جەتىسۋ وبلىسى پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى پروكۋراتۋرامەن بىرلەسىپ, رۇقسات قۇجاتتارىنسىز جۇمىس ىستەگەن كومپانيانىڭ زاڭسىز قىزمەتىنىڭ جولىن كەستى, دەپ حابارلايدى Egemen.kz.
اتالعان كومپانيا ءتۇستى مەتالداردى زاڭسىز جولمەن قابىلداپ, وڭدەپ, ىلەسپە قۇجاتتارعا شىندىققا جاناسپايتىن مالىمەتتەر ەنگىزۋ ارقىلى ولاردى بىرنەشە مارتە ەلىمىزدىڭ اۋماعىنان شىعارۋعا ارەكەتتەنگەن.
كاسىپورىن اۋماعىندا جۇرگىزىلگەن ءتىنتۋ كەزىندە شەتەلگە جونەلتۋگە دايىندالعان 600 توننادان استام قورعاسىن مەن 100 توننادان استام اليۋميني قۇيمالارى, سونداي-اق ءتۇرلى ءتۇستى مەتالل قالدىقتارى تاركىلەندى.
سونداي-اق مەتالل بالقىتۋعا ارنالعان جاسىرىن تسەح پەن زەرتتەۋ جۇمىستارىن جۇرگىزۋگە ارنالعان زەرتحانا جويىلدى.
بۇعان قوسا, نىسان اۋماعىنان كوشى-قون زاڭدارىن بۇزىپ, زاڭسىز ەڭبەك ەتىپ جۇرگەن شەتەلدىك ازاماتتار انىقتالىپ, ولار ءتيىستى زاڭناماعا سايكەس جاۋاپكەرشىلىككە تارتىلدى.
قازىرگى تاڭدا بۇل ىسكە قاتىستى سوتقا دەيىنگى تەرگەپ-تەكسەرۋ جۇمىستارى جۇرگىزىلىپ, قىلمىستىق سحەمانىڭ تۇپكىلىكتى ۇيىمداستىرۋشىلارى انىقتالىپ جاتىر.