ەلىمىزدە سۋ رەسۋرستارىن ءتيىمدى پايدالانۋ ماسەلەسى كۇن تارتىبىنەن تۇسكەن ەمەس. اسىرەسە, سۋارمالى ەگىنشىلىككە تاۋەلدى وڭىرلەر ءۇشىن بۇل ماسەلەنىڭ ءمانى زور. وسى باعىتتا جاسالعان ناقتى قادامداردىڭ ءبىرى – جامبىل وبلىسى شۋ اۋدانىندا جۇزەگە اسىرىلعان سۋ ەسەپكە الۋ جانە باقىلاۋدى اۆتوماتتاندىرۋعا ارنالعان قاناتقاقتى جوبا, دەپ جازادى Egemen.kz.
اتالعان جوبا تاسوتكەل ماگيسترالدى كانالىنىڭ سوڭىنداعى ك1 جانە «دالاقاينار» تارماقتارىندا ىسكە اسىرىلدى. سۋ ارنالارىنداعى ەسەپكە الۋ مەن باسقارۋ جۇيەسىن تولىق تسيفرلاندىرۋدى كوزدەيتىن بۇل باستاما «قازسۋشار» رمك جامبىل وبلىستىق فيليالىنىڭ تىكەلەي باقىلاۋىندا جۇزەگە اسىرىلىپ وتىر.
جوبا اياسىندا كانال بويىنداعى سۋ كولەمىن ناقتى ءارى ۇزدىكسىز باقىلاۋعا مۇمكىندىك بەرەتىن زاماناۋي جابدىقتار ورناتىلعان. ەندى ديسپەتچەرلىك ورتالىق سۋدىڭ ناقتى كولەمى, تارالۋ باعىتى مەن تەحنيكالىق كۇيى تۋرالى دەرەكتەردى ونلاين رەجيمدە باقىلاپ وتىرادى. تاۋلىك بويى جۇمىس ىستەيتىن ەكى بەينەباقىلاۋ كامەراسى مەن قورعانىس جۇيەسى دە ينفراقۇرىلىم قاۋىپسىزدىگىن ارتتىرۋعا سەپ بولماق.
اۆتوماتتاندىرىلعان جۇيە سۋدىڭ بوسقا ىسىراپ بولۋىنا جول بەرمەي, ونىڭ اۋىل شارۋاشىلىعى ماقساتىندا ادىلەتتى ءبولىنۋىن قامتاماسىز ەتەدى. اسىرەسە, ۆەگەتاتسيالىق كەزەڭدە سۋ تاپشىلىعىن بولدىرماۋ ءۇشىن بۇل شەشىمنىڭ ماڭىزى زور. تسيفرلىق باقىلاۋدىڭ ارقاسىندا ارتىق شىعىن ازايىپ, سۋ ارنالارىن باسقارۋ ناقتى ەسەپ پەن مونيتورينگكە سۇيەنىپ جۇزەگە اسادى.
جوبا تەك تەحنيكالىق تۇرعىدان عانا ەمەس, ستراتەگيالىق ماڭىزدىلىعىمەن دە ەرەكشەلەنەدى. «قازسۋشار» فيليالىنىڭ ديرەكتورى قايرات امانوۆتىڭ ايتۋىنشا, بۇل باستاما يرريگاتسيالىق ينفراقۇرىلىمدى جاڭعىرتۋدىڭ ءتيىمدى ۇلگىسىنە اينالۋى مۇمكىن.
«جاڭا جۇيە سۋدى ەسەپكە الۋدى ايتارلىقتاي جەڭىلدەتەدى. ىسكە اسىرىلىپ جاتقان پيلوتتىق جوبا سۋ سەكتورىن تسيفرلاندىرۋدىڭ تاعى ءبىر قادامى. ول يرريگاتسيالىق ينفراقۇرىلىمدى جاڭعىرتۋدىڭ ءتيىمدى ۇلگىسى بولا الادى», – دەيدى ول.
قازىرگى تاڭدا ەلىمىزدىڭ بىرقاتار وڭىرلەرىندە سۋ تاپشىلىعى ماسەلەسى وتكىر سەزىلە باستادى. بۇل جاعدايدا اۆتوماتتاندىرىلعان باسقارۋ جۇيەلەرى مەن ناقتى ەسەپكە نەگىزدەلگەن مودەلدەر عانا سۋدى ۇنەمدەۋدىڭ, اگروونەركاسىپ كەشەنىنىڭ تۇراقتى دامۋىنىڭ كەپىلى بولماق. شۋ اۋدانىنداعى جوبا – وسى باعىتتاعى العاشقى ءارى سەنىمدى قادام.