اتىراۋ قالاسىندا ءبىلىم سالاسىنداعى مەكەمەلەردىڭ جىلىتۋ جۇيەسىن تەكسەرۋ باستالدى. تەكسەرۋ الداعى قىسقى ماۋسىمعا دايىندىق اياسىندا جۇرگىزىلىپ جاتىر, دەپ جازادى Egemen.kz.
اتىراۋ قالالىق ءبىلىم ءبولىمى باسشىسىنىڭ ورىنباسارى ەرمەك مامبەتوۆانىڭ دەرەگىنە قاراعاندا, مۇنايلى شاھاردا 68 مەكتەپ, 47 بالاباقشا بار.
«قالاداعى 39 مەكتەپ پەن 26 بالاباقشاعا جىلۋ قازاندىقپەن بەرىلەدى. وزگەلەرى ورتالىقتاندىرىلعان جىلىتۋ جۇيەسىنە قوسىلدى. ورتالىقتاندىرىلعان جەلىدەن 8 كوللەدج جىلۋ الادى. تاعى 8 كوللەدج دەربەس گاز جۇيەسىمەن جابدىقتالدى», دەيدى ەرمەك مامبەتوۆا.
ونىڭ ايتۋىنشا, دەربەس قازاندىقپەن قامتىلعان مەكەمەلەرگە «جاحان اتىراۋ» جشس سەرۆيستىك قىزمەت كورسەتەدى. وسىعان بايلانىستى وبلىستىق ءبىلىم بەرۋ باسقارماسى مەن كومپانيا اراسىندا كەلىسىمشارت جاسالعان.
ء«بىزدىڭ كومپانيا اتىراۋ قالاسى مەن يساتاي, قۇرمانعازى, ماحامبەت, جىلىوي, يندەر, ماقات, قىزىلقوعا اۋداندارىنداعى 310 مەكەمەنىڭ جىلۋ قازاندىعىن قارايدى. قازاندىقتاردى ۇدايى تەكسەرىپ, جوندەۋ جۇرگىزەمىز. توزىعى جەتكەن جابدىقتاردى اۋىستىرۋ سەكىلدى سەرۆيستىك قىزمەت كورسەتەمىز. بارلىق مەكتەپ پەن بالاباقشانىڭ جىلۋ قازاندىقتارى تولىق تەكسەرۋدەن وتكىزىلدى», دەيدى كومپانيانىڭ جەتەكشى ينجەنەرى باعىتجان بازار.
جەتەكشى ينجەنەردىڭ مالىمەتىنشە, قازاندىقتاردىڭ 70 پايىزى جوندەۋدى قاجەت ەتپەيدى. ال, 10 پايىزىنا كىشى جوندەۋ جۇرگىزىلەدى. تاعى 20 پايىزىنىڭ قازاندىعى مەن جابدىقتارىن اۋىستىرۋ قاجەت.