مەملەكەت باسشىسى قاسىم-جومارت توقاەۆ قۇقىق قورعاۋ قىزمەتىنىڭ قوعام ءۇشىن ەرەكشە ماڭىزىن اتاپ ءوتىپ, بۇل سالانى ەلدىڭ تىنىشتىعى مەن قاۋىپسىزدىگىن قامتاماسىز ەتەتىن, ەرلىك پەن جانقيارلىقتى تالاپ ەتەتىن ابىرويلى ميسسيا دەپ اتادى, دەپ حابارلايدى Egemen.kz.
«سىزدەر قىلمىسقا قارسى كۇرەس پەن قوعامدىق ءتارتىپتى ساقتاۋ ءىسىن ومىرلىك ميسسيا رەتىندە تاڭداپ, ادال قىزمەت ەتىپ كەلەسىزدەر. بۇل – قيىندىعى كوپ بولعانىمەن, ەلگە قاجەتتى ءارى ابىرويلى جۇمىس. وسى كۇردەلى جولدى ناعىز وتانشىل ادامدار تاڭدايدى. سىزدەر ءار ازاماتتىڭ جايلى ءومىر سۇرۋىنە, بيزنەستىڭ تۇراقتى دامۋىنا, بالالاردىڭ باقىتتى ءارى الاڭسىز وسۋىنە وراسان زور ۇلەس قوسىپ جۇرسىزدەر», دەدى پرەزيدەنت.
مەملەكەت باسشىسى ءىرى قالالارمەن قاتار, شالعاي اۋىل-ايماقتارداعى قوعامدىق قاۋىپسىزدىكتى ساقتاۋ جولىندا قۇقىق قورعاۋ ورگاندارىنىڭ ەڭبەگىن ەرەكشە اتاپ ءوتتى.
«ەلىمىزدەگى ءىرى قالالارمەن قاتار, شالعاي ەلدى مەكەندەردەگى قوعامدىق قاۋىپسىزدىك – قۇقىق قورعاۋ ورگاندارى قىزمەتكەرلەرىنىڭ تىنىمسىز ەڭبەگىنىڭ ارقاسى. وسىنداي تۇراقتىلىق پەن تىنىشتىقتىڭ ارتىندا زاڭ مەن ءتارتىپ ءۇشىن جاسالعان ەرەن ەرلىك بار. حالقىمىز قۇقىق قورعاۋ ورگاندارى قىزمەتكەرلەرىنىڭ ەرلىگىن باعالايدى, ماقتان تۇتادى, ارقاشاندا قولدايدى. جاقىندا كۇشتىك قۇرىلىمدارىمىز الماتى وبلىسىندا ءىرى ەسىرتكى زەرتحاناسىن جويدى. ماڭعىستاۋ وبلىسىندا ترانسۇلتتىق دەڭگەيدەگى ۇيىمداسقان قىلمىستىق توپ قۇرىقتالدى. سونىڭ ناتيجەسىندە ەسىرتكى بيزنەسىنە مىقتى توسقاۋىل قويىلدى. ارنايى وپەراتسيالارعا قاتىسقان ماماندار جوعارى مەملەكەتتىك ناگرادالارمەن ماراپاتتالدى», دەدى قاسىم-جومارت توقاەۆ.
پرەزيدەنت ەلىمىزدىڭ قاۋىپسىزدىگى جولىندا قىزمەت بابىندا قازا تاپقان ساقشىلاردىڭ ەرلىگىن ەسكە الىپ, ولاردىڭ ەسىمى ءاردايىم حالىق جادىندا ساقتالۋى ءتيىس ەكەنىن ايتتى.
«سىزدەردىڭ كۇندەلىكتى جۇمىستارىڭىز قاۋىپ-قاتەرگە تولى. وكىنىشكە قاراي, تاۋەلسىزدىك جىلدارىندا 842 ازامات قىزمەتتىك مىندەتىن ورىنداۋ كەزىندە قازاعا ۇشىرادى, 4,5 مىڭ ادام جاراقات الدى. بۇگىن ءبىز قازا بولعان ەرلەرىمىزدىڭ جاقىندارىنا ماراپات تاپسىرامىز. ەرجۇرەك ساقشىلاردىڭ ەرلىگى حالىققا جانقيارلىقپەن قىزمەت ەتۋدىڭ ۇلگىسى رەتىندە جۇرتىمىزدىڭ جادىندا ساقتالۋعا ءتيىس», دەدى مەملەكەت باسشىسى.