قازاق ونكولوگيا ينستيتۋتىنىڭ بازاسىندا جانە ەلىمىزدىڭ 20 وڭىرلىك ونكولوگيا ورتالىقتارىندا باس, مويىن جانە قۋىق استى بەزى وبىرىن انىقتاۋ بويىنشا اشىق ەسىك كۇندەرى ءوتتى, دەپ جازادى Egemen.kz.
بۇل كۇنى بارلىق وڭىرلەردىڭ تۇرعىندارى ونكوۋرولوگتاردان, ونكووتورينولارينگولوگتار مەن تەراپەۆتتەردەن تەگىن كونسۋلتاتسيا جانە تەراپەۆتتىڭ جولداماسىنسىز جانە ءمامس-ءتىڭ بولۋىنا قاراماستان دياگنوستيكالىق ەمشارالاردى الا الدى.
قاتىسۋ ءۇشىن تەك جەكە كۋالىك قاجەت بولدى.
* 600-دەن استام ادام مامانداردان كونسۋلتاتسيا الىپ, قاراپ-تەكسەرۋدەن ءوتتى.
* 250-دەن استام دياگنوستيكالىق ەمشارا, سونىڭ ىشىندە ۋلترادىبىستىق, پسA, كت تالداۋى جۇرگىزىلدى.
* 26 پاتسيەنتتە قاتەرلى ىسىككە كۇدىك انىقتالدى.
* 51 ادامعا قاتەرلى ىسىككە دەيىنگى جاعداي انىقتالدى.
* 300-دەن استام پاتسيەنتتە باقىلاۋدى جانە ەمدەۋدى قاجەت ەتەتىن وزگە دە اۋرۋلار انىقتالدى.
اكتسيانىڭ شەڭبەرىندە دارىگەرلەر اۋىز قۋىسىن, باس جانە مويىن تەرىسىن, قالقانشا جانە قۋىق استى بەزدەرىن ۆيزۋالدى قاراپ-تەكسەرۋدەن وتكىزىپ, ونكولوگيالىق اۋرۋلاردىڭ الدىن الۋ جانە زاماناۋي ەمدەۋ ادىستەرى بويىنشا كونسۋلتاتسيا بەردى. قاتەرلى ىسىككە كۇدىك بار جانە وعان دەيىنگى پاتسيەنتتەرگە قوسىمشا زەرتتەپ-قاراۋعا جولداما بەرىلدى.
باس جانە مويىن وبىرى الەمدە تارالۋى بويىنشا 6-شى ورىندا ەكەنىن جانە جىل سايىن 700 مىڭنان استام ادامنىڭ ءومىرىن قيعانىن ەستەرىڭىزگە سالا كەتەيىك. قازاقستاندا جىل سايىن وسى اۋرۋدىڭ 1 700-گە جۋىق جاڭا جاعدايى تىركەلەدى.
باس جانە مويىن وبىرىنىڭ قاۋىپ فاكتورلارىنىڭ قاتارىنا تەمەكى شەگۋ, الكوگولدى تۇتىنۋ, ۆيرۋستىق ينفەكتسيالار جانە زياندى حيميالىق زاتتاردىڭ اسەرى جاتادى.
50 جاستان اسقان ەر ادامداردا ونكولوگيانىڭ ەڭ كوپ تارالعان تۇرلەرىنىڭ ءبىرى — قۋىق استى بەزى وبىرىنىڭ كوبەيۋى ەرەكشە الاڭداۋشىلىق تۋدىرادى. جىل سايىن اۋرۋدىڭ 1600-دەن استام جاڭا جاعدايى انىقتالادى.
قازاق ونكولوگيا ينستيتۋتىندا جىل سايىن 1200-دەن استام ەمدەۋگە جاتقىزۋ جۇرگىزىلەدى جانە باس پەن مويىننىڭ ىسىكتەرىنە بايلانىستى 800 وپەراتسيا جاسالادى.