بيىل 1 شىلدەدە ەۋرازيالىق ەكونوميكالىق كوميسسيا القاسىنىڭ وتىرىسىندا مەملەكەتتىك ساتىپ الۋلار ماقساتىندا تاۋارلاردىڭ شىققان ەلىن انىقتاۋ قاعيدالارىنا 11-قوسىمشاسىن التى جاڭا تاۋار پوزيتسياسىمەن – مەديتسينالىق جانە حيميالىق بۇيىمدارمەن تولىقتىرۋ تۋرالى شەشىم ماقۇلداندى. بۇل شەشىم – ەۋرازيالىق ەكونوميكالىق وداق (ەاەو) تاۋارلارى رەتىندە تانىلاتىن ونىمدەر تىزبەسىن كەڭەيتۋگە جانە تيىسىنشە, وداقتىڭ بارلىق مۇشە مەملەكەتتەرىنىڭ اۋماعىندا مەملەكەتتىك ساتىپ الۋلارعا قاتىسۋ كەزىندە ولارعا ۇلتتىق رەجيم بەرۋ ماقساتىندا قابىلداندى. بۇل تاۋارلار شىققان ەلىن راستايتىن ست-1 سەرتيفيكاتى بولعان جاعدايدا ەاەو ەلدەرىنىڭ مەملەكەتتىك ساتىپ الۋلارىنا قاتىسا الادى, دەپ حابارلايدى Egemen.kz.
ساۋدا جانە ينتەگراتسيا مينيسترلىگىنىڭ ءباسپاسوز قىزمەتىنىڭ حابارلاۋىنشا, ماڭىزدىسى, بۇعان دەيىن رەسەي تاراپى مەملەكەتتىك ساتىپ الۋلارعا قاتىسۋ ءۇشىن تاۋارلاردىڭ شىعارىلعان ەلىن انىقتاۋ ولشەمشارتتارىنا سايكەس كەلەتىن جەكەلەگەن ونەركاسىپتىك تاۋارلارعا رۇقسات بەرەتىن قاۋلى قابىلداعان بولاتىن. اتاپ ايتقاندا, تاۋارلاردى رەسەي فەدەراتسياسى اۋماعىندا قايتا وڭدەۋدىڭ جەكەلەگەن وپەراتسيالارىن جۇرگىزۋ, وندىرىلەتىن تاۋارلاردىڭ رەسەيلىك تىزىلىمدە بولۋى جانە ت.ب.
وسىلايشا, ست-1 سەرتيفيكاتى بار قازاقستان وندىرۋشىلەرى تەندەرلەرگە جەرگىلىكتى جەتكىزۋشىلەرمەن تەڭ جاعدايدا قاتىسا الادى, بۇل ونىمدەردى وتكىزۋگە جانە نارىقتى كەڭەيتۋگە تولىق قولجەتىمدىلىك بەرەدى.
بۇل شەشىم قازاقستاننىڭ ەاەو اياسىنداعى بەلسەندى ۇستانىمى مەن جۇمىسىنىڭ ناتيجەسى بولىپ تابىلادى جانە ەلىمىزدىڭ وداقتاعى ەكونوميكالىق مۇددەلەرىن ىلگەرىلەتۋگە باعىتتالعان.
بۇگىندە شىعارىلعان ەلى ست-1 سەرتيفيكاتىمەن راستالاتىن تاۋارلار تىزبەسى 309 اتاۋدى قامتيدى (تاۋارلاردىڭ تولىق تىزبيۋەسىمەن كوميسسيانىڭ رەسمي سايتىندا تانىسۋعا بولادى: eec.eaeunion.org).
اتالعان شەشىمدى تۇپكىلىكتى بەكىتۋ ءۇشىن جۋىردا ەۋرازيالىق ەكونوميكالىق قاۋىمداستىق (ەەق) كەڭەسىنىڭ قاراۋىنا ۇسىنىلاتىن بولادى.