بۇگىن ەلوردامىزدا «استانا تازالىق» سەرىكتەستىگىنىڭ باستاماسىمەن جۋرناليستەرگە ارنالعان ءباسپاسوز تۋرى ءوتتى, دەپ جازادى Egemen.kz.
ەلوردانىڭ ەكولوگيالىق كۇن تارتىبىندەگى وزەكتى ماسەلەنىڭ ءبىرى – سانيتارلىق تازالىقتى كۇشەيتۋ جانە كوممۋنالدىق قىزمەتتەردىڭ اشىقتىعى – وسى ءىس-شارانىڭ باستى ارقاۋىنا اينالدى. اۋقىمدى ءىس-شاراعا باق وكىلدەرىمەن قاتار, ەكولوگتار, بلوگەرلەر, قوعام بەلسەندىلەرى قاتىستى. قاتىسۋشىلارعا قالانىڭ سانيتارلىق دەڭگەيىن ساقتاۋعا كومەكتەسەتىن زاماناۋي تەحنيكا تانىستىرىلىپ, كاسىپورىننىڭ وندىرىستىك نىسانى بويىنشا ەكسكۋرسيا ۇيىمداستىرىلدى. سونداي-اق سالالىق ماماندار ءىس-شارا قوناقتارىمەن پىكىر الماستى.
استانا – قارقىندى دامىپ جاتقان زاماناۋي مەگاپوليس. مۇندا كۇن سايىن اۋقىمدى قۇرىلىس جۇرگىزىلەدى, ينفراقۇرىلىمى كۇردەلەنىپ, كولىك سانى ارتىپ جاتىر. بۇل – قورشاعان ورتاعا تۇسەتىن انتروپوگەندىك جۇكتەمەنىڭ ارتۋىنا سەبەپشى بولىپ وتىر. قالانىڭ تازالىعى تەك كوممۋنالدىق قىزمەتتەردىڭ جۇمىسىنا عانا ەمەس, سونىمەن بىرگە ءاربىر ازاماتتىڭ ەكولوگيالىق ساناسى مەن جاۋاپكەرشىلىگىنە تىكەلەي بايلانىستى. اسىرەسە, قۇرىلىس الاڭدارى, ونەركاسىپتىك نىساندار مەن جۇكتەمەسى جوعارى ماگيسترالدار ماڭىندا جاعداي كۇردەلى.
ءباسپاسوز تۋرى اياسىندا «استانا تازالىق» پەن كاسىبي تەحنولوگيالار كوللەدجى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. بۇل قۇجات – سانيتارلىق قىزمەت پەن قالانى اباتتاندىرۋ سالاسىنا جاڭا ماماندار دايارلاۋعا باعىتتالعان ماڭىزدى قادام. العاش رەت كوللەدج ستۋدەنتتەرىنە كاسىپورىن بازاسىندا اقىلى وندىرىستىك تاجىريبەدەن ءوتۋ مۇمكىندىگى ۇسىنىلدى. الداعى ۋاقىتتا بۇل باعدارلاما كەڭەيتىلىپ, وسىنداي مۇمكىندىك باسقا دا وقۋ ورىندارىنىڭ ستۋدەنتتەرىنە بەرىلمەك.
قاتىسۋشىلار, سونداي-اق, كومپانيانىڭ تسيفرلىق باقىلاۋ جۇيەسىمەن تانىستى. تەحنيكالىق باقىلاۋ ءبولىمىنىڭ باسشىسى داستان مۇسابەكوۆتىڭ ايتۋىنشا, بارلىق تەحنيكالارعا ورناتىلعان جاڭا بۋىن GPS-ناۆيگاتسيالار ارنايى ماشينالاردىڭ قوزعالىسىن دا, جۇرگىزۋشىلەردىڭ ءتارتىبىن دە ناقتى ۋاقىتتا باقىلاۋعا مۇمكىندىك بەرەدى.
«قازىرگى جۇيە تەحنيكانىڭ قاي جەردە ەكەنىن عانا ەمەس, جۇرگىزۋشىنىڭ مارشرۋتتان اۋىتقۋىن, ۇزاق تۇرىپ قالۋىن نەمەسە ءتىپتى ۇيىقتاپ كەتكەنىن دە تىركەيدى. مۇنداي تەحنولوگيالار ءتارتىپ پەن قاۋىپسىزدىكتى ارتتىرىپ, جۇمىستىڭ ساپاسىن دا جاقسارتادى», دەدى د.مۇسابەكوۆ.