سەنات توراعاسى ماۋلەن اشىمباەۆ سينگاپۋردىڭ قازاقستانداعى توتەنشە جانە وكىلەتتى ەلشىسى زۋلكيفلي باحارۋدينمەن كەزدەستى.
كەزدەسۋ بارىسىندا ماۋلەن اشىمباەۆ ديپلوماتتى سينگاپۋردىڭ الداعى تاۋەلسىزدىك كۇنىمەن قۇتتىقتاپ, اتالعان ەلدە قولعا الىنعان وزگەرىستەرگە جوعارى باعا بەردى. سونداي-اق ول قازاقستان مەن سينگاپۋر اراسىنداعى بايلانىستى نىعايتۋ ىسىندە ەكى ەل باسشىلارىنىڭ دوستىق قارىم-قاتىناسى ۇلكەن ءرول اتقارىپ وتىرعانىن, سونىڭ ناتيجەسىندە بۇگىندە كوپتەگەن سالادا ماڭىزدى كەلىسىمدەرگە قول جەتكىزىلگەنىن اتاپ ءوتتى.
سۇحبات كەزىندە ەكىجاقتى قارىم-قاتىناستى, ونىڭ ىشىندە پارلامەنتارالىق ىنتىماقتاستىقتى نىعايتۋ بارىسى دا ءسوز بولدى.
«كەيىنگى جىلدارى ەكى ەلدىڭ ىنتىماقتاستىعى قارقىندى دامىپ كەلەدى. سينگاپۋر پرەزيدەنتى حاليما ياكوب 2023 جىلدىڭ مامىر ايىندا ورتالىق ازياعا جاساعان العاشقى ساپارىن قازاقستاننان باستادى. بىلتىر قازاقستان پرەزيدەنتى قاسىم-جومارت توقاەۆ سينگاپۋرعا 20 جىلدا العاش رەت مەملەكەتتىك ساپارمەن باردى. بۇل ساپارلار سەرىكتەستىگىمىزدى نىعايتۋعا ءوزارا مۇددەلى ەكەنىمىزدى جانە بۇل باعىتتاعى زور الەۋەتىمىزدى كورسەتەدى. ءبىز ءسىزدىڭ ەلدەرىڭىزدىڭ زاڭنامالىق باعىتتاعى تاجىريبەلەرىنە ەرەكشە قىزىعۋشىلىق تانىتىپ وتىرمىز. قازاقستان پارلامەنتىنىڭ ەكى پالاتاسىندا دا سينگاپۋرمەن دوستىق توپتارى جۇمىس ىستەيدى. مۇنى دەپۋتاتتار اراسىنداعى ىنتىماقتاستىقتىڭ ماڭىزدى تەتىگى دەپ قابىلدايمىز. الداعى ۋاقىتتا ولاردىڭ الەۋەتىن بەلسەندى پايدالانۋ ايرىقشا مانگە يە», دەدى م.اشىمباەۆ.
كەزدەسۋدە رۋحاني ديپلوماتيانى ىلگەرىلەتۋ جولىندا كۇش بىرىكتىرۋدىڭ ماڭىزىنا دا ءمان بەرىلدى. سۇحباتتاسۋشىلار قازاقستاننىڭ باستاماسىمەن ۇيىمداستىرىلىپ كەلە جاتقان الەمدىك جانە ءداستۇرلى دىندەر كوشباسشىلارىنىڭ سەزى مەن سينگاپۋر وتكىزەتىن حالىقارالىق ۇيىمشىل قوعامدار كونفەرەنتسياسىنىڭ ماقساتتارى جانە كوتەرەتىن ماسەلەلەرى ۇقساس ەكەنىنە نازار اۋداردى. ەكى ىرگەلى فورۋم دا مۋلتيكۋلتۋراليزم, ينكليۋزيۆتىلىك جانە قوعامنىڭ بىرلىگى سياقتى قۇندىلىقتاردى دارىپتەيدى.
سونىمەن قاتار تاراپتار ساۋدا-ەكونوميكالىق, ينۆەستيتسيالىق, ينفراقۇرىلىمدىق ىنتىماقتاستىق ماسەلەلەرى جونىندە پىكىر الماستى جانە ەنەرگەتيكا, لوگيستيكا, تسيفرلاندىرۋ سياقتى ىرگەلى باعىتتارعا قاتىستى بىرلەسكەن مىندەتتەردى بەلگىلەدى. ءىس-شارادا ايتىلعانداي, قازىرگى تاڭدا ەلىمىزدە 150-گە جۋىق بىرلەسكەن قازاقستان-سينگاپۋر كاسىپورنى تابىستى جۇمىس ىستەپ كەلەدى.
سونداي-اق ماۋلەن اشىمباەۆ ديپلوماتقا مەملەكەت باسشىسى قاسىم-جومارت توقاەۆتىڭ باستاماسىمەن قازاقستاندا جۇرگىزىلىپ جاتقان رەفورمالاردىڭ ماڭىزى جايىندا ايتىپ بەردى. بۇل رەتتە پالاتا سپيكەرى ەكونوميكانى ارتاراپتاندىرۋعا ارنالعان جوبالارعا كەڭىنەن توقتالدى.
ءوز كەزەگىندە زۋلكيفلي باحارۋدين قازاقستاننىڭ جاھاندىق سىن-قاتەرلەردى ەڭسەرۋ, الەۋمەتتىك-ەكونوميكالىق جانە ساياسي رەفورمالاردى ىسكە اسىرۋ جولىندا جاساعان باتىل قادامدارىنا جوعارى باعا بەردى.