پرەزيدەنت تاپسىرمالارىن جۇزەگە اسىرۋ شەڭبەرىندە ۇكىمەت رەزەرۆىنەن شىعىس قازاقستان وبلىسىنداعى جىلۋ جەلىلەرىن جوندەۋ-قالپىنا كەلتىرۋ جۇمىستارىن جۇرگىزۋگە 2,5 ملرد تەڭگەدەن استام قارجى ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
قۇجاتقا سايكەس قاراجات ريددەر قالاسى جانە ق.قايسەنوۆ كەنتىنىڭ جىلۋ جەلىلەرىندە جوندەۋ جۇمىستارىن اياقتاۋعا باعىتتالادى. بولىنگەن قارجىنىڭ نەگىزگى بولىگىن ريددەر قالاسىنىڭ جىلۋ جەلىلەرىنىڭ ەڭ قاتتى توزعان 5,9 شاقىرىم ۋچاسكەسىن كۇردەلى جوندەۋگە جۇمساۋ جوسپارلانىپ وتىر.
ۇلان اۋدانى ق.قايسەنوۆ كەنتىندە ۇزىندىعى 9 شاقىرىم جىلۋ جەلىلەرىن رەكونسترۋكتسيالاۋدىڭ ەكىنشى كەزەگىن اياقتاۋعا 113 ملن تەڭگە باعىتتاۋ جوسپارلانعان.
جالپى شقو-نىڭ ەلدى مەكەندەرىندە جىلۋ جەلىلەرى 30 جىلدان استام ۋاقىت بويى پايدالانىلىپ كەلەدى. وسى كەزەڭدە ولارعا كۇردەلى رەكونسترۋكتسيا جاسالماعان. توزۋ دەڭگەيى ورتا ەسەپپەن 55%-دان, ال جەكەلەگەن ەلدى مەكەندەردە 75%-دان اسادى.
ەستەرىڭىزگە سالايىق, بيىل مامىر ايىندا قر ۇكىمەتىنىڭ رەزەرۆىنەن ەكى قازاندىق اگرەگاتىن جوندەۋگە, №5 رەدۋكتسيالىق-سالقىنداتۋ قوندىرعىسىنىڭ تەحنولوگيالىق ۇدەرىستەرىن باسقارۋدىڭ اۆتوماتتاندىرىلعان جۇيەسىن ەنگىزۋگە, سونداي-اق ريددەر قالاسىنىڭ جەو-نىڭ ىشكى قاجەتتىلىكتەرىن قامتاماسىز ەتەتىن ەلەكتروتەحنيكالىق جابدىقتىڭ ءبىر بولىگىن اۋىستىرۋعا شامامەن 1,7 ملرد تەڭگە ءبولىندى.
سوڭعى ەكى جىلدا قالادا جوندەۋ جۇمىستارى توتەنشە جاعداي كەزىندە, جەو-نى تەزىرەك ىسكە قوسۋ جانە جىلۋ جەلىلەرىن جوندەۋ قاجەتتىلىگىنە بايلانىستى جۇرگىزىلدى. جەدەل ارەكەت ەتۋدىڭ ناتيجەسىندە ەكى جىل ىشىندە توزۋ 82%-دان 66,8%-عا دەيىن تومەندەدى.