پرەمەر-مينيستر ولجاس بەكتەنوۆ شەتەلدىك ينۆەستورلار كەڭەسىنىڭ 37-پلەنارلىق وتىرىسىنا قاتىسۋ ءۇشىن استاناعا كەلگەن Polpharma Group باقىلاۋشىلار كەڭەسىنىڭ توراعاسى ەجي ستاراكپەن كەزدەسۋ وتكىزدى.
وندا فارماتسەۆتيكا سالاسىنداعى, اتاپ ايتقاندا, حالىق ءۇشىن باسىم باعىتتار بويىنشا وتاندىق ءدارى-دارمەك ءوندىرىسى ۇلەسىن ۇلعايتۋ سالاسىنداعى ىنتىماقتاستىقتى ءارى قاراي دامىتۋ ماسەلەلەرى تالقىلاندى.
تاراپتار شىمكەنت قالاسىنداعى «حيمفارم» اق زاۋىتىن جاڭا وندىرىستىك عيماراتتار مەن زەرتحانالىق الاڭدار سالۋ ارقىلى كەڭەيتۋ جوباسىنىڭ جۇزەگە اسىرىلۋ بارىسىن قارادى. نارىق سۇرانىسىن ەسكەرە وتىرىپ, كاسىپورىن Santo Member of Polpharma Group ساۋدا بەلگىسىمەن جىلىنا 2 ملرد بىرلىك دارىلىك زاتتار ءوندىرىسىن يگەرۋدى جوسپارلاپ وتىر. ينۆەستيتسيا كولەمى 62,6 ملن دوللاردى قۇرايدى, 300 جاڭا جۇمىس ورنىن اشۋ كوزدەلگەن.
جەرگىلىكتى ءوندىرىستى دامىتۋ ءۇشىن باسىم تەراپيالىق باعىتتار رەتىندە: تۋبەركۋلەز, سوزىلمالى ۆيرۋستى س گەپاتيتى جانە باۋىر تسيرروزى, قاتەرلى ىسىكتەر, قانت ديابەتى, پسيحيكالىق بۇزىلۋلار, ورتالىق جۇيكە جۇيەسى, جۇرەك-قان تامىرلارى اۋرۋلارى جانە باسقا دا الەۋمەتتىك ماڭىزى بار اۋرۋلار تاڭدالدى.
«مەملەكەت باسشىسى قاسىم-جومارت توقاەۆ وتاندىق ءدارى-دارمەك ءوندىرىسى مەن مەديتسينالىق ماقساتتاعى بۇيىمدار ءوندىرىسىن دامىتۋدىڭ ماڭىزدىلىعىن ەرەكشە اتاپ ءوتتى. بۇل باعىتتا ءبىز دارىلىك زاتتار مەن مەديتسينالىق ماقساتتاعى بۇيىمداردىڭ وتاندىق ءوندىرىسى ۇلەسىن ارتتىرۋعا ۇمتىلىپ كەلەمىز. فارماتسەۆتيكالىق ءونىم ءوندىرىسىن لوكاليزاتسيالاۋدى ىنتالاندىرۋ شارالارىن جۇزەگە اسىرىپ جاتىرمىز. مەديتسينالىق تەحنولوگيالار ترانسفەرتى جانە يمپورتتى الماستىرۋ, عىلىمي جانە ەكسپورتتىق الەۋەتتى دامىتۋ باسىم باعىت سانالادى. قازاقستان ۇكىمەتى الەۋمەتتىك ماڭىزدى وندىرىستەردىڭ وسىنداي اۋقىمىن جۇزەگە اسىرۋعا مۇددەلى جانە ينۆەستيتسيالىق جوبانى ۋاقتىلى ىسكە قوسۋ ءۇشىن قاجەتتى قولداۋ شارالارىن قامتاماسىز ەتەدى», دەپ اتاپ ءوتتى و.بەكتەنوۆ.
Polpharma Group باقىلاۋشىلار كەڭەسىنىڭ توراعاسى ەجي ستاراك قازاقستانداعى ينۆەستيتسيالىق احۋالعا جوعارى باعا بەرىپ, جاڭا ءوندىرىس زاماناۋي تەحنيكامەن جابدىقتالاتىنىنا جانە وندىرىلەتىن ءونىم فارماتسەۆتيكا ونەركاسىبى سالاسىنداعى بارلىق حالىقارالىق ستاندارتتارعا تولىق سايكەس كەلەتىنىن ايتتى.
كەلىسسوزدەر قورىتىندىسى بويىنشا تاراپتار ءوزارا ءتيىمدى ىنتىماقتاستىقتى نىعايتۋعا نيەتتى ەكەندەرىن جەتكىزدى. پرەمەر-مينيستر دەنساۋلىق ساقتاۋ مينيسترلىگى مەن شىمكەنت قالاسى اكىمدىگىنە قىسقا مەرزىمدە جاڭا زاماناۋي دارىلىك زاتتار ءوندىرىسى قۇرىلىسىنا ينۆەستيتسيا تۋرالى كەلىسىم جوباسىن دايىنداۋدى تاپسىردى.
ايتا كەتەيىك, «حيمفارم» اق كاسىپورنىنا Polpharma Group ينۆەستيتسيالارىنىڭ جالپى كولەمى 130 ملن دوللاردان استى, 1 300-دەن استام جۇمىس ورنى اشىلدى. زاۋىت 12 فارماكوتەراپيالىق توپتى قامتيتىن 280-نەن استام جالپى پرەپارات شىعارادى. ءوندىرىس GMP جانە GDP حالىقارالىق ستاندارتتارى بويىنشا سەرتيفيكاتتالعان. ونىمدەر رەسەي, قىرعىزستان, موڭعوليا, وزبەكستان, تاجىكستان, تۇرىكمەنستان جانە باسقا دا ەلدەرگە جەتكىزىلەدى. وتكەن جىلى پايدالانۋعا بەرىلگەن ساپا جانە يننوۆاتسيا ورتالىعى قازاقستانداعى عىلىمي-زەرتتەۋ بازاسىن كۇشەيتە وتىرىپ, جاڭا پرەپاراتتاردى دەربەس ازىرلەۋگە جانە ەنگىزۋگە مۇمكىندىك بەرەدى. وتاندىق فارماتسەۆتيكا ءۇشىن كادرلار دايارلاۋدا ەلىمىزدىڭ ءبىلىم بەرۋ مەكەمەلەرىمەن ىنتىماقتاستىق جۇرگىزىلۋدە.