الماتى وبلىسىندا اۋىلدىق ەلدى مەكەندەردەگى حالىققا جوعارى ساپالى دياگنوستيكالىق قىزمەتتەردى قولجەتىمدى ەتۋ ماقساتىندا «QH دەنساۋلىق جولى» قايىرىمدىلىق جوباسى بەلسەندى تۇردە جۇزەگە اسىرىلىپ جاتىر. بيىلعى جىلدىڭ ءتورت ايىندا الماتى ايماقتىق كوپسالالى كلينيكاسى وبلىستىق دەنساۋلىق ساقتاۋ باسقارماسىنىڭ قولداۋىمەن جىلجىمالى مەديتسينالىق كەشەننىڭ كومەگىمەن 5 مىڭنان استام شالعاي ەلدى مەكەن تۇرعىندارىن تەكسەرۋدەن وتكىزدى, دەپ حابارلايدى Egemen.kz.
جىل باسىنان جىلجىمالى مەديتسينالىق كەشەن تالعار, جامبىل, ەڭبەكشىقازاق, قاراساي, ىلە اۋداندارى مەن شەلەك اۋىلىندا كومەك كورسەتتى.
«جىلجىمالى كەشەننىڭ ارقاسىندا 4 ايدا 5 مىڭنان استام اۋىل تۇرعىندارىن تەكسەرىپ, ولارعا ۋاقىت پەن قاراجات ۇنەمدەۋگە مۇمكىندىك بەردىك. بۇل شالعايداعى حالىق ءۇشىن اسا ماڭىزدى», دەدى الماتى ايماقتىق كوپسالالى كلينيكا ديرەكتورى ساياحات ولجاەۆ.
2025 جىلدىڭ اقپان ايىنان مامىر ايىنا دەيىنگى ارالىقتا 5 350 ادام تەكسەرۋدەن ءوتتى. ونىڭ ىشىندە 1 648 ايەلگە مامموگرافيا, 1 401 ادامعا كت تەكسەرۋ جۇرگىزىلدى.
تەكسەرۋ ناتيجەسىندە 8 ادامنان قاتەرلى ىسىك انىقتالسا, 123 ادامنان قاتەرلى ىسىكتىڭ بەلگىلەرى انىقتالدى. 156 پاتسيەنتتەن وبىرالدى جاعدايلار انىقتالدى.
«ەرتە دياگنوستيكا – ءساتتى ەمدەۋدىڭ كىلتى. جىلجىمالى كەشەندەردىڭ كومەگىمەن ءبىز قاتەرلى ىسىك اۋرۋلارىن ەرتە ساتىسىندا انىقتاۋعا مۇمكىندىك الىپ وتىرمىز. بۇل – ادامداردىڭ ءومىرىن ساقتاپ قالۋدىڭ ناقتى جولى», دەپ اتاپ ءوتتى ساياحات ولجاەۆ.
جىلجىمالى مەديتسينالىق كەشەن ماۋسىم ايىندا قاراساي جانە ۇيعىر اۋداندارىنىڭ تۇرعىندارىن تەكسەرۋدەن وتكىزەدى.
جىلجىمالى دياگنوستيكالىق كەشەندەردى پايدالانۋ – دەنساۋلىق ساقتاۋ جۇيەسىن جەتىلدىرۋ مەن ءاربىر ازاماتقا مەديتسينالىق كومەكتى جاقىنداتۋدىڭ ءتيىمدى قۇرالىنا اينالىپ وتىر.
الماتى وبلىسى