قوستاناي وڭىرىندە ەل اۆتوونەركاسىبىنىڭ جاڭا ءداۋىرى باستالۋعا تاياۋ. ەلىمىزدىڭ ونەركاسىپ تاريحىنداعى ەڭ ءىرى ينۆەستيتسيالىق جوبالاردىڭ ءبىرى سانالاتىن – KIA كومپانياسىنىڭ اۆتوكولىك زاۋىتىنىڭ قۇرىلىسى اياقتالۋعا جاقىن. بۇل – تەك كولىك ءوندىرىسىن جولعا قويۋ ەمەس, شەتەلدىك الپاۋىتتارمەن بىرلەسكەن ونەركاسىپتىك كووپەراتسيانى جاڭا دەڭگەيگە كوتەرەتىن ماڭىزدى قادام, دەپ جازادى Egemen.kz.
وسى اپتادا زاۋىت اۋماعىندا بۇقارالىق اقپارات قۇرالدارىنا ارنالعان ءباسپاسوز تۋرى ءوتىپ, جۋرناليستەر ءوندىرىس الاڭىن ارالاپ, جوبانىڭ اۋقىمى جانە الداعى جوسپارلارمەن تانىستى. جوبا 2023 جىلدىڭ قاراشاسىندا باستالعان بولاتىن. قۇرىلىس جۇمىستارى قازىرگى تاڭدا تولىق اياقتالىپ, تەحنيكالىق ينفراقۇرىلىم مەن قۇرىلعىلاردى ورناتۋ سوڭعى ساتىسىنا جەتكەن.
KIA زاۋىتى – وڭتۇستىك كورەيا ءاۆتووندىرۋشىسىنىڭ قازاقستاندا تىكەلەي ينۆەستيتسيا سالعان العاشقى جوباسى. جوبانىڭ جالپى قۇنى 105 ميلليارد تەڭگەنى قۇرايدى. بولاشاقتا زاۋىت جىلىنا 70 مىڭ اۆتوكولىك شىعارا الادى. بۇل – ىشكى نارىقتى قامتاماسىز ەتىپ قانا قويماي, ەكسپورتتىق الەۋەتتى ارتتىراتىن ءوندىرىس.
«پرەزيدەنت KIA ماركالى اۆتوكولىكتەردى ۇساق توراپتى ادىسپەن قۇراستىرۋ جەلىسىنىڭ ىسكە قوسىلۋ راسىمىنە قاتىسا وتىرىپ, ونەركاسىپتىك كووپەراتسيانى كەڭەيتۋ مەن ينجەنەرلىك بازانى قالىپتاستىرۋدىڭ ماڭىزدىلىعىن اتاپ ءوتتى. بۇل – ءاۆتووندىرۋشى كونتسەرننىڭ كورەيا رەسپۋبليكاسىنان تىس جەردە بىرلەسكەن كاسىپورىنعا تىكەلەي ينۆەستيتسيا قۇيعان العاشقى تاجىريبەسى. سونىمەن قاتار, زاۋىت ىسكە قوسىلعاننان كەيىن 1 500 جاڭا جۇمىس ورنى اشىلادى», دەدى ايماق باسشىسى.
زاۋىتتىڭ وندىرىستىك كورپۋسى 96 مىڭ شارشى مەتردى قامتيدى. مۇندا بەس ءىرى تسەح – دانەكەرلەۋ, كۋزوۆ بوياۋ, پلاستيك بوياۋ, قۇراستىرۋ جانە قوسالقى بولشەكتەر قويماسى ورنالاسقان. سونىمەن بىرگە اكىمشىلىك-تەحنيكالىق عيماراتتار مەن لوگيستيكالىق الاڭدار تولىق قامتىلعان.
مەتاللوكونسترۋكتسيالار ورناتىلىپ, عيماراتتىڭ سىرتقى بولىگى سەندۆيچ-پانەلدەرمەن قاپتالعان. وڭتۇستىك كورەيا مەن قىتايدان 800-دەن استام كونتەينەرمەن قاجەتتى جابدىقتار جەتكىزىلگەن. دانەكەرلەۋ تسەحىنداعى قۇرىلعىلار تولىق ورناتىلىپ, بوياۋ جەلىلەرىن مونتاجداۋ جۇمىستارى اياقتالۋعا جاقىن. CKD (ۇساق توراپتى) جانە DKD ء(ىرى توراپتى) قۇراستىرۋ جەلىلەرى ءازىر تۇر.
بيىلعى شىلدە ايىندا العاشقى پيلوتتىق كولىكتەر قۇراستىرىلادى. ال تولىق ءوندىرىس جەلىسى 2025 جىلدىڭ قازانىندا ىسكە قوسىلادى. جىل سوڭىنا دەيىن شامامەن 3 مىڭ كولىك شىعارۋ جوسپاردا بار. العاشقى كەزەڭدە Cerato, Sorento جانە Sportage مودەلدەرى وندىرىلمەك. كەيىننەن K5, Ceed, Seltos, Soul جانە Picanto ۇلگىلەرى دە كونۆەيەرگە قويىلادى. بارلىعى 13 ءتۇرلى مودەل.
زاۋىت ىسكە قوسىلعان ساتتە 1 500-گە جۋىق ادام جۇمىسپەن قامتىلادى. بۇگىندە كاسىپورىندا 520 مامان جۇمىس ىستەپ جاتىر, ال جاقىن ارادا بۇل كورسەتكىش 830-عا جەتپەك. جاڭا ماماندار ءۇشىن ارنايى وقۋ ورتالىعى قۇرىلىپ, تەوريالىق جانە تاجىريبەلىك دايارلىق كەزەڭ-كەزەڭىمەن جۇزەگە اسىپ جاتىر.
جوبا ىسكە قوسىلعاننان كەيىن قوستاناي وبلىسىنىڭ وڭدەۋ ونەركاسىبىندەگى ءوسىم 46,5 پايىزعا جەتەدى دەپ كۇتىلۋدە. وسى ماقساتتا مەملەكەت تاراپىنان دا ءتيىستى ينفراقۇرىلىم جاساقتالۋدا: 6,7 ميلليارد تەڭگە بيۋدجەت قارجىسى كىرمە جولدار, اۆتوتۇراقتار مەن تاسجولدارعا باعىتتالعان. تەمىرجول جەلىسى پايدالانۋعا بەرىلدى, اۆتوجول قۇرىلىسى اياقتالۋعا جاقىن.