جاز مەزگىلى – وقۋشىلار ءۇشىن تەك تىنىعۋ ۋاقىتى عانا ەمەس, سونىمەن بىرگە جاڭا اسەرلەر مەن دامۋعا جول اشاتىن ەرەكشە كەزەڭ. وسىنى ەسكەرە وتىرىپ, جامبىل وبلىسىندا بيىلعى جازدا بالالاردىڭ دەمالىسىن ءتيىمدى ءارى قاۋىپسىز ۇيىمداستىرۋعا باسىمدىق بەرىلىپ وتىر, دەپ حابارلايدى Egemen.kz.
2025 جىلى وبلىس بويىنشا 217 757 وقۋشىنىڭ 88,6 پايىزى – ياعني 193 071 بالا جازعى ساۋىقتىرۋ جانە دەمالىس باعدارلامالارىمەن قامتىلادى. بۇل كورسەتكىش بالالاردىڭ الەۋمەتتىك جاعدايى مەن جەكە قاجەتتىلىكتەرىن ەسكەرە وتىرىپ جوسپارلانعان.
بالالارعا ارنالعان دەمالىس ورىندارىنىڭ اۋقىمى كەڭەيگەن. وبلىس اۋماعىندا قالا سىرتىنداعى لاگەرلەردەن باستاپ, مەكتەپ جانىنداعى كۇندىزگى الاڭدارعا دەيىنگى بىرنەشە فورمات جۇمىس ىستەيدى. اتاپ ايتقاندا:
قالا سىرتىنداعى لاگەرلەرگە – 7 673 بالا; مەكتەپ جانىنداعى لاگەرلەرگە – 33 607 بالا; مەكتەپ الاڭدارىنداعى باعدارلامالارعا – 147 271 بالا; كيىز ءۇي مەن شاتىرلى لاگەرلەرگە – 3 505 بالا; رەسپۋبليكالىق لاگەرلەرگە – 315 بالا; اتا-انالار مەن كاسىپوداق قولداۋىمەن – 700 بالا دەمالاتىن بولادى.«وبلىس اۋماعىنداعى 12 قالا سىرتىنداعى لاگەردىڭ 7-ەۋى بيىلعى ماۋسىمدا جۇمىسىن باستاپ كەتتى. ونىڭ ىشىندە جىل بويى قىزمەت كورسەتەتىن «مولدىر بۇلاق» وقۋ-ساۋىقتىرۋ ورتالىعى, سونداي-اق ماۋسىمدىق «بالاۋسا», «جۇلدىز», «جۇرىندىساي» مەملەكەتتىك لاگەرلەرى جانە «بولاشاق», «بەرىكقارا», «تاۋ سامالى» جەكەمەنشىك لاگەرلەرى بالالاردى قابىلداپ, دەمالىستارىن مازمۇندى وتكىزۋگە جاعداي جاسالىپ جاتىر», دەلىنگەن حابارلامادا.
ايتا كەتەيىك, بۇل لاگەرلەردە نەگىزىنەن كوپ بالالى, از قامتىلعان وتباسىلاردىڭ بالالارى, سونداي-اق جەتىم جانە اتا-اناسىنىڭ قامقورلىعىنسىز قالعان بالالار قامتىلعان. جازعى ماۋسىمدا قالا سىرتىنداعى لاگەرلەردە 7 673 بالا تىنىعىپ جاتىر.
«2025 جىلدىڭ 2 ماۋسىمىنان باستاپ 407 مەكتەپ جانىنداعى لاگەر ءوز جۇمىسىن باستادى. مۇندا 33 607 وقۋشى قامتىلعان. بۇل لاگەرلەر الەۋمەتتىك كومەكتى قاجەت ەتەتىن وتباسىلاردان شىققان بالالارعا قولجەتىمدى ءارى ۇيگە جاقىن ورنالاسقانىمەن ءتيىمدى.ءبىلىم سالاسىنداعى جەتىستىكتەر نازاردان تىس قالعان جوق. وقۋ ۇزدىكتەرى مەن ءتۇرلى جارىستاردىڭ جەڭىمپازدارى قاتارىنان 793 بالا «قازاقستان حالقى» قورىنىڭ دەمەۋشىلىگىمەن قالا سىرتىنداعى لاگەرلەردە دەمالادى. سونىمەن قاتار:
295 بالا – رەسپۋبليكالىق جانە وبلىستىق بايقاۋلار جەڭىمپازدارى رەتىندە «بالداۋرەن» رەسپۋبليكالىق وقۋ-ساۋىقتىرۋ ورتالىعىنا جولداندى 20 بالا – كوپ بالالى جانە از قامتىلعان وتباسىلاردان شىققان وقۋشىلار الماتى قالاسىنداعى «بوبەك» ساۋىقتىرۋ ورتالىعىندا دەمالۋعا مۇمكىندىك الدى», دەلىنگەن حابارلامادا.سونىمەن قاتار جەرگىلىكتى جەرلەردەگى تاريحي جانە مادەني ورىندارعا 21 مىڭنان استام وقۋشىنىڭ ەكسكۋرسياسى ۇيىمداستىرىلىپ, بالالاردىڭ تانىم كوكجيەگى كەڭەيىپ, تۋعان جەرگە دەگەن سۇيىسپەنشىلىگى ارتا تۇسكەن.
جاز مەزگىلىندە بالالاردىڭ قاۋىپسىزدىگىن ساقتاۋ – اسا ماڭىزدى ماسەلە. وسى ماقساتتا «2025 جىلعى سۋعا شومىلۋ كەزەڭىندە قاۋىپسىزدىك شارالارى تۋرالى» ۆەدومستۆوارالىق جوسپار بەكىتىلىپ, بارلىق لاگەرلەردە الدىن الۋ جۇمىستارى جۇيەلى جۇرگىزىلىپ جاتىر. اتاپ ايتقاندا:
توتەنشە جاعدايلار دەپارتامەنتىنىڭ نۇسقاۋشىلارى ارنايى كۋرستاردان ءوتىپ, سۋ ايدىندارىندا قاۋىپسىزدىكتى قامتاماسىز ەتۋ; سانيتاريالىق-ەپيدەميولوگيالىق باقىلاۋ دەپارتامەنتى لاگەر باسشىلارى مەن مەديتسينا قىزمەتكەرلەرىنە ارنالعان سەمينار-كەڭەستەر ۇيىمداستىردى; مەكتەپتەردە اتا-انالار جينالىستارى وتكىزىلىپ, چاتتار ارقىلى قاۋىپسىزدىككە قاتىستى جادىنامالار تاراتىلدى.«جامبىل وبلىسىندا بالالاردىڭ جازعى دەمالىسىن ۇيىمداستىرۋ – تەك ۋاقىتتى ءتيىمدى وتكىزۋ ەمەس, سونىمەن قاتار ولاردىڭ ومىرلىك تاجىريبە جيناپ, دەنساۋلىقتارىن نىعايتۋىنا, جاڭا ءبىلىم الۋىنا جانە قاۋىپسىز ورتادا تىنىعۋىنا باعىتتالعان ماڭىزدى شارالار كەشەنى. بۇل باعىتتاعى جۇمىستار وبلىس باسشىلىعى مەن سالا ماماندارىنىڭ ۇدايى نازارىندا. جاز – تەك تىنىعۋ كەزەڭى عانا ەمەس, جاڭا مۇمكىندىكتەرگە جول اشاتىن ۋاقىت. سول سەبەپتى دە, بالالارعا لايىقتى دەمالىس سىيلاۋ – بارشا قوعامنىڭ ورتاق مىندەتى», دەلىنگەن حابارلامادا.