حالىقارالىق ارحيۆتەر كۇنىنە وراي ۆيلنيۋس قالاسىندا قازاقستان رەسپۋبليكاسىنىڭ ورتالىق مەملەكەتتىك كينو-فوتوقۇجاتتار جانە دىبىس جازبالار ءارحيۆى مەن ليتۆانىڭ ورتالىق مەملەكەتتىك ءارحيۆى اراسىندا ءوزارا تۇسىنىستىك تۋرالى مەموراندۋمعا قول قويىلدى.
قۇجات تاجىريبە الماسۋعا, بىرلەسكەن جوبالاردى ىسكە اسىرۋعا جانە ارحيۆ سالاسىنداعى كاسىبي ءوزارا ءىس-قيمىلدى دامىتىپ, قازاقستان مەن ليتۆا اراسىنداعى مادەني-گۋمانيتارلىق ىنتىماقتاستىقتى نىعايتۋعا باعىتتالعان.
سالتاناتتى ءىس-شارا اياسىندا «قازاق دالاسى مادەنيەتىندەگى ايەل ءرولى (XIX عاسىردىڭ سوڭى – XX عاسىردىڭ باسى)» اتتى حالىقارالىق فوتوكورمەنىڭ اشىلۋى ءوتتى. كورمەگە وتاندىق ارحيۆ قورىنان الىنعان تاريحي فوتوماتەريالدار قويىلىپ, كوپشىلىككە قازاق ايەلدەرىنىڭ قوعامدىق ومىردەگى ەرەكشە ورنى مەن ءرولى كورسەتىلدى. كورمە ليتۆا ارحيۆشىلەرىنىڭ قولداۋىمەن ازىرلەنىپ, العاش رەت حالىقارالىق اۋديتورياعا ۇسىنىلدى.
جيىندا ليتۆا ورتالىق مەملەكەتتىك ءارحيۆىنىڭ ديرەكتورى داليۋس جيجيس پەن قازاقستاننىڭ ليتۆاداعى ەلشىسى تيمۋر ورازاەۆ قۇتتىقتاۋ ءسوز سويلەدى. ەلىمىزدىڭ دەلەگاتسياسى ارحيۆ قىزمەتى مەن حالىقارالىق جوبالارعا توقتالدى.
ءىسساپار اياسىندا وتاندىق ماماندار ۆيلنيۋس, كاۋناس جانە كلايپەدا قالالارىنداعى ارحيۆ مەكەمەلەرىندە بولدى. ەكى ەل اراسىنداعى ارىپتەستىكتى دامىتۋ ماقساتىندا ارحيۆ قىزمەتكەرلەرىمەن كاسىبي كەزدەسۋلەر وتكىزىلىپ, فوتوكورمەلەر مەن كينوقۇجاتتار كورسەتىلىمدەرىن بىرلەسىپ ۇيىمداستىرۋ, اۋديوۆيزۋالدى قۇجاتتارمەن الماسۋ جانە قۇجاتتاردى تسيفرلاندىرۋ سالاسىنداعى تاجىريبە الماسۋ باعىتتارى تالقىلاندى.
ايتا كەتەيىك, 10-11 ماۋسىم كۇندەرى ارحيۆ ماماندارى قازاقستان تاريحى مەن مادەنيەتىنە قاتىستى ماتەريالداردى انىقتاۋ ماقساتىندا ليتۆا ارحيۆتەرىندە عىلىمي-زەرتتەۋ جۇمىستارىن جۇرگىزدى.