كەشە ەلوردا اكىمدىگىندە جەڭىستىڭ 70 جىلدىعىنا وراي ۇلى وتان سوعىسى ارداگەرلەرى مەن تىل ەڭبەككەرلەرىن قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ ءراسىمى ءوتتى.
مەملەكەت باسشىسى نۇرسۇلتان نازارباەۆتىڭ جارلىعىمەن استانا قالاسىندا تۇراتىن ءبىر توپ ۇلى وتان سوعىسى ارداگەرلەرى مەن ەڭبەككەرلەرى مەملەكەتتىك ناگرادالارمەن ماراپاتتالدى. استانا قالاسىنىڭ اكىمى ادىلبەك جاقسىبەكوۆ ەلباسى اتىنان مەملەكەت الدىنداعى ەرەن ەڭبەگى, بەلسەندى قوعامدىق قىزمەتى ءۇشىن جانە ۇلى وتان سوعىسىنداعى جەڭىستىڭ 70 جىلدىعىنىڭ قۇرمەتىنە سوعىس ارداگەرى شاعيلا قۇسايىنوۆاعا «پاراسات» وردەنىن, سوعىس ارداگەرلەرى تەزەكپاي ءابدىراحمانوۆقا, قادان بەكەنوۆكە, ۆلاديمير كالسينگە, ماريا پولتوراتسكاياعا, «ارداگەرلەر ۇيىمى» رقب استانا قالاسىنداعى بولىمشەسىنىڭ توراعاسى امانگەلدى سىزدىقوۆقا «قۇرمەت» وردەنىن تاپسىردى. سوعىس ارداگەرلەرى بايمۇحان ءابىلوۆ, باقتىباي المابەكوۆ, الەكساندر مورۋنوۆ, ءشارىپ راحىمجاروۆ, ەڭبەك ارداگەرى قالي مۇقاتاەۆ, «ارداگەرلەر ۇيىمى» رقب استانا قالاسىنداعى بولىمشەسى توراعاسىنىڭ ورىنباسارى ەسبولات دۇيسەنوۆ «ەرەن ەڭبەگى ءۇشىن» مەدالدارىمەن ماراپاتتالدى.
– سىزدەردى كەلە جاتقان ايتۋلى مەرەكە – ۇلى جەڭىستىڭ 70 جىلدىعىمەن قۇتتىقتايمىن. جەڭىس كۇنى – ءبىز ەرەكشە تولقىنىسپەن قارسى الاتىن مەرەكەلەردىڭ ءبىرى. بۇل مەرەكە ءبىزدى بىرىكتىرىپ قانا قويماي, سىزدەرگە – جەڭىمپاز بۋىنعا ەلىكتەۋگە شاقىرادى, – دەدى اكىم.
سونىمەن قاتار, سوعىس ارداگەرلەرى سيحىمباي مامىروۆ پەن جانياز شالبولوۆقا قازاقستان رەسپۋبليكاسىنىڭ قۇرمەت گراموتالارى تابىستالدى.
– سىزدەردىڭ ومىرلەرىڭىز ەرەن ەرلىككە, قاھارماندىققا جانە تاباندىلىققا تولى. سوعىستىڭ اۋىر زاردابىن ارقالاپ وتتىڭىزدەر. سوعىس جىلدارىنان كەيىن مەملەكەتتى جانداندىرۋعا قاتىستىڭىزدار. سىزدەردىڭ ەرلىكتەرىڭىز ءبىز ءۇشىن ارقاشان ۇلگى بولىپ قالادى. سىزدەرگە دەنساۋلىق پەن جاقسىلىق, وتباسىلارىڭىزعا باقىت تىلەيمىن! – دەدى ادىلبەك جاقسىبەكوۆ.
«ەگەمەن-اقپارات».