جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ عالىمدارى سايعاق جانە قۇس ەتىنەن (ۇيرەك نەمەسە قاز) دايىندالاتىن شۇجىق ءوندىرىسىن قولعا الدى, دەپ حابارلايدى Egemen.kz «نادەجدا» گازەتىنە سىلتەمە جاساپ.
العاشقى ءونىم پارتياسى ۋنيۆەرسيتەتتىڭ عىلىمي زەرتحاناسىندا ارنايى رەتسەپتۋرا بويىنشا ازىرلەندى. قولدانىلعان ەت ۋنيۆەرسيتەتتىڭ ءوز اۋماعىندا وسىرىلگەن سايعاقتار مەن قۇستاردان الىنعان.
ء«بىز سايعاق ەتىنىڭ كورسەتكىشتەرىن زەرتتەپ, ونىڭ ميكروبيولوگيالىق قاۋىپسىزدىگىن تەكسەردىك. قۇرامىندا ىشەك تاياقشاسى نەمەسە وزگە دە زياندى باكتەريالار بولماۋىن قاداعالادىق», دەيدى تاعام قاۋىپسىزدىگى زەرتحاناسىنىڭ مەڭگەرۋشىسى ايان ورازوۆ.
عالىمداردىڭ ايتۋىنشا, جوبا تەك رەتسەپتۋرامەن شەكتەلمەيدى – ءونىمنىڭ ءدامى, ساپاسى جانە ساقتاۋ مەرزىمى دە باستى نازاردا. ايدانا بەكبۋسينوۆا ەسىمدى ماگيستردىڭ مالىمەتىنشە, سايعاق ەتى شىرىندى بولىپ شىققان, ال دايىن شۇجىق ەكى اپتاعا دەيىن ساقتاۋعا جارامدى.
ءبىر سايعاقتان ورتا ەسەپپەن 13–15 كگ ەت الۋعا بولادى. قازىرگى ۋاقىتتا زەرتحانالىق توپ شۇجىق قۇرامىن جەتىلدىرىپ, تەحنولوگياعا پاتەنت الۋدى, كەيىنىرەك – سەريالىق ءوندىرىستى ىسكە قوسۋدى جوسپارلاپ وتىر.
اتاپ ءوتۋ كەرەك, ءدال وسى ۋنيۆەرسيتەتتىڭ عالىمدارى بۇعان دەيىن سايعاق ەتىن وڭدەۋدى زاڭداستىرۋ جانە رەتتەۋ باستاماسىن كوتەرگەن بولاتىن. ولار بۇل قادام تابيعي رەسۋرستاردى ءتيىمدى پايدالانۋعا جانە پايدالى, ەكولوگيالىق تازا ءونىمدى نارىققا شىعارۋعا مۇمكىندىك بەرەدى دەپ ەسەپتەيدى.
ايماقتا 2,3 ميلليونعا جۋىق سايعاق بار. قازىرگى تاڭدا 800 مىڭ باس سايعاقتى ەت جانە كونسەرۆ ءوندىرىسى ءۇشىن شەكتەۋلى نەگىزدە الۋ مۇمكىندىگى قاراستىرىلىپ جاتىر.