ماجارستان استاناسى بۋداپەشتتە دزيۋدودان الەم چەمپيوناتى اياقتالدى. تورتكۇل دۇنيەنىڭ تەڭدەسسىزدەرى باس قوسقان باسەكەدە ەلىمىزدىڭ قۇراماسى جالعىز مەدالدى قاناعات تۇتتى. ونى ءابيبا ابۋجاقىنوۆا جەڭىپ الدى. اسا جەڭىل سالماقتا بەلدەسكەن قازاق قىزى فينالدا ۇتىلىپ, كۇمىس مەدال يەلەندى. وكىنىشكە قاراي, وزگە بالۋاندارىمىزدىڭ بىردە-بىرەۋى جەڭىس تۇعىرىنا كوتەرىلە المادى.
چەمپيوندار تۇعىردان تايدى
بىلتىر پاريجدە الاۋى تۇتانعان وليمپيا ويىندارىندا التىن العان جەتى جىگىتتىڭ بارلىعى دۋناي جاعالاۋىنداعى جارىستا بوي كورسەتتى. بىراق ولار تەگىستەي تاتاميگە شىققان جوق. ماسەلەن, اتاقتى ەلدوس سمەتوۆ پەن داڭقى جەر جارعان تەددي رينەر باسەكەلەردى سىرتتاي تاماشالادى. قالعاندارى كۇرەستى. ءبىر قىزىعى, بۋداپەشتتە سول كوكجالداردىڭ بىردە-بىرەۋىنە باس جۇلدەنى ولجالاۋ باقىتى بۇيىرمادى. انىقتاپ ايتساق, وليمپيادانىڭ ەكى, الەمنىڭ ءتورت دۇركىن چەمپيونى حيفۋمي ابە (66 كگ) بۇل جولى قولا مەدالدى قاناعات تۇتتى. بىلتىر جوعارىدا اتالعان جارىستىڭ ەكەۋىندە دە قارسىلاس شىداتپاعان زەليم كوتسوەۆ (100 كگ) تا ءدال سول مەجەدەن كورىندى. حيدايات گەيداروۆ (73 كگ), تاكانوري ناگاسە (81 كگ), لاشا بەكاۋري (90 كگ) مۇلدە جۇلدەسىز قالدى. بىلتىر الەم چەمپيونى اتانعان گەورگي ساردالاشۆيلي (60 كگ), تاتو گريگالاشۆيلي (81 كگ), گوكي تادزيما (90 كگ), كيم ميندجون (130 كگ) دا بيىل وزدەرىنىڭ مىقتىلىعىن مويىنداتا المادى.
ماجارستاننىڭ باس شاھارىندا چەمپيونداردىڭ ەسىمدەرى تولىقتاي جاڭاردى. بۇعان دەيىنگى الەم چەمپيوناتتارىندا ەكى رەت قولا العان جاپونيالىق ريۋدزيۋ ناگاياما (60 كگ) بۇل جولى التىن تۇعىرعا كوتەرىلدى. ونىڭ وتانداستارى تاكەسي تاكەوكا (66 كگ) مەن سانسيرو مۋراوعا (90 كگ) دا تەڭ كەلەر ەشكىم تابىلمادى. بىلتىر پاريج وليمپياداسىنا كۇمىسپەن كۇپتەلگەن فرانتسيالىق جوان-بەنجامەن گابا (73 كگ) بۋداپەشتتە قارسىلاس شاق كەلتىرمەدى. حالىقارالىق دزيۋدو فەدەراتسياسىنىڭ (IJF) تۋى استىندا ونەر كورسەتكەن رەسەيدىڭ ءۇش بالۋانىنىڭ باق جۇلدىزى جارقىراي جاندى. اسىرەسە كوپشىلىكتى 73 كگ سالماقتاعى تيمير اربۋزوۆتىڭ ونەرى تامساندىردى. 21 جاستاعى جىگىت قارسى كەلگەندەردى قوعاداي جاپىرىپ, بارلىق باسەكەنى ايقىن باسىمدىقپەن اياقتادى. بىلتىر ابۋ-دابيدەگى الەمدىك دودانىڭ فينالىندا ول ايگىلى تاتو گريگالاشۆيليدەن ۇتىلسا, بيىل گولدەن-سكوردا وعان سان سوقتىردى. 23 جاستاعى ماتۆەي كانيكوۆسكيدىڭ دە قارقىنى كەرەمەت. جارىستىڭ باسىنان اياعىنا دەيىن قارسىلاستارىنا بەت قاراتپاعان ول فينالدا جاپونيالىق دوتا ارايدىڭ اياعىن اسپاننان كەلتىردى.
ايەلدەر اراسىندا پاريج وليمپياداسىندا توپ جارعان دزيۋدوشىلار اراسىنان بۋداپەشتتە يتاليالىق اليچە بەللانديدىڭ (78 كگ) عانا باعى جاندى. بىلتىرعى الەم چەمپيوندارىنىڭ ءبىرازى تۇعىردان تايسا, كەيبىرى بۇل باسەكەدە بوي كورسەتپەدى. يتاليانىڭ مىقتىلارى اسسۋنتا سكۋتتو (48 كگ) مەن اليچە بەللانديدەن بولەك, جاپونيالىق ۋتا ابە (52 كگ), حارۋكا كادزيۋ (63 كگ), سيحو تاناكو (70 كگ), گرۋزيالىق ەتەري ليپارتەلياني (57 كگ), وڭتۇستىككورەيالىق كيم حا يۋن (+78 كگ) التىننان القا تاقتى.
