قاسىم-جومارت توقاەۆ مەديتسينا قىزمەتكەرلەرىن الەۋمەتتىك تۇرعىدان قولداۋ, ولاردىڭ مارتەبەسىن كوتەرۋ – مەملەكەتتىڭ نەگىزگى مىندەتىنىڭ ءبىرى ەكەنىنە توقتالدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«مەنىڭ تاپسىرماممەن بىلتىردان باستاپ «قازاقستاننىڭ ەڭبەك سىڭىرگەن دارىگەرى» اتاعى بەرىلە باستادى. بۇل – مەديتسينا قىزمەتكەرلەرىنە دەگەن ايرىقشا قۇرمەتتىڭ بەلگىسى. سوڭعى 5 جىلدا دەنساۋلىق ساقتاۋ سالاسىنداعى جالاقى ەكى ەسەگە جۋىق ءوستى. مەديتسينا كادرلارىن دايارلايتىن جوعارى وقۋ ورىندارى مەن كوللەدجدەردىڭ شاكىرتاقىسى كوبەيدى. جاس مامانداردىڭ بىلىكتى دارىگەردەن تاعىلىم الىپ, كاسىبىنە تەز بەيىمدەلىپ كەتۋىنە بارىنشا جاعداي جاسالۋدا. جالپى, دەنساۋلىق ساقتاۋ ىسىنە بولىنەتىن قارجى جىل وتكەن سايىن ارتىپ كەلە جاتىر. بيىل ونىڭ كولەمى 2,6 تريلليون تەڭگەگە جەتتى. مەملەكەت مەديتسينا قىزمەتكەرلەرىنە قولداۋ كورسەتە بەرەدى. دارىگەردى حالىقتىڭ قامقورشىسى دەۋگە بولادى. بارشا جۇرت مۇنى تەرەڭ ءتۇسىنىپ, ولارعا ءاردايىم قۇرمەت كورسەتۋگە ءتيىس. وكىنىشكە قاراي, قوعامدا دارىگەردىڭ جۇمىسىنا كەدەرگى جاساپ, ءتىپتى, قوقان-لوقى كورسەتەتىن ادامدار ءالى دە بار. مەديتسينا قىزمەتكەرىنىڭ قاۋىپسىزدىگىنە قاتەر توندىرەتىن زاڭسىز ارەكەتكە جول بەرۋگە بولمايدى. قوعامدىق ءتارتىپتى بۇزاتىن وسىنداي ادامدار مىندەتتى تۇردە زاڭ اياسىندا جاۋاپكەرشىلىككە تارتىلادى. زاڭ مەن ءتارتىپ بارلىق جەردە بىردەي قاتاڭ ساقتالۋعا ءتيىس. ءبىز سوندا عانا ادىلەتتى ءارى قاۋىپسىز قازاقستاندى قۇرا الامىز. وسى ورايدا مەديتسينا قىزمەتكەرىنىڭ ءرولى ايرىقشا», دەدى مەملەكەت باسشىسى.
پرەزيدەنت دارىگەرلەردىڭ ەڭبەگى قاشاندا لايىقتى باعالانۋى كەرەك ەكەنىن ايتىپ, مەديتسينا مايتالماندارىن مەملەكەتتىك ناگرادامەن ماراپاتتاۋ تۋرالى جارلىققا قول قويعانىن جەتكىزدى.
جيىندا س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ كافەدرا مەڭگەرۋشىسى قۇرالباي قۇراقباەۆ, ەڭبەك ارداگەرى جەكسەنباي نىسانوۆ, «ۇلتتىق بيوتەحنولوگيا ورتالىعى» جشس فيليالىنىڭ زەرتحانا مەڭگەرۋشىسى ەكاتەرينا وستاپچۋك ءسوز سويلەدى.