قازاقستاندا ايەلدەر مەن بالالاردى زورلىق-زومبىلىقتان قورعاۋ – مەملەكەتتىك ساياساتتىڭ باسىم باعىتتارىنىڭ ءبىرى. بۇل تۋرالى مەملەكەت باسشىسى بۇگىن قۇقىق قورعاۋ ورگاندارىنىڭ كەڭەيتىلگەن القا ءماجىلىسى وتىرىسىنداعى سويلەگەن سوزىندە ايتتى, دەپ حابارلايدى Egemen.kz.
«كەلەسى ماڭىزدى مىندەتتىڭ ءبىرى – وتباسىلىق زورلىق-زومبىلىقپەن كۇرەس جانە ايەلدەر مەن بالالاردى قورعاۋ. وسى باعىتتا زاڭنامالىق, ينستيتۋتسيونالدىق تۇرعىدان باتىل قادامدار جاسالۋدا. وتباسىلىق زورلىق-زومبىلىق جاساعانى ءۇشىن بەرىلەتىن جازا ەداۋىر كۇشەيتىلدى. ءبىر جىل بۇرىن ءتيىستى زاڭ قابىلداندى. زاڭعا ەنگىزىلگەن تۇزەتۋلەر مەن باسقا دا شارالار ناقتى ناتيجە بەرە باستادى. ورتاشا جانە اۋىر دەڭگەيدەگى وتباسىلىق-تۇرمىستىق قىلمىس سانى جىل باسىنان بەرى 30 پايىزعا تومەندەدى», دەيدى پرەزيدەنت.
مەملەكەت باسشىسى سوڭعى 5 جىلدا ايەلدەرگە قاتىستى قۇقىق بۇزۋشىلىقتار ەكى ەسەگە ازايعانىن ايتتى.
«ەڭ باستىسى, قازىر قوعامدىق سانا تۇبەگەيلى وزگەرىپ جاتىر. ازاماتتارىمىزدىڭ بويىندا وتباسىنداعى قاتىگەزدىك پەن وزبىرلىققا مۇلدەم توزبەۋشىلىك قاسيەتى قالىپتاسۋدا», دەپ اتاپ ءوتتى.
پرەزيدەنتتىڭ ايتۋىنشا, زارداپ شەككەندەرگە قول ۇشىن بەرەتىن, ال قۇقىق بۇزۋشىلاردى جازعىراتىن قايىرىمدى قوعام ورنىعىپ كەلەدى. سونداي-اق ەلىمىزدە «قازاقستان بالالارى» اتتى ارنايى باعدارلاما ازىرلەنىپ جاتىر. قۇجاتتا وسكەلەڭ ۇرپاقتىڭ مۇددەسىن قورعاۋعا ارنالعان ماڭىزدى تەتىكتەر ۇسىنىلادى.