استانا. 16 اقپان. قىزىلوردا وبلىسىنىڭ باسشىسى قىرىمبەك كوشەرباەۆتىڭ وكىمىمەن جاڭاقورعان اۋدانىنىڭ اكىمى بولىپ رۋسلان رۇستەم ۇلى رۇستەموۆ تاعايىندالدى. بۇل تۋرالى e-kzylorda.gov.kz حابارلادى.
ال اۋداندى 3 جىلدان بەرى باسقارعان سۇلتانبەك ءتاۋىپباي ۇلى ي. ابدىكارىموۆ اتىنداعى قىزىلوردا اگرارلىق تەحنيكالىق كوللەدجىنە ديرەكتور قىزمەتىنە اۋىستى.
رۋسلان رۇستەموۆ 1968 جىلى 13 جەلتوقساندا قىزىلوردا وبلىسى قارماقشى اۋدانى ت.كومەكباەۆ اۋىلىندا تۋعان. ورتا مەكتەپتى بىتىرگەن سوڭ ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىنە ءتۇسىپ, ونى 1994 جىلى «فيلولوگ, قازاق ءتىلى مەن ادەبيەتىنىڭ وقىتۋشىسى» ماماندىعى بويىنشا بىتىرگەن.
1994-1996 جىلدارى ارالىعىندا قىزىلوردا پەداگوگيكالىق ينستيتۋتىنىڭ قازاق ادەبيەتى كافەدراسىندا وقىتۋشى, 1996-1997 جىلدارى اتالمىش وقۋ ورنىنىڭ «فيلولوگيا» وقۋ-عىلىم كەشەنى ديرەكتورىنىڭ ورىنباسارى, 1997-1998 جىلدارى قىزىلوردا قالاسى اكىمى اپپاراتىنىڭ ىشكى ساياسات جانە الەۋمەتتىك سالا ءبولىمىنىڭ مامانى, كەڭەسشىسى, قالا اكىمىنىڭ ءباسپاسوز حاتشىسى قىزمەتتەرىن اتقارعان.
1998-1999 جىلدارى قالالىق مادەنيەت ءبولىمىنىڭ مەڭگەرۋشىسى, قالا اكىمى اپپاراتى ىشكى ساياسات جانە الەۋمەتتىك سالا ءبولىمىنىڭ مەڭگەرۋشىسى, قالا اكىمى اپپاراتى الەۋمەتتىك-ساياسي ماسەلەلەر جانە سىرتقى بايلانىستار ءبولىمىنىڭ مەڭگەرۋشىسى, 1999-2007 جىلدارى ارالىعىندا قىزىلوردا قالالىق مادەنيەت ءبولىمىنىڭ مەڭگەرۋشىسى, قىزىلوردا وبلىستىق مادەنيەت باسقارماسى باستىعىنىڭ ورىنباسارى, ال 2007-2010 جىلدارى ىشىندە قىزىلوردا وبلىسى اكىمى اپپاراتى الەۋمەتتىك-ساياسي ءبولىمىنىڭ مەڭگەرۋشىسى, شيەلى اۋدانى اكىمى اپپاراتىنىڭ جەتەكشىسى, شيەلى اۋدانى اكىمىنىڭ ورىنباسارى بولدى. 2010-2011 جىلدارى «قىزىلوردا وبلىستىق ىشكى ساياسات باسقارماسى» مەملەكەتتىك مەكەمەسىنىڭ باستىعى.
2011-2014 جىلدارى ارالىعىندا «قىزىلوردا وبلىسىنىڭ تىلدەردى دامىتۋ باسقارماسى» مەملەكەتتىك مەكەمەسىنىڭ باستىعى, قىزىلوردا قالاسى اكىمىنىڭ ورىنباسارى قىزمەتىن اتقاردى. ال 2014 جىلدىڭ 2 شىلدەسىندە وبلىس اكىمىنىڭ №458-وكىمىمەن قىزىلوردا وبلىستىق ىشكى ساياسات باسقارماسىنىڭ باسشىسى قىزمەتتەرىن اتقارعان.
جولدىباي بازار.
دەرەك, سۋرەت: e-kzylorda.gov.kz.