ورتالىق مەملەكەتتىك كينو-فوتوقۇجاتتار مەن دىبىس جازبالارى ءارحيۆىنىڭ قىزمەتكەرلەرى ليتۆا رەسپۋبليكاسىندا جۇرگىزگەن عىلىمي زەرتتەۋ جۇمىستارى كەزىندە ەلىمىزدىڭ تاريحى مەن مادەنيەتىنە قاتىستى دەرەكتەر انىقتادى.
انىقتالعان قۇجاتتار قاتارىندا 1975 جىلى ۆيلنيۋس قالاسىندا وتكەن قازاق كينوسىنىڭ كۇندەرى اياسىندا ش.ايمانوۆ اتىنداعى «قازاقفيلم» كينوستۋدياسى دەلەگاتسياسىنىڭ ليتۆاعا ساپارى, قازاق كسر-ءنىڭ حالىق ءارتىسى نۇرمۇحان ءجانتورين مەن قازاق كسر-ءنىڭ اباي اتىنداعى مەملەكەتتىك سىيلىعىنىڭ لاۋرەاتى, رەجيسسەر سۇلتان قوجىقوۆتىڭ ليتۆالىقتارمەن كەزدەسۋلەرى تۋرالى دەرەكتى ماتەريالدار بار.
سونداي-اق بۇرىنعى كوكشەتاۋ وبلىسىنداعى تىڭ يگەرۋ جۇمىستارىنا ليتۆالىق مامانداردىڭ قاتىسقانى تۋرالى دا قۇندى مالىمەتتەر تابىلدى. اتاپ ايتقاندا, ولاردىڭ مەكتەپ جانىنداعى لاگەرلەردە, مەديتسينا پۋنكتتەرىندە, قۇرىلىس سالاسىندا ەڭبەك ەتكەنى جانە قازاق حالقىنىڭ سالت-داستۇرىمەن تانىسقانى جونىندەگى قۇندى دەرەكتەر كەزدەسەدى.
زەرتتەۋ جۇمىستارىن ورتالىق مەملەكەتتىك كينو-فوتوقۇجاتتار مەن دىبىس جازبالارى ءارحيۆى ديرەكتورىنىڭ ورىنباسارى, تاريح عىلىمدارىنىڭ كانديداتى ساۋلە ساتاەۆا جۇرگىزىپ, ۆيلنيۋس, كاۋناس, كلايپەدا قالالارىنداعى ورتالىق مەملەكەتتىك ارحيۆتەرىندە بولدى.
ساپار بارىسىندا ايماقتىق ارحيۆ باسشىلارىمەن كەزدەسۋلەر ءوتىپ, ەكىجاقتى ىنتىماقتاستىق ماسەلەلەرى تالقىلاندى. ناتيجەسىندە, XIX عاسىردىڭ سوڭى مەن XX عاسىردىڭ باسىنداعى قازاق جانە ليتۆالىق ايەلدەر بەينەسىنە ارنالعان فوتوكورمە ۇيىمداستىرۋ جونىندە كەلىسىم جاسالدى.