مەملەكەت باسشىسى قاسىم-جومارت توقاەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ءسوز سويلەدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
بۇگىن ەلىمىزدە پوليتسيا كۇنى مەن مەملەكەتتىك قىزمەتشىلەر كۇنى قاتار اتالىپ ءوتىپ جاتىر. وسىعان وراي مەملەكەت باسشىسى قاسىم-جومارت توقاەۆ ەلىمىزدىڭ قۇقىق قورعاۋ سالاسى مەن مەملەكەتتىك اپپارات قىزمەتكەرلەرىنە ارناپ قۇتتىقتاۋ ءسوز سويلەپ, ولاردىڭ قوعامداعى ماڭىزدى رولىنە توقتالدى.
«بۇگىن ەلىمىزدە – پوليتسيا كۇنى جانە مەملەكەتتىك قىزمەتشى كۇنى اتالىپ وتۋدە. سوندىقتان, الدىمەن, ەلىمىزدەگى پوليتسيا قىزمەتكەرلەرى مەن مەملەكەتتىك قىزمەتشىلەردى كاسىبي مەيرامدارىمەن قۇتتىقتايمىن. مەملەكەتكە قىزمەت ەتۋ – ەڭ قۇرمەتتى ءارى اسا جاۋاپتى مىندەت. سىزدەر زاڭ مەن ءتارتىپتى ساقتاۋعا جانە ازاماتتاردىڭ قۇقىعىن قورعاۋعا زور ۇلەس قوسىپ جۇرسىزدەر. قازىر دۇنيە ءجۇزى الماعايىپ, ب ۇلىڭعىر, ياعني, وتە كۇردەلى كەزەڭدى باستان وتكەرۋدە. وسىنداي قۇبىلمالى ۋاقىتتا قوعامدىق قاۋىپسىزدىكتى ساقتاۋ, زاڭنىڭ مۇلتىكسىز ورىندالۋىن قامتاماسىز ەتۋ – ايرىقشا ماڭىزدى مىندەت», دەدى مەملەكەت باسشىسى.
پرەزيدەنت اتاپ وتكەندەي, قۇقىق قورعاۋ جۇيەسىن جاڭعىرتۋدا جاڭا بۋىننىڭ ورنى ەرەكشە. وسىعان بايلانىستى جيىنعا ارنايى تۇردە ۆەدومستۆولىق وقۋ ورىندارىنىڭ كۋرسانتتارى شاقىرىلعان.
سونىمەن قاتار مەملەكەت باسشىسى ترانسۇلتتىق قىلمىستىق توپتارمەن كۇرەس جولىندا حالىقارالىق ارىپتەستىكتىڭ ماڭىزدىلىعىنا نازار اۋداردى.
«سول سەبەپتى, بۇگىن ءبىز العاش رەت وسىنداي قۇراممەن جينالىپ وتىرمىز. قۇقىق قورعاۋ جۇيەسىندەگى بارلىق جاۋاپتى قۇرىلىمدار جۇمىلا جۇمىس ىستەۋى قاجەت. ەلىمىزدە «زاڭ مەن ءتارتىپتىڭ» قاتاڭ ساقتالۋىنا قوعام وكىلدەرىنىڭ قوسار ۇلەسى دە وراسان زور. قازىر وسى جيىنعا ورتالىق جانە جەرگىلىكتى اتقارۋشى ورگان باسشىلارى, دەپۋتاتتار, ساراپشىلار جانە بەلسەندى ازاماتتار قاتىسىپ وتىر. كۇشتىك قۇرىلىمداردى جاڭعىرتۋ ىسىندە جاڭا بۋىننىڭ اتقاراتىن ءرولى ەرەكشە. سول سەبەپتى, بۇگىنگى باسقوسۋعا اكادەميالاردىڭ كۋرسانتتارى دا ارنايى شاقىرىلدى. ترانسۇلتتىق قىلمىستىق توپتارمەن كۇرەسۋ ءۇشىن حالىقارالىق ىنتىماقتاستىقتى دامىتۋ وتە ماڭىزدى. وسى جەردە بۇگىن شەتەلدىك پوليتسيا اتتاشەلەرى وتىر. قۇقىق قورعاۋ ورگاندارىمەن جۇرگىزىپ جاتقان حالىقارالىق ىنتىماقتاستىق جۇمىسى ءۇشىن سىزدەرگە ەرەكشە ريزاشىلىعىمدى بىلدىرەمىن», دەدى قاسىم-جومارت توقاەۆ.