جىگىتتەردىڭ جولى بولمادى
بۋداپەشتتەگى باسەكەدە ەلىمىزدىڭ نامىسىن 12 بالۋان قورعادى. سولاردىڭ اراسىنان, جوعارىدا ايتقانىمىزداي, ءابيبا ابۋجاقىنوۆا عانا جانكۇيەرلەرىن قۋانتتى.
تاجىريبەلەرى ابدەن تولىسقان ماعجان شامشادين (60 كگ) مەن عۇسمان قىرعىزباەۆ (66 كگ) جاقسى كۇرەستى. اسىرەسە ماعجاننىڭ تۇساۋكەسەر كەزدەسۋىندە وليمپيادانىڭ قولا جۇلدەگەرى, الەم چەمپيونى, يسپانيالىق فرانسيسكو گارريگوستى 10 سەكۋندتا يپپونعا تاستاعانى كەرەمەت بولدى. ىلە-شالا ەۋروپا ويىندارى مەن قۇرلىق چەمپيوناتىنىڭ ەكى دۇركىن جۇلدەگەرى, بەلگيالىق يوررە فەرسترەتەننىڭ تاس-تالقانىن شىعاردى. سول كەزدە «ەندى ءبىزدىڭ ماعجاندى ەشكىم توقتاتا المايدى» دەپ ويلاعان ەدىك, بىراق مۇنىمىز بەكەر ەكەن. ودان كەيىن وليمپيادا مەن الەم چەمپيوناتىنىڭ قولا جۇلدەگەرى, جاپونيالىق ريۋدزيۋ ناگاياما مەن تاتامي قوجايىنى مارتون اندراسيگە جول بەرگەن سىر بويىنىڭ سايىپقىرانى جەتىنشى ورىندا قالىپ قويدى. عۇسمان دا ەكى كەزدەسۋىندە جەڭىسكە جەتىپ, ۇشىنشىسىندە تاجىكستاندىق نۇرالي ەموماليگە ەسە جىبەردى. جۇبانىش بەلدەسۋىندە جاپونيانىڭ جۇلدىزى حيفۋمي ابەدەن جەڭىلدى. ءسويتىپ, ول دا جەتىنشى ورىندى قاناعات تۇتتى. قالعان جەرلەستەرىمىز جارىستىڭ العاشقى ساتىلارىنان دا اسا المادى.
قازىربەك ءۇشىن قۋاندىق
ماجارستاندا 60 كگ سالماقتا سايىسقا تۇسكەن قازىربەك يوولكتىڭ ونەرىنە ءدان ريزا بولدىق. موڭعوليادا تۋىپ-وسكەن قازاقتىڭ قايسار ۇلى ءوزىنىڭ تاباندىلىعى مەن جانكەشتىلىگىنىڭ ارقاسىندا جەڭىس تۇعىرىنا كوتەرىلدى. ونىڭ رەسەيلىك ايۋب بليەۆكە عانا ءالى جەتپەدى. امەريكالىق دجوناتان يۋانگ, ەكۆادورلىق دجوناتان بەناۆيدەس, جارىس قوجايىنى فەچكو چاناد, برازيليالىق ميشەل اۆگۋستودان باسىم ءتۇستى. وسىلايشا, قازىربەك قولا مەدالدى موينىندا جارقىراتتى. قازىرگى كەزدە IJF رەيتينگىندە 63-ورىندا تۇرعانىن, كۇنى بۇگىنگە دەيىن مۇنداي جوعارى دەڭگەيدەگى جارىستارعا قاتىسپاعانىن ەسكەرسەك, بۋداپەشتتە يوولك ۇلكەن ەرلىك جاسادى دەپ ايتۋعا تولىق نەگىز بار. باتىر ۇل بايان-ولگەيگە ورالعاندا جەرگىلىكتى قازاقتار قازىربەككە ەرەكشە سىي-قۇرمەت كورسەتىپ, تەمىر تۇلپار مىنگىزدى.
بۋداپەشت بوزكىلەمىندە تاعى ءبىر قازاق كۇش سىناستى. ول – ايمان جەڭىس. قىتايدىڭ قازاعى +78 كگ سالماق دارەجەسىندە كۇرەسىپ, العاشقى اينالىمدا ەستونيالىق قارسىلاسىن تازا ۇتتى. ودان كەيىن جەڭىستىڭ جولى رومانا ديكومەن قيىستى. وليمپيادادا 2 التىن (كوماندالىق سايىس) مەن 2 قولا (جەكەلەگەن سايىس), الەم چەمپيوناتىندا 1 التىن مەن 1 قولا, ەۋروپا بىرىنشىلىگىندە 5 التىن العان ساقا سپورتشى قانداسىمىزدى ەش قينالماي ۇتتى. الايدا ايمانعا وكپە جوق. 21 جاستاعى بالۋان جات ەلدە ءوزىنىڭ مىقتىلىعىن مويىنداتىپ, باس كوماندانىڭ قاتارىنا قابىلداندى. حالىقارالىق دودالاردا دا جەڭىس ەلەۋلى تابىستارعا قول جەتكىزىپ ۇلگەردى. بيىل ازيا چەمپيونى اتانىپ, تاشكەنت گراند-سلەمىندە قولا مەدال يەلەندى. ولاي بولسا, الداعى ۋاقىتتا دا ايمان جەڭىس جانكۇيەرلەرىن جارقىن جەڭىستەرىمەن قۋانتاتىنىنا كۇمانىمىز جوق.