مەملەكەت باسشىسى قاسىم-جومارت توقاەۆ ەكىنشى «ورتالىق ازيا – قىتاي» سامميتىندە ءسوز سويلەپ, وڭىرلىك تۇراقتى دامۋدىڭ نەگىزى رەتىندە ەنەرگەتيكا سالاسىنداعى ىقپالداستىقتىڭ ماڭىزىن اتاپ ءوتتى, دەپ حابارلايدى Egemen.kz.
پرەزيدەنتتىڭ ايتۋىنشا, ورتالىق ازيا ءوڭىرى ەنەرگەتيكالىق رەسۋرستار مەن ستراتەگيالىق شيكىزات قورىنا باي, بۇل ونى جاھاندىق ەنەرگەتيكالىق نارىقتاعى ماڭىزدى ويىنشىعا اينالدىرادى.
«الەمدەگى ۋران قورىنىڭ 20 پايىزى, مۇنايدىڭ 17 پايىزدان استامى, تابيعي گازدىڭ 7 پايىزى, سونداي-اق سيرەك كەزدەسەتىن مەتالداردىڭ مول كەنى ورتالىق ازيادا شوعىرلانعان. ياعني بۇل سالاداعى الەۋەتىمىز وراسان زور. ءبىز وزىق تەحنولوگيالار الماسۋعا جانە ەنەرگەتيكا ينفراقۇرىلىمدارىن جاڭعىرتۋعا نيەتتىمىز. سونداي-اق ايماقتىڭ ەنەرگەتيكالىق قاۋىپسىزدىگىن نىعايتۋعا, تەحنولوگيالىق تۇرعىدان ىلگەرىلەۋگە جانە قۋات كوزدەرىن ارتاراپتاندىرۋعا ءمان بەرگەن ءجون», دەدى قاسىم-جومارت توقاەۆ.
مەملەكەت باسشىسى قىتايدىڭ يادرولىق ەنەرگەتيكاداعى تابىستى تاجىريبەسىنە ەرەكشە توقتالىپ, بۇل سالادا ستراتەگيالىق ارىپتەستىك ورناتۋعا قازاقستان مۇددەلى ەكەنىن جەتكىزدى.
«قىتاي حالىق رەسپۋبليكاسىنىڭ يادرولىق ەنەرگەتيكانى دامىتۋداعى باي جانە تابىستى تاجىريبەسىن ەسكەرە وتىرىپ, اتالعان ستراتەگيالىق سالادا ورنىقتى ىنتىماقتاستىق ورناتۋعا مۇددەلىمىز. جۋىق ارادا كەلىسىمگە قول قويۋعا دايىندالامىز», دەدى پرەزيدەنت.