جاز ماۋسىمىنىڭ ءبىر سىناعى

الايدا سۋ قويمالارى تەگىس قاۋىپسىز ەمەس, ىشىندە كۇرت تومەندەپ كەتەتىن تەرەڭدەرى دە, اعىنى قاتتى وزەندەر دە بار. كەيىنگى ون جىلدا وبلىستا 216 ادام, ونىڭ ىشىندە 34 بالا سۋعا باتىپ كەتكەن. ال كەيىنگى ءۇش جىلدا عانا 15 ادام سۋدان قازا تاپتى. بىلتىر سۋعا ءتۇسۋ ماۋسىمى باستالماي جاتىپ ءۇش بالا سۋعا كەتتى. اسا قاۋىپتى سۋ قويمالارى قاتارىندا ەسىل وزەنى, الاكول, سولەنىي, لەبياجە, ۇلكەن توراڭعۇل, شالقار, يمانتاۋ كولدەرى اتالادى.

قازىر بارلىق كولدىڭ التاۋى كوممۋنالدىق مەنشىككە قارايدى, قالعان ەلۋ ءتورتىن كاسىپكەرلەر جالعا العان. وسىلاردىڭ ىشىندە كەيبىر سۋ قويمالارىنىڭ شومىلۋعا قاۋىپتى ەكەنىن باقىلامايتىندارى ءجيى كەزدەسەدى. وسى تۇرعىدا ازاماتتىق قورعانىس باسقارماسىنىڭ اعا وفيتسەرى ريزابەك تەمىربەكوۆ بيىلعى سۋدان ساقتاندىرۋ شارالارى تۋرالى ايتىپ بەردى.

ء«بىز بارلىق سۋ قويمالارىنداعى قاۋىپسىزدىك شارالارىن تەكسەردىك. جەدەل قۇتقارۋ جاساعىنىڭ كۇشى مەن قۇرالدارى توتەنشە جاعدايمەن كۇرەسۋگە دايىن. سۋعا ءجۇزۋ قۇرالدارى, سۇڭگۋ جاراقتارى دا دايىندىق ساپىندا. اتاپ ايتساق, 24 ءجۇزۋ قۇرالى سۋعا تۇسىرىلگەن. بۇلاردان باسقا 25 موتورلى قايى­عىمىز, سۋعا سۇڭگۋ قاجەت ەتىلگەن جاعدايدا قولدانىلاتىن 20 دانا گيدروكوستيۋمىمىز بار. حالىق سۋعا كوپ تۇسەتىن ەسىلدىڭ بويى مەن الاكولدىڭ جاعاسىنا تاۋلىك بويى كەزەكشىلىك ۇيىمداستىرىلدى. كۇن قاتتى ىسىپ كەتەتىن بولسا, شالقار, يمانتاۋ كولدەرىنە دە وسىنداي شارالار قولدانباقپىز», دەدى ول. 

جەرگىلىكتى بيلىك تاراپىنان 2025 جىلعى سۋعا ءتۇسۋ قاۋىپسىزدىگىن قامتاماسىز ەتۋدى قاراستىرعان شارالار جوسپارى دا بەكىتىلگەن. ونىڭ جۇمىسىنا «اmanat» پارتياسىنىڭ فيليالى مەن جاستار رەسۋرسى ورتالىعىنىڭ مۇشەلەرى, پوليتسيا قىزمەتكەرلەرى, اسكەريلەر تارتىلعان. وسى ۋاقىتقا دەيىن تج جونىندەگى كوميسسيانىڭ ەكى وتىرىسى ءوتتى. ونىڭ قورىتىندىسى بويىنشا وبلىستىق ءبىلىم باسقارماسىنا بارلىق وقۋشىلارعا سۋعا شومىلۋ قاۋىپسىزدىگىنە بايلانىستى WhatsApp جەلىسى ارقىلى ەسكەرتۋ ۇسىنىلعان.

سولتۇستىك قازاقستان وبلىسى