قازاقستاننىڭ تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ 16 ميلليوننان استام ازاماتتىڭ جەكە دەرەكتەرىنىڭ جەلىگە تارالۋى تۋرالى اقپاراتقا تۇسىنىكتەمە بەردى, دەپ حابارلايدى Egemen.kz.
ءماجىلىس كۋلۋارىندا مينيستر بۇل مالىمەتتەردىڭ جاڭا ەمەس, بۇرىننان بەلگىلى جانە بۇعان دەيىن ينتەرنەتتە تاراپ كەتكەن دەرەكتەر ەكەنىن ايتقان.
«بۇل جاڭا دەرەكتەر ەمەس, مەملەكەتتىك دەرەكقورلاردىڭ بۇزىلعانى جايلى اقپارات جوق. بۇل – بۇرىندارى تاراعان «تاريحي» دەرەكتەر, قازىرگى تاڭدا ولار داركنەتتە بار. Telegram-ارنالاردا پايدا بولعان جاعدايدا ولاردى بۇعاتتايمىز. بۇل مالىمەتتەر 2024 جىلدىڭ 1 مامىرىنا دەيىنگى كەزەڭگە تيەسىلى», دەدى جاسلان ماديەۆ.
ءمينيستردىڭ ايتۋىنشا, قازاقستاندىقتاردىڭ جەكە دەرەكتەرى ارا-تۇرا اشىق قولجەتىمدىلىككە شىعىپ تۇرادى.
«داركنەتتە اتى-ءجونى, كەي جاعدايدا جسن, كەيدە تەلەفون نومىرلەرى ء(موبيلدى, ءۇي, جۇمىس نومىرلەرى) تارالعان. بىراق بۇل مالىمەتتەر اشىق جەلىگە شىققان ساتتە ءبىز دەرەۋ شارا قابىلداپ, Telegram-ارنالاردى بۇعاتتاپ وتىرامىز», دەدى مينيستر.
ەستەرىڭىزگە سالا كەتەيىك, بۇعان دەيىن ينتەرنەتتە 16,3 ميلليون قازاقستاندىقتىڭ جەكە دەرەكتەرى جاريالانعانى تۋرالى اقپارات تاراعان. اتاپ ايتقاندا, تاراتىلعان دەرەكتەر اراسىندا ازاماتتاردىڭ اتى-ءجونى, جىنىسى, تۋعان كۇنى, جسن, مەكەنجايى, تۇرعىلىقتى بولۋ كۇنى, ءموبيلدى جانە ءۇي, جۇمىس تەلەفوندارى, ازاماتتىعى, ۇلتى جانە باسقا دا جەكە مالىمەتتەر بار.
سونىمەن قاتار, مينيسترلىك تاراپىنان دەرەكتەرى تارالعان ازاماتتارعا egov.kz ەلەكتروندى ۇكىمەت پورتالى ارقىلى ەسكەرتۋ حابارلاماسى جىبەرىلەتىنى حابارلاندى.