«AMANAT» پارتياسىنىڭ قابىلداۋىندا 100-دەن استام تۇرعىن ءوز ماسەلەسىن جەتكىزدى, دەپ حابارلايدى Egemen.kz.
قابىلداۋ قالا تۇرعىندارىنا بارىنشا ىڭعايلى بولۋى ءۇشىن حالىققا قىزمەت كورسەتۋ ورتالىعىنىڭ جانىندا ۇيىمداستىرىلدى. ازاماتتارمەن كەزدەسۋگە پارتيا مۇشەلەرىمەن قاتار, وبلىستىق باسقارمالار, قۇقىق قورعاۋ ورگاندارى, زاڭگەرلەر مەن ادۆوكاتتار قاتىستى.
ءىس-شارا بارىسىندا تۇرعىن ءۇي-كوممۋنالدىق شارۋاشىلىعى, ينفراقۇرىلىمنىڭ توزۋى, جەر تەلىمىن راسىمدەۋ, الەۋمەتتىك كومەك, قۇقىقتىق كەڭەس پەن ەڭبەك قاتىناستارىنا قاتىستى سۇراقتار ءجيى قويىلدى. كەيبىر ازاماتتار كوممۋنالدىق تولەمدەر مەن ءۇي سالۋعا بايلانىستى ماسەلەلەرىن كوتەرسە, ەندى ءبىرى اليمەنت ءوندىرىپ الۋ, مۇراگەرلىك جانە ەڭبەك داۋلارى بويىنشا زاڭگەرلىك كەڭەس الدى.
قابىلداۋدا كوپتەن بەرى قوعامدا تالقىلانىپ كەلە جاتقان ماسەلەلەردىڭ ءبىرى – اۋعان سوعىسىنا قاتىسقان ازاماتتاردىڭ الەۋمەتتىك مارتەبەسى دە ءسوز بولدى. الماتى وبلىستىق ارداگەرلەر كەڭەسىنىڭ توراعاسى قانات مولدابەرگەنوۆ بۇل سۇراق بىرنەشە رەت مينيسترلىككە جەتكىزىلگەنىمەن, ناقتى شەشىم قابىلدانباعانىن اتاپ ءوتتى.
«اۋعان سوعىسىنا قاتىسقان ارداگەرلەر 1995 جىلعى زاڭ بويىنشا ۇلى وتان سوعىسى ارداگەرلەرىنە تەڭەستىرىلگەن بولاتىن. بىراق 2010 جىلدان باستاپ بۇل مارتەبەدەن ايىرىلدىق. سونىڭ سالدارىنان مەديتسينالىق كومەك, تۇرعىن ءۇي, قوعامدىق كولىكتەگى جەڭىلدىكتەر توقتادى. ءبىز مارتەبەمىزدى جانە ءتيىستى الەۋمەتتىك قولداۋلاردى قايتارۋدى تالاپ ەتەمىز», – دەدى قانات مولدابەرگەنوۆ.
بۇل ماسەلەگە قاتىستى پارتيا ءوز ۇستانىمىن ءبىلدىردى. «AMANAT» پارتياسى ورتالىق اپپاراتىنىڭ قوعامدىق قابىلداۋ بولمەسىنىڭ مەڭگەرۋشىسى ءاليا سادىرباەۆا ارداگەرلەر كوتەرگەن سۇراقتىڭ ەل اۋماعىنداعى بىرنەشە وڭىردە قايتالانىپ وتىرعانىن ايتىپ, ونى ۇكىمەت دەڭگەيىندە قاراۋعا جول اشىلاتىنىن جەتكىزدى.
«ارداگەر مارتەبەسىنە قاتىستى ۇسىنىستار بىرنەشە وڭىردە جۇيەلى تۇردە كوتەرىلۋ ۇستىندە. بۇل – قوعام ءۇشىن ماڭىزدى ماسەلە. سوندىقتان ءبىز ونى نازاردان تىس قالدىرمايمىز. ءماجىلىس دەپۋتاتتارىمەن بىرلەسىپ, پرەمەر-ءمينيستردىڭ ورىنباسارىنا دەيىن جەتكىزۋگە نيەتتىمىز. بۇل – ازاماتتاردىڭ ءۇنىن جوعارى دەڭگەيگە جەتكىزۋدىڭ ناقتى جولى», – دەدى ءاليا سادىرباەۆا.
