اقمولا وبلىسىندا شومىلۋ ماۋسىمى باستالعالى 12 ادام سۋعا كەتكەن, ونىڭ ىشىندە ءبىر ءجاسوسپىرىم بار. بۇل تۋرالى اقمولا وبلىسى توتەنشە جاعدايلار دەپارتامەنتىنىڭ ازاماتتىق قورعانىس باسقارماسىنىڭ باستىعى باقىت ابلانوۆ مالىمدەدى, دەپ جازادى Egemen.kz.
ونىڭ ايتۋىنشا, جىل سايىن وڭىردەگى سۋ ايدىندارىندا شامامەن 20 ادام قازا تابادى. سۋداعى قايعىلى وقيعالاردىڭ باسىم بولىگى ءدال وسى شومىلۋ كەزەڭىندە تىركەلەدى.
«سوڭعى ءۇش جىلدا شومىلۋ ماۋسىمىندا 51 ادام كوز جۇمدى, ونىڭ 19-ى كامەلەتكە تولماعاندار. بيىلدىڭ وزىندە ماۋسىم باستالعالى بەرى 12 ادام قازا تاپتى», دەدى باحىت ابلانوۆ.
سونىمەن قاتار باقىت ابلانوۆ — الكوگولدىك ماس كۇيدە شومىلۋ, بالالاردى قاراۋسىز قالدىرۋ, ءوز مۇمكىندىگىن دۇرىس باعالاماۋ مەن ءجۇزۋ بىلمەۋ, سونداي-اق رۇقسات ەتىلمەگەن جانە جابدىقتالماعان ورىنداردا سۋعا ءتۇسۋ ادام ولىمىنە ءجيى سەبەپ بولاتىنىن ايتتى.
ايتا كەتەيىك, بۇگىندە وبلىس اۋماعىندا 69 رەسمي جاعاجاي جۇمىس ىستەيدى. سونىمەن قاتار, بالالاردى جۇزۋگە ۇيرەتۋ ماقساتىندا ارنايى قاۋىپسىز ۇيرەتۋ ورىندارى ۇيىمداستىرىلعان.
وڭىردەگى سۋ ايدىندارىندا قاۋىپسىزدىكتى 99 قۇتقارۋشى قاداعالايدى. ولاردىڭ يەلىگىندە 20 تەحنيكا جانە 32 ءجۇزۋ قۇرالى بار. جەرگىلىكتى اتقارۋشى ورگاندار جانە قۇقىق قورعاۋ قۇرىلىمدارىمەن بىرلەسىپ 500-گە جۋىق پروفيلاكتيكالىق رەيد جۇرگىزىلگەن. ناتيجەسىندە 47 تۇرعىن سۋداعى قاۋىپسىزدىك ەرەجەلەرىن بۇزعانى ءۇشىن اكىمشىلىك جاۋاپكەرشىلىككە تارتىلعان.