وتكەن سەنبىدە ۇكىمەتتە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن كەڭەستە ماۋسىم ايىنىڭ ءۇش اپتاسى مەن بەس ايداعى ينفلياتسيا كورسەتكىشتەرى جانە ونى تۇراقتاندىرۋ جايى قارالدى.
ساۋدا جانە ينتەگراتسيا مينيسترلىگى ۇلتتىق ستاتيستيكا بيۋروسىمەن بىرلەسىپ ينفلياتسياعا ەداۋىر اسەر ەتەتىن ازىق-ت ۇلىك, ازىق-ت ۇلىك ەمەس تاۋارلار مەن قىزمەتتەردىڭ 20 نەگىزگى اتاۋى بويىنشا تالداۋ ناتيجەلەرىن ۇسىندى. بۇل تىزىمگە سيىر ەتى, كارتوپ, پياز, الما, قانت, كۇندىزگى ستاتسيونارداعى ەم, سالقىن سۋ مەن جىلۋ, دارىگەردىڭ العاشقى قابىلداۋى جانە وزگە دە تاۋارلار مەن قىزمەتتەر ەندى. ولار حالىقتىڭ كۇندەلىكتى ومىرىنە تىكەلەي قاتىستى ءارى تۇرمىس ساپاسىنا اسەر ەتەدى.
جىل باسىنان بەرى ەلدەگى ينفلياتسيا دەڭگەيى 6,1%-دى قۇرادى. ونىڭ ىشىندە ازىق-ت ۇلىك تاۋارلارىنىڭ باعاسى 6,7%-عا, ازىق-ت ۇلىك ەمەس تاۋارلار 3,6%-عا, اقىلى قىزمەتتەر 7,8%-عا وسكەن.
«وتكەن اپتادا الەۋمەتتىك ماڭىزى بار ازىق-ت ۇلىك باعاسىنىڭ ورتاشا ءوسىمى 0,2%-دى, ال جىل باسىنان بەرگى ءوسىمى 7,5%-دى قۇرادى. كارتوپ پەن قىرىققاباتتىڭ باعاسى 0,6% جانە 0,8%-عا تومەندەدى. الايدا ءسابىز, پياز, تاۋىق جانە سيىر ەتى باعاسىنىڭ ءوسۋ ءۇردىسى ساقتالىپ وتىر», دەپ اتاپ ءوتتى ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا.
باعانى تۇراقتاندىرۋ ماقساتىندا جارمەڭكەلەر ۇيىمداستىرىلىپ, قانت, كۇنباعىس مايى, تۇز جانە قۇس ەتىنىڭ ءىرى وندىرۋشىلەرىمەن مەموراندۋمدار جاسالىپ جاتىر. سونداي-اق بورداقىلاۋ الاڭدارىن قولداۋ جانە جەمشوپ قۇنىن تومەندەتۋ بويىنشا مەملەكەتتىك قولداۋ شارالارى قاراستىرىلىپ جاتىر.
وتىرىستا ەرتە پىسەتىن كوكونىس ونىمدەرىن جيناۋ قارقىنى دا تالقىلاندى. ەرتە پىسەتىن كوكونىس ونىمدەرىنىڭ نەگىزگى جەتكىزۋشىسى سانالاتىن تۇركىستان وبلىسىندا ءسابىز, پياز, كارتوپ جانە قىرىققابات جيناۋ كولەمى جوسپاردان ايتارلىقتاي اسىپ ءتۇستى. ءونىم كولەمى 125%-دان باستاپ 6 ەسەگە دەيىن كوپ. جاپپاي جيناۋ ناۋقانىنىڭ باستالۋىنا بايلانىستى ءساۋىر-مامىر ايلارىندا كارتوپ يمپورتى 36%-عا, ال قىرىققابات يمپورتى 95%-عا قىسقاردى.
سەرىك جۇمانعارين ينفلياتسياعا اسەرى جوعارى 20 تاۋاردىڭ باعاسى قارقىندى ءوسىپ جاتقان وڭىرلەردىڭ ەسەبىن تىڭداپ, جاڭا ءونىم بويىنشا كەلىسىمشارت جاساسۋ بارىسىن قارادى. سونداي-اق اقىلى قىزمەتتەردىڭ باعا ءوسىمىن تەجەۋ ارقىلى جىلدىق ينفلياتسيانى بەلگىلەنگەن مەجەدە ۇستاۋ قاجەتتىگى ايتىلدى.
وتىرىس قورىتىندىسى بويىنشا ۆيتسە-پرەمەر ءوڭىر اكىمدىكتەرىنە حالىق كوپ تۇتىناتىن تاۋارلاردى بازارلار مەن ساۋدا ورىندارىندا تۇراقتى قامتاماسىز ەتۋدى جانە باعا تۇراقتىلىعىن باقىلاۋدى كۇشەيتۋدى تاپسىردى.