KAZMEDIA HOLDING مەدياكومپانياسى مەن The New York Times Licensing Group اراسىنداعى ستراتەگيالىق ارىپتەستىك اياسىندا «Turning Points» جاھاندىق ساراپتامالىق جۋرنالى ەندى العاش رەت قازاق جانە ورىس تىلدەرىندە جارىق كورەدى. بۇل – حالىقارالىق مەديا كەڭىستىكتە ەلىمىزدىڭ كوزقاراسىن كەڭىنەن تانىتۋعا جول اشاتىن ماڭىزدى باستاما, دەپ جازادى Egemen.kz.
Turning Points – الەمنىڭ ءتۇرلى ەلدەرىندەگى تانىمال ويشىلدار مەن بەدەلدى ساراپشىلاردىڭ بۇگىنگى زاماننىڭ بەتالىسى مەن ەرتەڭگى كۇننىڭ باعىتىنا قاتىستى پىكىر-تولعامدارىن ۇسىناتىن جىل سايىنعى ارنايى باسىلىم. بيزنەس, تەحنولوگيا, قوعام, ءبىلىم جانە ەكولوگيا تاقىرىپتارىن قامتيتىن بۇل جوبا جاھاندىق ترەندتەردى سارالاپ قانا قويماي, ولاردىڭ وڭىرلىك كورىنىستەرىنە دە ۇڭىلەدى.
ەلىمىزدە باسىلىمدى جارىققا شىعارۋ تۋرالى ۇزاقمەرزىمدى ليتسەنزيالىق كەلىسىمگە KAZMEDIA HOLDING كومپانياسى قول قويىپ وتىر. كومپانيانىڭ باس ديرەكتورى ەركىن جاقىپوۆ بۇل ارىپتەستىكتى ەلىمىز ءۇشىن جاڭا مەديامادەنيەتتىڭ باستاۋى دەپ باعالايدى.
«KAZMEDIA HOLDING وسىنداي بىرەگەي رەداكتسيالىق پلاتفورمانى ەلىمىزگە اكەلگەنىن ماقتان تۇتادى. بۇل ارىپتەستىك – قوعامدىق پىكىر الماسۋ مادەنيەتىن جاڭا دەڭگەيگە كوتەرۋدى, قازاقتىلدى اۋديتوريانى جاھاندىق تالقىعا تارتۋدى جانە جەرگىلىكتى كوزقاراس پەن پىكىرلەردى قامتي وتىرىپ, قازاقستاندى حالىقارالىق ديالوگتىڭ بەل ورتاسىنا شىعارۋدى كوزدەيتىن ماڭىزدى قادام», دەدى ول.
جۋرنالدىڭ العاشقى سانى 2025 جىلدىڭ سوڭىندا جارىق كورەدى دەپ جوسپارلانىپ وتىر. العاشقى شىعارىلىمدا 2026 جىلى الەمدىك دەڭگەيدە وزەكتى بولۋعا ءتيىس ترەندتەرگە شولۋ جاسالىپ, وتاندىق وقىرمان نازارىنا ۇسىنىلماق. سونىمەن قاتار, بۇل ءنومىر بيزنەس, تەحنولوگيا, ءبىلىم, كوشباسشىلىق جانە ەكولوگيا سياقتى باعىتتاردى قامتيدى.
اتالعان وقيعانى تانىستىرۋ ءۇشىن Turning Points رۋحىنا ساي ارنايى فورۋم وتكىزۋ جوسپارلانىپ وتىر. اۋقىمدى پىكىرتالاس الاڭىنا قازاقستاننان جانە شەتەلدەن جەتەكشى ساراپشىلار, جۋرناليستەر مەن مەديا ساراپشىلار قاتىسادى دەپ كۇتىلۋدە.
New York Times Licensing Group جاھاندىق ليتسەنزيالاۋ جانە باسپا يننوۆاتسيالارى ءبولىمىنىڭ باسشىسى مايكل گرينسپون قازاقستانمەن ارىپتەستىكتى جوعارى باعالايتىنىن جەتكىزدى:
«Turning Points جوباسى اياسىندا KAZMEDIA HOLDING-پەن جۇمىس ىستەۋ ءبىز ءۇشىن قۋانىشتى جاڭالىق. ءبىز ءتۇرلى ماراپاتقا يە بولعان جۋرناليستيكامىزدى جاڭا اۋديتورياعا جەتكىزۋ مۇمكىندىكتەرىن ۇنەمى ىزدەيمىز. بۇل سەرىكتەستىك ءبىزدىڭ جاھاندىق وقىرماندار بازامىزدى كەڭەيتۋگە جول اشادى».
KAZMEDIA HOLDING بۇعان دەيىن National Geographic جۋرنالىنىڭ قازاق تىلىندەگى ەكسكليۋزيۆتى نۇسقاسىن جارىققا شىعارۋ ارقىلى ءوزىن جوعارى ساپالى كونتەنت ۇسىنۋشى رەتىندە تانىتقان ەدى. سونىمەن قاتار, كومپانيا 2025 جىلى Harvard Business Publishing ۇيىمىمەن كەلىسىم جاساپ, Harvard ManageMentor تسيفرلىق وقىتۋ پلاتفورماسىن قازاقستان, وزبەكستان جانە قىرعىزستان نارىعىنا ەنگىزۋدى قولعا الدى.
ال 170 جىلدان استام تاريحى بار The New York Times – پۋليتتسەر سىيلىعىن ەڭ كوپ يەلەنگەن, تاۋەلسىز جۋرناليستيكاسى مەن تەرەڭ تالداۋعا نەگىزدەلگەن ساراپتامالىق ماقالالارىمەن تانىلعان, الەمدەگى ەڭ ىقپالدى باسىلىمداردىڭ ءبىرى. ونىڭ Turning Points باسىلىمى – قوعامداعى ەڭ وزەكتى سۇراقتارعا جاۋاپ ىزدەيتىن, الەمدىك دەڭگەيدەگى پىكىر كوشىن قالىپتاستىراتىن ماڭىزدى مەديا الاڭ.
ەلىمىزدەگى وقىرمان ءۇشىن مۇنداي جوبانىڭ اشىلۋى – تەك جاڭا فورماتتاعى مازمۇنمەن تانىسۋ عانا ەمەس, ءوز كوزقاراسىن حالىقارالىق دەڭگەيدە تانىتىپ, پىكىر الماسۋعا قاتىسۋدىڭ دا بىرەگەي مۇمكىندىگى بولماق.