بۇگىن, 3 شىلدەدە دوكتورانتۋراعا ءتۇسۋ ەمتيحانىنا (دتە) قاتىسۋ ءۇشىن ءوتىنىش قابىلداۋ باستالدى. بۇل جونىندە قر عىلىم جانە جوعارى ءبىلىم مينيسترلىگىنىڭ ۇلتتىق تەستىلەۋ ورتالىعى مالىمدەدى. وتىنىشتەر 3 تامىزعا دەيىن قابىلدانادى, ال ەمتيحان 4–20 تامىز ارالىعىندا وتەدى, دەپ حابارلايدى Egemen.kz.
ۆەدومستۆونىڭ حابارلاۋىنشا, تىركەلۋ http://app.testcenter.kz/ سايتىندا جۇرگىزىلەدى. تالاپكەرلەر تەك ءبىر جوعارى وقۋ ورنىن جانە ءبىر ءبىلىم بەرۋ باعدارلامالارى توبىنىڭ باعىتىن تاڭداي الادى. ەگەر وتىنىشكە وزگەرىستەر ەنگىزۋ قاجەت بولسا, ونى وتىنىشتەردى قابىلداۋ كەزەڭى اياقتالعانعا دەيىن وڭدەۋگە نەمەسە جويۋعا مۇمكىندىك بار.
ەمتيحان ۋاقىتى مەن ورنى تۋرالى اقپارات تالاپكەردىڭ جەكە كابينەتىندە 9 تامىزدا قولجەتىمدى بولادى.
دوكتورانتۋراعا ءتۇسۋ ەمتيحانى ءۇش نەگىزگى كەزەڭنەن تۇرادى:
اڭگىمەلەسۋ – 30 بالل; ەسسە جازۋ – 20 بالل; بەيىنى بويىنشا تەستىلەۋ – 50 بالل.جالپى 100 بالدىق شكالا بويىنشا كەمىندە 75 بالل جيناعاندار عانا مەملەكەتتىك ءبىلىم بەرۋ تاپسىرىسى بويىنشا كونكۋرسقا جانە اقىلى نەگىزدە وقۋعا قاتىسۋعا مۇمكىندىك الادى.
«دوكتورانتۋراعا ءتۇسۋ ءۇشىن قازتەست جۇيەسى بويىنشا مەملەكەتتىك ءتىلدى مەڭگەرگەنىن راستايتىن سەرتيفيكات جانە شەت ءتىلىن مەڭگەرگەنىن راستايتىن سەرتيفيكات ۇسىنۋ قاجەت. TOEFL ITP سەرتيفيكاتى بار تۇلعالار دتە باستالعانعا دەيىن اعىلشىن ءتىلىن بىلۋگە ارنالعان قوسىمشا تەستىلەۋدى تاپسىرادى. اتاپ وتسەك, 2024 جىلى شەت ءتىلىن مەڭگەرگەنىن راستايتىن سەرتيفيكاتتاردىڭ شەكتى دەڭگەيلەرى B1-گە دەيىن تومەندەتىلدى جانە تىزىمگە TOEIC جانە Duolingo English Test سەرتيفيكاتتارى ەنگىزىلدى», دەپ حابارلادى مينيسترلىكتىڭ ءباسپاسوز قىزمەتى.
سونىمەن قاتار, بيىلدان باستاپ بەيىنى بويىنشا دوكتورلار باعدارلاماسى اياسىندا دوكتورانتۋراعا ءتۇسۋ مۇمكىندىگى قاراستىرىلعان. بۇل باعدارلاما شەت ءتىلىن مەڭگەرۋ سەرتيفيكاتىن تالاپ ەتپەيدى جانە ەمتيحان بارىسىندا ەسسە جازۋ قاراستىرىلماعان.
باعالاۋ جۇيەسى:
اڭگىمەلەسۋ – 25 بالل; ۇسىنىس حات (بولعان جاعدايدا) – 5 بالل; بەيىندىك ەمتيحان – 50 بالل. جالپى بالل – 80, ال شەكتى بالل – 50 بالل.