قر پرەمەر-ءمينيسترى ولجاس بەكتەنوۆ Roca Group ديرەكتورلار كەڭەسىنىڭ توراعاسى سانتياگو دە گومار روكامەن كەزدەسۋ وتكىزدى. كەلىسسوز بارىسىندا قىزىلوردا وبلىسىندا سانيتارلىق-تەحنيكالىق ونىمدەر شىعاراتىن جوعارى تەحنولوگيالىق زاۋىت سالۋ جوباسى جانە ينۆەستيتسيالىق ىنتىماقتاستىقتى تەرەڭدەتۋ ماسەلەلەرى قارالدى, دەپ حابارلايدى Egemen.kz.
جوسپارلانعان زاۋىت جىلىنا 500 مىڭ داناعا دەيىن سانتەحنيكالىق بۇيىم وندىرۋگە قاۋقارلى بولادى. ءوندىرىس نىسانى قىزىلوردا وبلىسىنداعى ء«وندىرىس» يندۋستريالىق ايماعىندا ورنالاسادى, قازىرگى تاڭدا قاجەتتى جەر تەلىمى بەلگىلەنگەن. كاسىپورىن ىشكى نارىقپەن قاتار, ءونىمىن ورتالىق ازيا ەلدەرىنە ەكسپورتتاۋعا باعىتتالادى. جالپى ينۆەستيتسيا كولەمى 70 ميلليون ەۋروعا باعالانىپ وتىر. جوبا ىسكە قوسىلعان جاعدايدا شامامەن 300 جاڭا جۇمىس ورنى اشىلادى دەپ كۇتىلەدى.
كەزدەسۋ بارىسىندا سانتياگو دە گومار روكا قازاقستاندى Roca Group ءۇشىن ورتالىق ازياداعى ستراتەگيالىق دامۋ الاڭى رەتىندە قاراستىراتىنىن مالىمدەدى. ونىڭ ايتۋىنشا, قازاقستان قولايلى ينۆەستيتسيالىق احۋال مەن لوگيستيكالىق مۇمكىندىكتەر ۇسىنادى.
«قازاقستان – ورتالىق ازياداعى قاتىسۋىمىزدى كەڭەيتۋ ءۇشىن قيسىندى تاڭداۋ. ءبىز ەلدى بۇكىل ايماق ءۇشىن ءتيىمدى جۇمىس ىستەي الاتىن ونەركاسىپتىك جانە لوگيستيكالىق حاب رەتىندە قاراستىرامىز. قىزىلورداداعى جوبا جەرگىلىكتى ەكونوميكانىڭ دامۋىنا ۇلەس قوسىپ, حالىقارالىق ستراتەگيامىزدىڭ ماڭىزدى بولىگىنە اينالاتىنىنا سەنىمدىمىز», دەدى ول.
ءوز كەزەگىندە, پرەمەر-مينيستر ولجاس بەكتەنوۆ ونەركاسىپتىك ءوندىرىستى لوكاليزاتسيالاۋ ۇكىمەتتىڭ باسىم باعىتتارىنىڭ ءبىرى ەكەنىن اتاپ ءوتتى. ول مەملەكەت باسشىسى قاسىم-جومارت توقاەۆتىڭ باستاماسىمەن وتاندىق ءوندىرىستى قولداۋ مەن يمپورتقا تاۋەلدىلىكتى ازايتۋعا باعىتتالعان ساياسات بەلسەندى جۇزەگە اسىرىلىپ جاتقانىن جەتكىزدى.
«قازاقستان پرەزيدەنتى قاسىم-جومارت توقاەۆتىڭ ەكونوميكالىق تۇراقتىلىقتى قامتاماسىز ەتۋدەگى باسىم باعىتى اياسىندا وتاندىق ءوندىرىستى قولداۋعا جانە سىرتقى جەتكىزىلىمدەرگە تاۋەلدىلىكتى ازايتۋعا باعىتتالعان يمپورتتى الماستىرۋ ساياساتى بەلسەندى دامىپ كەلەدى. قازاقستان مەن يسپانيا – ستراتەگيالىق سەرىكتەستەر. سوندىقتان ءبىز كومپانيانى سەنىمدى سەرىكتەس رەتىندە كورەمىز جانە تەرەڭ يندۋستريالىق دامۋ ءۇشىن جوعارى تەحنولوگيالىق ءوندىرىس تارتۋدى قۇپتايمىز. ۇكىمەت جوبانىڭ ءساتتى جۇزەگە اسۋى ءۇشىن قاجەتتى كومەك كورسەتەدى», دەدى پرەمەر-مينيستر.
كەزدەسۋ قورىتىندىسى بويىنشا قر ونەركاسىپ جانە قۇرىلىس مينيسترلىگى, قىزىلوردا وبلىسىنىڭ اكىمدىگى جانە Roca Group اراسىندا ينۆەستيتسيالىق جوبانى جۇزەگە اسىرۋ قاعيداتتارى تۋرالى نەگىزدەمەلىك كەلىسىمگە قول قويىلدى.