ماۋسىم ايىندا ماسكەۋدەن باستاۋ العان «ەۋرازيا جۇرەگىنە ساياحات – 2025» بىرەگەي تۋريستىك تانىمدىق ەكسپەديتسياسى قىزىلوردا وبلىسىنا كەلىپ جەتتى. رەسەي, قىرعىزستان, تاجىكستان مەن وزبەكستان مەملەكەتتەرى وكىلدەرىنىڭ باسىن قوسقان تانىمدىق ەكسپەديتسيا ماقساتى – ورتالىق ازيا ەلدەرى مەن رەسەي اراسىنداعى ىسكەرلىك, گۋمانيتارلىق جانە عىلىمي بايلانىستاردى نىعايتۋ, سونداي-اق حالىقارالىق ارىپتەستىكتى دامىتۋعا باعىتتالعان, دەپ حابارلايدى Egemen.kz.
تۋريستەردىڭ سىرداعى ساپارى ارال قالاسىنان باستالدى. ەكسپەديتسيا مۇشەلەرى اۋدان ورتالىعىنداعى «بالىقشىلار اللەياسىن» تاماشالاپ, ارال تەڭىزى تۋرالى قۇندى دەرەكتەرمەن تانىستى. ودان كەيىن XIX عاسىرداعى ورىس ساۋلەت ونەرى ۇلگىسىندە سالىنعان «بالىقشىلار مۋزەيىنە» باردى. بۇل مۋزەيدە «بالىقشىلار», «كەمەلەر» زالى جانە اشىق اسپان استىنداعى مۋزەي كورمەسى ۇيىمداستىرىلعان.
ەكسپەديتسيا شيجاعا ەلدى مەكەنىندەگى قۇمدى توبەلەر مەن وڭىردەگى بىرەگەي دەمالىس ايماعى سانالاتىن قامباش كولىندە جالعاستى.
الدا ولار بايقوڭىر قالاسىن ارالاپ, قارماقشى اۋدانىنداعى قورقىت اتا مەموريالدىق كەشەنى مەن قىزىلوردا قالاسىنداعى بىرنەشە مادەني-سپورتتىق نىسانداردا بولادى.