بۇل كۇندەرى ەلىمىزدىڭ بارلىق وڭىرلەرىندەگىدەي ءوندىرىستى ايماقتىڭ سوعىس ارداگەرلەرى دە ۇلكەن قۇرمەتكە بولەنۋدە. كەشە وبلىس اكىمى نۇرمۇحامبەت ابدىبەكوۆ ءبىر توپ مايدانگەردى قابىلداپ, مەرەيلى مەرەكەمەن قۇتتىقتادى. قازاقستان رەسپۋبليكاسى پرەزيدەنتىنىڭ جارلىعىمەن مەملەكەتكە سىڭىرگەن ەرەن ەڭبەگى, قوعامدىق ومىردەگى بەلسەندى قىزمەتتەرى ءۇشىن جانە ۇلى جەڭىستىڭ 70 جىلدىعىنا وراي, وردەن-مەدالدارمەن ماراپاتتاۋ تۋرالى قۋانىشتى حاباردى جەتكىزدى. الدى 100 جاسقا جەتكەن سابىرعالي كۇسەنوۆتىڭ, 90-نان اسقان سۇڭعات ساتتىعۇلوۆتىڭ, قاپاس ءتۇسىپوۆتىڭ, اننا كوتوۆانىڭ كەۋدەلەرىنە «قۇرمەت» وردەنى تاعىلدى. سونداي-اق, شەرۋ باسۋوۆ, الەكسەي لىسياك, تالعات داۋىلباەۆ سىندى اقساقالدار «ەرەن ەڭبەگى ءۇشىن» مەدالىن يەلەندى.
بىرقاتار قارت جاۋىنگەرلەرگە قازاقستان رەسپۋبليكاسىنىڭ قۇرمەت گراموتالارى تاپسىرىلدى. ال شاحتينسك قالاسىنىڭ ارداگەر تۇرعىنى نادەجدا ايۋحانوۆاعا جاڭا پاتەردىڭ كىلتى تابىس ەتىلدى.
ماراپاتتالۋشىلار مەن سىي-قۇرمەتكە بولەنۋشىلەر الدىندا تالعات بيگەلدينوۆ اتىنداعى رەسپۋبليكالىق اسكەري مەكتەپتىڭ بولاشاق ساردارلارى وتان ءۇشىن ادال قىزمەت ەتۋگە انت بەردى. 81-ءشى گيمنازيا وقۋشىلارى ءوز ونەرلەرىن كورسەتىپ, مەرەكەلىك كوڭىل كۇيدى ءوسىردى.
ايقىن نەسىپباي, «ەگەمەن قازاقستان».
قاراعاندى.