پرەمەر-مينيستر ولجاس بەكتەنوۆ قىتاي حالىق رەسپۋبليكاسىمەن ىنتىماقتاستىق ماسەلەلەرىنە ارنالعان كەڭەس وتكىزدى. جيىن بارىسىندا مەملەكەت باسشىسى قاسىم-جومارت توقاەۆ پەن قحر توراعاسى سي ءتسزينپيننىڭ سوڭعى ساپارلارىندا قول جەتكىزىلگەن ۋاعدالاستىقتاردى ەسكەرە وتىرىپ, قازاقستان مەن قىتاي اراسىنداعى ينۆەستيتسيالىق جوبالاردى ءتيىمدى ىسكە اسىرۋ ماسەلەلەرى قارالدى, دەپ حابارلايدى Egemen.kz.
سىرتقى ىستەر مينيسترلىگىنىڭ مالىمەتىنشە, قازىرگى ۋاقىتتا قازاقستاندا قىتاي كاپيتالىنىڭ قاتىسۋىمەن 50 مىڭعا جۋىق جۇمىس ورنى اشىلىپ, جالپى سوماسى $66,4 ملرد بولاتىن 224 يندۋستريالىق جوبا جۇزەگە اسىرىلىپ جاتىر. قحر قازاقستان ەكونوميكاسىنداعى ءىرى بەس ينۆەستوردىڭ قاتارىنا كىرەدى – 2005 جىلدان بەرى تارتىلعان ينۆەستيتسيا كولەمى $26,4 ملرد-تى قۇراعان.
كەڭەس بارىسىندا پرەمەر-مينيستر سي ءتسزينپيننىڭ قازاقستانعا جاساعان ساپارى ەكى ەل اراسىنداعى ەكونوميكالىق سەرىكتەستىكتى جاڭا دەڭگەيگە كوتەرگەنىن اتاپ ءوتتى. اتاپ ايتقاندا, استانادا وتكەن «ورتالىق ازيا – قىتاي» فورۋمىنىڭ شەڭبەرىندە $24 ملرد-قا جۋىق 58 كوممەرتسيالىق كەلىسىمگە قول قويىلدى.
«مەملەكەت باسشىسى 2029 جىلعا دەيىن كەمىندە $150 ملرد كولەمىندە شەتەلدىك ينۆەستيتسيا تارتۋ مىندەتىن قويدى. وسى تۇرعىدا جەتەكشى ەكونوميكالىق دەرجاۆالاردىڭ ءبىرى جانە ءبىزدىڭ نەگىزگى ينۆەستيتسيالىق سەرىكتەسىمىز قىتاي ەلىمەن تولىققاندى كووپەراتسيانى ودان ءارى تەرەڭدەتۋ – قازاقستاننىڭ اسا ماڭىزدى باسىمدىعى. سوندىقتان ينۆەستيتسيالار كولەمىن ارتتىرۋ, جاڭا بىرلەسكەن جوبالاردى ىسكە قوسۋ, اسىرەسە شيكىزاتتىق ەمەس ءارى ەكسپورتقا باعدارلانعان ونىمدەردى ءوندىرۋ بويىنشا جۇيەلى شارالار قاجەت. مەملەكەت باسشىسىنىڭ شاقىرۋى بويىنشا قحر توراعاسىنىڭ قازاقستانعا تاياۋدا جاساعان كەزەكتى ساپارى ەكى ەل اراسىنداعى ەكونوميكالىق ارىپتەستىكتىڭ جوعارى دەڭگەيىن دالەلدەپ, ودان ءارى نىعايتا ءتۇستى. ءاربىر جوبانىڭ جۇزەگە اسىرىلۋى مەنىڭ تىكەلەي باقىلاۋىمدا بولادى, تولىق قولداۋ كورسەتىلەدى», دەدى ولجاس بەكتەنوۆ.
ۇكىمەت باسشىسى جاڭا جوبالار ءالى قولعا الىنباعان وڭىرلەرگە, ونىىڭ ىشىندە اباي, شىعىس قازاقستان جانە باتىس قازاقستان وبلىستارىنا جۇمىستى جانداندىرۋ قاجەتتىگىن اتاپ ءوتتى. ءتيىستى ءوڭىر باسشىلارىنا قىتايلىق سەرىكتەستەرمەن ءوزارا ءىس-قيمىلدى كۇشەيتىپ, ناقتى ۇسىنىستار ازىرلەۋ تاپسىرىلدى.
سونىمەن قاتار, ايماقتاردىڭ قىتاي پروۆينتسيالارىمەن بايلانىسىن كەڭەيتۋ ءۇشىن وڭىرلىك دەلەگاتسيالاردىڭ ساپارلارىن بەلسەندى جۇرگىزۋ قاجەتتىگىنە نازار اۋدارىلدى. استانا, الماتى, قىزىلوردا جانە تۇركىستان وبلىستارىنىڭ باستامالارى مەن قول جەتكىزگەن ناتيجەلەرى وزگە وڭىرلەرگە ۇلگى رەتىندە كورسەتىلدى.
مىسالى, الماتى وبلىسىندا «جاسىل» ەنەرگەتيكا, لوگيستيكا, اگروونەركاسىپ جانە ونەركاسىپ سالالارىندا جالپى قۇنى $6 ملرد-تان اساتىن جەتى كەلىسىمگە قول قويىلعان. ال استانا قالاسى, قىزىلوردا جانە تۇركىستان وبلىستارى ينفراقۇرىلىم, اگروونەركاسىپ جانە ونەركاسىپ سالالارىندا باستامالار ۇسىنعان.
كەڭەس قورىتىندىسى بويىنشا پرەمەر-مينيستر مەملەكەتتىك جانە جەرگىلىكتى اتقارۋشى ورگاندارعا قول قويىلعان كەلىسىمدەردى ءىس جۇزىندە جۇزەگە اسىرۋدى, بارلىق جوبالار بويىنشا جۇيەلى سۇيەمەلدەۋ مەن ۇيلەستىرۋدى قامتاماسىز ەتۋدى تاپسىردى.