اۆياتسيالىق بيلىك باسشىلارىنىڭ كەڭەسى اياسىندا قازاقستان مەن فرانتسيا ازاماتتىق اۆياتسيا سالاسىنداعى ارىپتەستىكتى جاڭا دەڭگەيگە كوتەردى. يندۋستريا جانە قۇرىلىس مينيسترلىگى ازاماتتىق اۆياتسيا كوميتەتىنىڭ توراعاسى سالتانات تومپيەۆا مەن فرانتسيانىڭ ازاماتتىق اۆياتسيا باس باسقارماسىنىڭ (DGAC) باس ديرەكتورى دامەن كاز ىنتىماقتاستىق تۋرالى ماڭىزدى كەلىسىمگە قول قويدى, دەپ جازادى Egemen.kz.
بۇل قۇجات – ازاماتتىق اۆياتسيا سالاسىنداعى ءوزارا بايلانىستاردى جۇيەلى تۇردە دامىتۋعا باعىتتالعان ناقتى قادام. ەكى ەل اراسىنداعى جاڭا كەلىسىم ICAO – حالىقارالىق ازاماتتىق اۆياتسيا ۇيىمىنىڭ ستاندارتتارى مەن تاجىريبەلەرىن ەنگىزۋگە, سالاداعى جاھاندىق ۇردىستەرگە ورتاق ءۇن قوسۋعا جول اشادى.
كەلىسىمگە سايكەس, تاراپتار ۇشۋ قاۋىپسىزدىگىن قامتاماسىز ەتۋ, اۋە قوزعالىسى مەن كەڭىستىگىن ءتيىمدى باسقارۋ, قورشاعان ورتانى قورعاۋ, سونىڭ ىشىندە ەكولوگيالىق تازا اۆياوتىن تۇرلەرىن ەنگىزۋ باعىتتارىندا بىرلەسىپ جۇمىس ىستەۋگە ۋاعدالاستى. سونىمەن قاتار اۋەجاي ينفراقۇرىلىمىن جەتىلدىرۋ, ەكونوميكالىق رەتتەۋ تەتىكتەرىن دامىتۋ, زاڭنامالىق تاجىريبە الماسۋ مەن كادرلاردى كاسىبي دايارلاۋ – باستى نازاردا.
ماڭىزدىسى – قۇجات تەك نيەت پەن مىندەتتەمەلەر جيىنتىعى ەمەس. ەكى ەل ماماندارى ناقتى جوبالار اياسىندا اقپارات جانە تاجىريبە الماسىپ, وقىتۋ باعدارلامالارىن بىرلەسە ازىرلەيدى, بىرلەسكەن سەمينارلار مەن كونفەرەنتسيالار ۇيىمداستىرادى. سونداي-اق ازاماتتىق اۆياتسيا سالاسىنداعى كاسىبي كادرلارمەن الماسۋ دا جوسپارلانىپ وتىر.
بۇل كەلىسىم – تەك تەحنيكالىق سەرىكتەستىك ەمەس, سونىمەن قاتار سەنىمدى ارىپتەستىككە نەگىزدەلگەن, بولاشاققا باعىتتالعان ستراتەگيالىق ديالوگ. ال اۆياتسيا – ەل مەن ەلدى, مادەنيەت پەن نارىقتى جاقىنداستىراتىن التىن كوپىر.