قوعامدىق قابىلداۋدا تاعى ءبىر وزەكتى تاقىرىپ – بالالاردىڭ ادەبي تىلدەن الىستاۋى جانە كوركەم ادەبيەتكە قىزىعۋشىلىعىنىڭ تومەندەۋى بولدى. قالا تۇرعىنى ابزال نۇسقاباي بۇل قۇبىلىستىڭ تەك ءبىلىم ساپاسىنا عانا ەمەس, ۇلتتىڭ مادەني نەگىزىنە دە اسەر ەتەتىنىن ايتىپ, ناقتى ۇسىنىستارىن ورتاعا سالدى. ونىڭ سوزىنشە, وقۋشىلاردىڭ كوپشىلىگى گادجەتكە تاۋەلدى, ال كوركەم ادەبيەت وقۋ, جاتتاۋ جانە مازمۇنداۋ سياقتى داعدىلار مەكتەپتە جۇيەلى تۇردە قالىپتاسپاعان.
«كەزىندە ءبىز توقسان سايىن كەمىندە ءبىر كىتاپ وقىپ, شىعارماشىلىق ەسەپ تاپسىراتىنبىز. جازدا دا, قىستا دا تاقپاق جاتتاپ, مانەرلەپ سويلەۋگە ماشىقتاندىق. بۇل – ءتىل بايلىعىمىزعا, ەستە ساقتاۋ قابىلەتىمىزگە, ويلاۋ جۇيەمىزگە ۇلكەن اسەر ەتتى. قازىر مۇنداي تاجىريبە جۇيەلى تۇردە جۇرگىزىلمەيدى», – دەدى ول.
ابزال نۇسقابايدىڭ پىكىرىنشە, ءار سىنىپتا اپتاسىنا ءبىر رەت وقۋشىلاردان جاتتاعان تاقپاقتارىن ايتۋ, دەمالىسقا ارنايى كىتاپ ءتىزىمىن بەرۋ جانە ءۇي تاپسىرماسىنا ەرتەگى مازمۇنىن ايتۋ سياقتى ەلەمەنتتەر وقۋ پروتسەسىنە قايتا ەنگىزىلۋى قاجەت. بۇل باستاما بارلىق مەكتەپتەرگە ورتاق ادىستەمەلىك نۇسقاۋلىق رەتىندە بەكىتىلۋى كەرەك.
قابىلداۋ بارىسىندا بارلىق وتىنىشتەر تىركەلىپ, جاۋاپتى مەكەمەلەرگە جولداندى. كەيبىر ماسەلەلەر سول جەردە جەدەل شەشىمىن تاپتى. ال الەۋمەتتىك مارتەبە, ءبىلىم بەرۋ جانە زاڭنامالىق وزگەرىستەردى تالاپ ەتەتىن بىرقاتار سۇراق رەسپۋبليكالىق دەڭگەيدە قارالاتىن بولادى. پارتيا بۇل باستامالاردىڭ ورىندالۋىن باقىلاۋدا ۇستايدى جانە ءتيىستى مەملەكەتتىك ورگاندارمەن بىرلەسە جۇمىس جۇرگىزۋگە دايىن.
ەسكە سالايىق, قازاقستاندىقتار وزدەرىن تولعاندىرعان ماسەلەلەر بويىنشا «AMANAT» پارتياسىنىڭ ورتالىق اپپاراتىنىڭ قوعامدىق قابىلداۋ بولمەسىنە كەلەسى بايلانىس ارنالارى ارقىلى حابارلاسا الادى:
سall-ورتالىق: 8 800 080 4441 (قازاقستان بويىنشا قوڭىراۋ شالۋ تەگىن); WhatsApp: 8 700 800 4441; E-mail: komek@amanatpartiasy.kz.قابىلداۋعا جازىلۋ قابىلداۋ وتكىزىلەتىن كۇنگە دەيىن كەمىندە 3 كۇنتىزبەلىك كۇن بۇرىن جۇزەگە اسىرىلادى.
الماتى وبلىسى.