قوستاناي وبلىسىنىڭ قۇرىلىس سالاسى ايرىقشا سەرپىنمەن دامىپ كەلەدى. ءوڭىر اكىمى قۇمار اقساقالوۆتىڭ توراعالىعىمەن وتكەن اكىمدىك جيىنىندا ءمالىم ەتىلگەندەي, جىل باسىنان بەرى جۇرگىزىلگەن قۇرىلىس-مونتاج جۇمىستارىنىڭ كولەمى 75,5 ملرد تەڭگەگە جەتكەن. بۇل وتكەن جىلدىڭ سايكەس كەزەڭىمەن سالىستىرعاندا 70 پايىزعا ارتىق كورسەتكىش, دەپ جازادى Egemen.kz.
قۇرىلىس سالاسىنداعى باستى باعىت – تۇرعىن ءۇي قۇرىلىسى. قاڭتار مەن مامىر ايلارى ارالىعىندا 179,5 مىڭ شارشى مەتر تۇرعىن ءۇي پايدالانۋعا بەرىلگەن. بۇل شامامەن 1810 جاڭا پاتەر. قوستاناي قالاسى مەن رۋدنىيدا, سونداي-اق قوستاناي اۋدانىنا قاراستى اۋماقتاعى «استانا» جانە «بايتەرەك» شاعىن اۋداندارىندا قۇرىلىس قارقىنى جوعارى. جالپى العاندا, بۇل شاعىن اۋدانداردا 150-دەن استام تۇرعىن ءۇي مەن الەۋمەتتىك ينفراقۇرىلىم نىساندارى بوي كوتەرمەك.
ءوڭىر باسشىسى وتىرىستا ەلدى مەكەندەردەگى تۇرعىنداردىڭ ءومىر ءسۇرۋ ساپاسىن ارتتىرۋ قاجەتتىگىن اتاپ ءوتىپ, اۋماقتاردى كەشەندى تۇردە اباتتاندىرۋدى تاپسىردى.
ء«ۇي سالعان كەزدە اۋماقتى اباتتاندىرۋعا ەرەكشە ءمان بەرۋ كەرەك. بالالار جانە سپورت الاڭدارى تەك ساپالى ماتەريالداردان جاسالىپ, بارلىق قۇرىلىمدار بەرىك ورناتىلۋى ءتيىس. مەن قۇرىلىس الاڭدارىن جەكە ءوزىم ارالاپ ءجۇرمىن, اۋدان اكىمدەرىنە بۇل جۇمىستى قاتاڭ باقىلاۋعا الۋدى تاپسىردىم. قوعامدىق باقىلاۋ – ەڭ ءتيىمدى ءتاسىل», دەدى قۇمار اقساقالوۆ.
قوستاناي وبلىسىندا الەۋمەتتىك ينفراقۇرىلىمدى دامىتۋ جۇمىستارى دا قاتار جۇرگىزىلىپ جاتىر. قازىردىڭ وزىندە بىرنەشە مەكتەپ, ەمحانا, بالاباقشا جانە سپورت نىساندارى ىسكە قوسىلدى. جىل سوڭىنا دەيىن اۋىلدىق جەرلەردە تاعى 15 جاڭا الەۋمەتتىك نىسان پايدالانۋعا بەرىلمەك.
ينجەنەرلىك ينفراقۇرىلىمعا دا ەرەكشە كوڭىل ءبولىنىپ كەلەدى. اتاپ ايتقاندا, قۇناي, بەرەكە, استانا جانە بايتەرەك شاعىن اۋداندارىندا سۋ, جارىق, جىلۋ جۇيەلەرىن تارتۋعا 8,7 ملرد تەڭگە بولىنگەن. سونىمەن بىرگە قۇرىلىس ماتەريالدارى ءوندىرىسى دە قارقىن الىپ وتىر: بيىلعى بەس ايدا بۇل سالادا 18,5 ملرد تەڭگەنىڭ ءونىمى شىعارىلعان.
جيىن بارىسىندا توو «My Eco House» ديرەكتورى نۇرجان باتتالوۆ ەكولوگيالىق جانە ۇنەمدى سيپ-پانەلدەردەن ءۇي سالۋ جوباسىن تانىستىردى. ونىڭ ايتۋىنشا, 180 شارشى مەترلىك ءۇيدى نەبارى 10 كۇندە قۇراستىرىپ شىعۋعا بولادى.
سونىمەن قاتار تۇرعىن ۇيگە مۇقتاج جاندار ءۇشىن وبلىستا ەلەكتروندى كەزەك جۇيەسى ەنگىزىلىپ جاتىر. «وتباسى بانك» بازاسىندا ىسكە قوسىلعان بۇل جۇيە ارقىلى تۇرعىندار جەڭىلدەتىلگەن يپوتەكا مەن جالدامالى پاتەر باعدارلامالارىنا قاتىسا الادى. 2025 جىلعى مامىر ايىنىڭ سوڭىنا دەيىن بۇل جۇيەدە 149 مىڭنان استام ءوتىنىم تىركەلگەن.
وبلىس اكىمى كۋمار اقساقالوۆتىڭ ايتۋىنشا, وڭىردەگى بارلىق باستاما مەن جۇمىس ازاماتتاردىڭ ءومىر ءسۇرۋ ساپاسىن ارتتىرۋعا باعىتتالعان.