Qatar Airways اۋە كومپانياسى ۋاقىتشا اۋە كەڭىستىگىنىڭ جابىلۋىنان كەيىن رەيس كەستەسىن قالپىنا كەلتىرىپ جاتىر. جولاۋشىلارعا ۇشۋ كۇنىن وزگەرتۋگە نەمەسە بيلەتتەرىن ايىپپۇلسىز قايتارۋعا مۇمكىندىك بەرىلدى, دەپ حابارلايدى Egemen.kz.
Qatar Airways اۋە كومپانياسى سارسەنبى كۇنى رەسمي مالىمدەمە جاريالاپ, 23 ماۋسىم, دۇيسەنبى كۇنى تاياۋ شىعىستاعى اسكەري-ساياسي جاعدايدىڭ ۋشىعۋىنا بايلانىستى قاتار اۋماعىنداعى اۋە كەڭىستىگىنىڭ ۋاقىتشا جابىلعانىن جانە رەيستەر كەستەسى قالپىنا كەلتىرىلىپ جاتقانىن حابارلادى.
مالىمدەمەگە سايكەس, رەيستەردەگى كىدىرىستەر 26 ماۋسىمدى قوسا العاندا ساقتالۋى مۇمكىن.
تۋىنداعان جاعدايدى رەتتەۋ ماقساتىندا كومپانيا 2025 جىلعى 30 ماۋسىمعا دەيىنگى ۇشۋ كۇنى كورسەتىلگەن بيلەتتەرى بار جولاۋشىلارعا كەلەسى مۇمكىندىكتەردى ۇسىنادى:
— ساپار كۇنىن ايىپپۇلسىز وزگەرتۋ (جاڭا ۇشۋ كۇنى 2025 جىلعى 15 شىلدەگە دەيىنگى ارالىقتا بولسا); — ساپاردان باس تارتقان جاعدايدا پايدالانىلماعان بيلەتتىڭ تولىق قۇنىن قايتارۋ.
Qatar Airways مالىمدەمەسىندە كومپانيا قىزمەتكەرلەرى جولاۋشىلارعا جان-جاقتى كومەك كورسەتۋ ءۇشىن تولىق رەجيمدە جۇمىس ىستەپ جاتقانى اتاپ ءوتىلدى.
قازىرگى تاڭدا اۋە كومپانيا 170-تەن استام باعىتتى قامتيتىن اۋە جەلىسىن كەزەڭ-كەزەڭىمەن قالپىنا كەلتىرىپ جاتىر. دوحاداعى حاماد حالىقارالىق اۋەجايىندا جانە وزگە دە ماڭىزدى حابتاردا قوسىمشا پەرسونال جۇمىلدىرىلىپ, جولاۋشىلارعا كومەك كورسەتىلىپ جاتىر.
ء«بىز جولاۋشىلارىمىزدىڭ سابىرى, تۇسىنىستىگى مەن سەنىمى ءۇشىن العىس ايتامىز. ءبىزدىڭ باستى مىندەتىمىز — جولاۋشىلاردىڭ دىتتەگەن جەرىنە مۇمكىندىگىنشە كەشىكپەي جەتۋىن قامتاماسىز ەتۋ», دەلىنگەن كومپانيانىڭ رەسمي ۇندەۋىندە.
ايتا كەتەيىك, بۇگىن, سارسەنبى كۇنى قازاقستاندىق اۆياكومپانيالار بىرىككەن اراب امىرلىكتەرى مەن قاتاردان جولاۋشىلاردى ەۆاكۋاتسيالاي باستادى. Air Astana تاياۋ شىعىس باعىتىنداعى رەيستەردى قايتا جانداندىرىپ جاتىر.
ەسكە سالايىق, 23 ماۋسىم كۇنى يران قاتارداعى ء«ال-ۋدەيد» امەريكالىق اسكەري بازاسىنا زىمىران سوققىسىن جاسادى.