقالاشىقتا فرانتسۋز لوگيگى ءارى لينگۆيسى بريۋنو پۋازا مەن قازاق عالىمى تولەندى مۇستافين العاش رەت جۇزدەسىپ, ءوزارا قۇرمەت پەن عىلىمي قىزىعۋشىلىق نەگىزىندە ەرەكشە سەرىكتەستىككە جول اشتى. سول كەزدەسۋدىڭ ناتيجەسىندە 1990 جىلى الماتى مەن قاراعاندىدا العاشقى قازاق-فرانتسۋز كوللوكۆيۋمى ءوتتى. سودان بەرى كونفەرەنتسيا گەوگرافيا­سى كەڭەيىپ, جىل سايىن ءتۇرلى مەملە­كەت­تە عىلىمي باسقوسۋلار ۇيىمداستىرى­لىپ كەلەدى.

1994 جىلى تولەندى عاريف ۇلىنىڭ ومىردەن وتۋىنە بايلانىستى كوللوك­ۆيۋم جۇمىسى ۋاقىتشا ءۇزىلىپ قالعان ەدى. الايدا پروفەسسور برۋنو پۋازانىڭ باستاماسىمەن فورۋم 2000 جىلى قارا­عا­ندىدا قايتا جانداندى. بيىل دا ءوزى­نىڭ شاكىرتتەرى مەن عىلىمي ءىزباسار­لا­رىن ەرتىپ كەلگەن برۋنو پۋازا جاس­تار اراسىنداعى عىلىمي بايلانىستى نىعايتۋعا زور ۇلەس قوستى. ول قازىرگى تاڭ­دا ە.ا.بوكەتوۆ اتىنداعى قاراعاندى ۋني­ۆەرسيتەتىنىڭ, ل.ن.گۋميلەۆ اتىن­داعى ەۇۋ-دىڭ قۇرمەتتى پروفەسسورى.

«عىلىمدا شەكارا بولماۋى كەرەك. سول سەبەپتى بۇل كوللوكۆيۋم وقۋ وردامىزدىڭ مەحانيكا-ماتەماتيكا فاكۋلتەتىندە ءداستۇرلى تۇردە ۇيىمداستىرىلىپ كەلەدى. ءبىز بەيجىڭ ۋنيۆەرسيتەتى, جوعارى ەكونوميكا مەكتەبى, ماسكەۋ مەملەكەتتىك تەحنولوگيالىق ينستيتۋتى, ءنوۆوسىبىر مەملەكەتتىك ۋنيۆەرسيتەتى, سونداي-اق ليون ۋني­ۆەرسيتەتىنىڭ كورنەكتى عالىمدارىن قارسى العانىمىزعا قۋانىشتىمىز. كونفەرەنتسيا بارىسىندا تىڭ عىلىمي جاڭالىقتار ايتىلاتىنىنا سەنىمدىمىن», دەدى ل.ن.گۋميلەۆ اتىنداعى ەۇۋ-دىڭ اكادەميالىق ماسەلەلەر جونىندەگى پرورەكتورى ارداق بەيسەنباي.

ايتا كەتەيىك, بيىلعى كوللوكۆيۋم­عا 70-تەن استام قاتىسۋشى جينالدى. ولاردىڭ قاتارىندا قازاقستان, فرانتسيا, رەسەي, وزبەكستان, قىتاي, يسپانيا جانە باسقا دا مەملەكەتتەردىڭ عالىمدارى بار. كونفەرەنتسيا باعدارلاماسىن­دا كلاسسيكالىق مودەلدەر تەورياسىمەن قاتار, قازىرگى زامان تالابىنا ساي تاقىرىپتار – كريپتوگرافيا­داعى لوگيكالىق ادىستەر, الگوريتمدىك قۇرىلىمدار, لوگيكا مەن ءتىل بايلانىسى, جاساندى ينتەللەكت كونتەكسىندەگى دالەلدەر تەورياسى سىندى وزەكتى سالالار قامتىلدى.