قۇقىق قورعاۋ ورگاندارىنىڭ قىزمەتكەرلەرى ىلە الاتاۋىنداعى 28 گۆاردياشى-پانفيلوۆشىلار شىڭىنا شىقتى. يگى باستاما «زاڭ جانە ءتارتىپ» جوباسى اياسىندا جۇزەگە اسىرىلدى. سپورتتىق ءىس-شاراعا ىشكى ىستەر مينيسترلىگى, باس پروكۋراتۋرا, قارجىلىق مونيتورينگ اگەنتتىگى مەن سىبايلاس جەمقورلىققا قارسى قىزمەت وكىلدەرى قاتىستى.
توپ تۇيىقسۋ مەن مىڭجىلقى شاتقالى, «الپينگراد» جانە مانشۇك مامەتوۆا اتىنداعى اسۋ ارقىلى ءجۇرىپ وتكەن. ءسويتىپ, ىلە الاتاۋى سىلەمدەرىنىڭ تۇيىسكەن جەرىندە ورنالاسقان 28 گۆاردياشى-پانفيلوۆشىلار شىڭىنا شىقتى. كەيىن وسى جەرگە ەلىمىزدىڭ مەملەكەتتىك تۋى مەن «زاڭ جانە ءتارتىپ» جالاۋىن تىكتى. قاتىسۋشىلاردىڭ ايتۋىن- شا, 4 120 مەتر بيىكتىككە كوتەرىلۋ وڭاي بولماپتى.
«باستاپقىدا كۇن اشىق بولعان, كەيىن قۇبىلدى. جاڭبىر مەن بۇرشاق جاۋىپ, قالىڭ تۇمان باسىپ جولدى كورۋ قيىندادى. وسىلاي تاۋدىڭ ەڭ بيىك شىڭىن باعىندىرۋ وڭاي بولعان جوق. شامامەن 12 ساعاتتا ساپاردى اياقتادىق», دەيدى سپورتتىق ءىس-شاراعا قاتىسۋشىلاردىڭ ءبىرى الماتى قالاسى اۋەزوۆ اۋدانى پروكۋراتۋراسىنىڭ ءبولىم باستىعى ەرالى سوۆەت.
جالپى, قۇقىق قورعاۋ ورگاندارى قىزمەتكەرلەرىنىڭ وسىنداي قارلى اسۋعا ۇمتىلىسى – ادىلدىك پەن زاڭ ۇستەمدىگىنە دەگەن ادال نيەتتىڭ, بيىك مۇراتتىڭ ءرامىزى ىسپەتتى. بۇل – تەك فيزيكالىق تۇرعىدا باعىندىرعان شىڭ ەمەس, مورالدىق ءارى كاسىبي بيىكتىكتى باعىندىرۋعا دەگەن ۇمتىلىس. ءبىر جاعىنان مۇنداي ءىس-شارالار سالا ماماندارى اراسىنداعى ءوزارا ىنتىماقتاستىق پەن ارىپتەستىكتى نىعايتىپ, بىرلىكتى بەكەمدەي تۇسەدى.