ماڭعىستاۋ وبلىسىندا مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ولار ءۇشىن قولايلى ورتا قالىپتاستىرۋ باعىتىندا جۇيەلى جۇمىستار جۇرگىزىلىپ جاتىر. سونىڭ ناتيجەسىندە بۇگىنگى تاڭدا وڭىردە 567 الەۋمەتتىك ينفراقۇرىلىم نىسانى تولىقتاي بەيىمدەلگەن, دەپ حابارلايدى Egemen.kz.
بۇل باستاما قازاقستان رەسپۋبليكاسىندا جۇزەگە اسىپ جاتقان بىرقاتار ءىرى باعدارلامالار اياسىندا ىسكە اسىرىلىپ جاتىر. اتاپ ايتقاندا, 2025-2030 جىلدارعا ارنالعان ينكليۋزيۆتى ساياسات تۇجىرىمداماسى, «AMANAT» پارتياسىنىڭ 2023-2027 جىلدارعا ارنالعان جول كارتاسى جانە پرەزيدەنت باستاماسىمەن قولعا الىنعان «حالىقپەن بىرگە» جوباسى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, «AMANAT» پارتياسىنىڭ جول كارتاسىنا سايكەس, ەل بويىنشا 42 مىڭنان استام نىسان ينتەراكتيۆتى قولجەتىمدىلىك كارتاسىنا ەنگىزىلگەن. بۇل نىسانداردى كەزەڭ-كەزەڭىمەن بەيىمدەۋ كوزدەلىپ وتىر: 2023 جىلى – 20%, 2024 جىلى – 40%, ال 2027 جىلدىڭ سوڭىنا دەيىن تولىق بەيىمدەلۋى ءتيىس. قازىرگى ۋاقىتتا رەسپۋبليكا بويىنشا 23 206 نىسان قولجەتىمدى ەتىلدى.
ماڭعىستاۋ وبلىسى بويىنشا بەيىمدەلگەن 567 نىساننىڭ ىشىندە:
دەنساۋلىق ساقتاۋ مەكەمەلەرى – 87; ءبىلىم بەرۋ ۇيىمدارى – 259; مادەنيەت ورىندارى – 28; مەملەكەتتىك جانە كۆازيمەملەكەتتىك مەكەمەلەر – 73; سپورت نىساندارى – 9; الەۋمەتتىك قورعاۋ مەكەمەلەرى – 4; ساۋدا جانە ويىن-ساۋىق ورتالىقتارى – 81; كولىك ينفراقۇرىلىمى – 2; باسقا نىساندار – 24.«نۇرمۇحان ءجانتورين اتىنداعى وبلىستىق مۋزىكالىق-درامالىق تەاترىنا بارعانىمدا, عيماراتقا كىرۋ قانشالىقتى قولجەتىمدى بولعانىن كورىپ قۋانىپ قالدىم جانە جاقىندا قالامىزداعى ەڭ ۇلكەن سۋپەرماركەت – «دينادان» ساۋدا جاسادىم, وندا كوپ تاۋار الۋعا وتە ىڭعايلى بولدى, كىرىپ-شىعۋعا جاعداي جاسالعان, تاكتيلدى پليتالار, مۇگەدەكتەرگە ارنالعان كورسەتكىشتەر بار. مەن ءاردايىم بىزگە جاسالعان جاعدايلارعا نازار اۋدارامىن. بۇل – قالا تۇرعىندارى, سونىڭ ىشىندە ءبىز ءۇشىن دە ەڭ ءجيى باراتىن ورىندار», دەپ ەكىنشى توپتاعى مۇگەدەكتىگى بار يسلام اتاكيشيەۆ ويىمەن ءبولىستى.
بۇدان بولەك, وبلىس بويىنشا حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ دەپارتامەنتى تاراپىنان 2025 جىلدىڭ باسىنان بەرى 7 پروفيلاكتيكالىق جانە 15 جوسپاردان تىس تەكسەرۋ جۇرگىزىلدى. ناتيجەسىندە 6 نۇسقاما بەرىلىپ, 6 نىسان اكىمشىلىك جاۋاپكەرشىلىككە تارتىلدى. ايتا كەتۋ كەرەك, بۇزۋشىلىقتار العاش رەت انىقتالعان جاعدايدا تەك نۇسقاما بەرىلىپ, ەگەر ول ۋاقىتىلى ورىندالماسا, ايىپپۇل سالىنادى.
2025 جىلدىڭ سوڭىنا دەيىن ماڭعىستاۋ وبلىسىندا تاعى 368 نىساندى بەيىمدەۋ جوسپارلانعان.