جانكەنت قالاشىعىندا تۇركى اكادەمياسى مەن قورقىت اتا اتىنداعى قىزىلوردا ۋنيۆەرسيتەتى بىرلەسە جۇرگىزىپ كەلە جاتقان ارحەولوگيالىق زەرتتەۋلەرگە ارنالعان ەسكەرتكىش ستەلا ورناتىلدى, دەپ جازادى Egemen.kz.
باستاۋىن VII عاسىردان الاتىن كونە قالا باسىنداعى سالتاناتتى جيىندا تۇركى اكادەمياسىنىڭ پرەزيدەنتى شاھين مۇستافاەۆ شاھاردى جان-جاقتى زەرتتەپ, ساقتاۋ جانە تۇركى حالىقتارىنىڭ تاريحي-مادەني مۇراسىن كەڭىنەن ناسيحاتتاۋ ماقساتىندا جۇرگىزىلگەن قازبا جۇمىستارىنىڭ ناتيجەسى جايلى تاراتا ايتتى. 2023 جىلى باستالعان زەرتتەۋ جۇمىستارىنا ەلىمىزدەن بولەك وزبەكستان عالىمدارى دا قاتىسقان.
«X عاسىرعا دەيىن سىرداريا وعىزدارى مەملەكەتىنىڭ استاناسى بولعان شاھار ەدىل-ورال ءوڭىرى مەن ماۋەرەنناھر, حازار قاعاناتى مەن حورەزم اراسىندا ماڭىزدى ساۋدا جانە مادەني بايلانىستار تورابىنا اينالدى», دەدى شاھين مۇستافاەۆ.
مادەنيەت جانە اقپارات مينيسترلىگىنىڭ باسقارما باسشىسى ريگا وناەۆا, قوركىت اتا اتىنداعى قىزىلوردا ۋنيۆەرسيتەتىنىڭ پرورەكتورى ماينۇر بورىباەۆا, وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى قۋانىش جانۇزاقوۆ, سامارقاند ارحەولوگيا ينستيتۋتىنىڭ مامانى ايسۇلۋ يسكاندەروۆالار قاتىسقان جيىندا بىرلەسكەن جۇمىس ناتيجەسىندە تابىلعان جادىگەرلەر VII–X عاسىرلاردا سىرداريا وڭىرىندەگى تۇركى-وعىز مادەنيەتىنىڭ قالىپتاسۋ جانە دامۋ ساتىلارىن ناقتىلاۋعا مۇمكىندىك بەرىپ, ورتا جانە تومەنگى سىرداريا ايماقتارىنداعى ەتنيكالىق جۇيەلەر تۋرالى تۇسىنىكتەردى ايتارلىقتاي كەڭەيتەتىنى ايتىلدى.
تابىلعان ەڭ قۇندى ولجالاردىڭ ءبىرى – IX عاسىرعا ءتان وعىز ءداۋىرىنىڭ تەڭگەلەرى جاسىرىلعان كۇمىس كومبەسى. بۇل قالانىڭ جىبەك جولىنداعى ءىرى ساۋدا جانە مادەني ورتالىق رەتىندەگى ماڭىزىن كورسەتەدى.
ارحەولوگيالىق زەرتتەۋلەر – تۇركى اكادەمياسىنىڭ عىلىمي قىزمەتىندەگى باستى باعىتتاردىڭ ءبىرى. بىلتىر اكادەميا تاراپىنان ماڭعىستاۋ وبلىسىندا وعىز-قىپشاق ءداۋىرىنىڭ قورىمدارىن زەرتتەۋگە ارنالعان عىلىمي ەكسپەديتسيا ۇيىمداستىرىلسا, قازىر موڭعولياداعى نومعون جازىعىندا تۇركى قاعاناتى داۋىرىنە جاتاتىن مەموريالدىق كەشەنگە قاتىستى دالا جۇمىستارى جالعاسىپ جاتىر.