ماقتاارال اۋدانى كەتەباي اۋىلىنداعى ءاليا مولداعۇلوۆا اتىنداعى مەكتەپتىڭ الدىندا باتىر قىزعا بيىك تۇعىرعا ورناتىلعان بيۋست پەن مەموريالدىق تاقتا ورناتىلدى. ۇلى وتان سوعىسىندا ەرلىكتىڭ وشپەس ۇلگىسىن كورسەتىپ, قازاقتىڭ داڭقىن شىعارعان سۇرمەرگەن قىز ءبىر ۇلتتىڭ عانا باتىرى دەگەن ولشەمگە سىيمايدى.
وسى ايتۋلى مەرەكەگە ارنايى كەلگەن رەسپۋبليكالىق ارداگەرلەر كەڭەسىنىڭ توراعاسى, تاريح عىلىمدارىنىڭ دوكتورى ومىرزاق وزعانباەۆ ءاليانىڭ ەرلىگى قازاق ۇل-قىزدارىنا ۇلگى, ونەگە بولاتىندىعىن, ەل باسىنا كۇن تۋعاندا اسىل ەرلەردىڭ جاڭقيارلىق ەرلىككە باراتىندىعىن, وتان ءۇشىن وتقا تۇسكەننىڭ كۇيمەيتىندىگىن ايتتى. وسى مەرەكەگە اقتوبەدەن ارنايى كەلگەن ءاليانىڭ ءسىڭلىسى تاجەن نۇرمۇحامەدقىزى: «وسى مەكتەپتەن ءبىلىم العان وقۋشىلار ءاليا سياقتى وتانىن شىنايى سۇيەتىن ۇلكەن جۇرەكتى ازاماتتار بولادى دەپ ويلايمىن», دەگەن.
ەسكەرتكىشتى وسى مەكتەپتەن تۇلەپ ۇشقان ازاماتتار ءوز قارجىسىنا ورناتىپتى. مەموريالدىق تاقتاعا وسى اۋىلدان سوعىسقا اتتانعان 45 سولداتتىڭ اتى-ءجونى قاشاپ جازىلعان.
جيىندا ءسوز العان ماقتاارال اۋدانىنىڭ اكىمى سەرىك تۇربەكوۆ اۋداننان مايدانعا اتتانعان 15 مىڭنان استام ازاماتتىڭ 10 مىڭنان استامى ورالماعانىن ايتتى. مىنە, سوعىس قانداي قاسىرەت اكەلگەن.
اۋداندا سوعىس ارداگەرلەرىنە لايىقتى كومەك كورسەتىلىپ جاتىر. بىرىنە پاتەر بەرىلسە, ءبىرىنىڭ ءۇيى ءجوندەۋدەن ءوتىپ, كەتەۋى كەتكەنى قايتا سالىنىپ جاتىر. سوعىس ارداگەرىن الىپ ءجۇرۋ ءۇشىن كولىك تە بەرىلۋدە.
باقتيار تايجان,«ەگەمەن قازاقستان».
وڭتۇستىك قازاقستان وبلىسى.
سۋرەت: 24.kz