كورەيا رەسپۋبليكاسىنىڭ استاناسى سەۋلدە وتكەن Seoul International Tourism Fair (SITF 2025) كورمەسىنە 800-گە جۋىق وسى سالانىڭ وكىلدەرى, سونىڭ ىشىندە ۇلتتىق تۋريستىك اگەنتتىكتەر, تۋروپەراتورلار جانە 70 ەلدىڭ قوناق ءۇي جەلىلەرى قاتىستى, دەپ حابارلايدى Egemen.kz.
ماۋسىمنىڭ 5-8 ارالىعىندا وتكەن ازياداعى ەڭ اۋقىمدى كورمەلەردىڭ بىرىندە الماتى بۇرىشى كەلۋشىلەر مەن ساراپشىلاردىڭ نازارىن ەرەكشە اۋدارىپ, كورمە سوڭىندا «SITF 2025 ستەندىنىڭ ۇزدىك ديزاينى» قۇرمەتتى ماراپاتىنا يە بولدى.
كورمە قوناقتارى دومبىراشىلاردىڭ ونەرىن, قولدانبالى ونەر شەبەرلەرىن, قازاق ۇلتتىق كيىمدەرى قويىلعان فوتو جانە گاسترونوميالىق ايماقتاردى قامتيتىن باي ينتەراكتيۆتى باعدارلامانىڭ ارقاسىندا الماتىنىڭ قازاق مادەنيەتى مەن رۋحىنىڭ اۋانىن تاماشالاي الدى.
ستەندتىڭ جەكە ەرەكشەلىگى يممەرسيۆتى ماركەتينگتى قولدانۋ دەسەك, وندا كەلۋشىلەر VR-كوزىلدىرىك ارقىلى الماتىعا ۆيرتۋالدى ساياحات جاساي الادى.
«SITF 2025 كورمەسىنە قاتىسۋ الماتىنى وڭتۇستىك كورەيا مەن حالىقارالىق نارىقتا بىرەگەي تۋريستىك باعىت رەتىندە ىلگەرىلەتۋدەگى ماڭىزدى قادام بولدى. ءىس - شارا بارىسىندا قازاقستاندىق جانە شەتەلدىك تۋروپەراتورلار اراسىندا B2B كەزدەسۋلەر وتكىزىلىپ, قالامىزعا 21 مىڭعا جۋىق ءتۋريستتى تارتۋدى كوزدەيتىن ىنتىماقتاستىق تۋرالى 30 كەلىسىمشارتقا قويىلدى», دەيدى الماتى قالالىق تۋريزم باسقارماسىنىڭ تالداۋ جانە ستراتەگيالىق جوسپارلاۋ ءبولىمىنىڭ باسشىسى ماقپال ابدىقادىر.
ءوز كەزەگىندە كورمە قوناقتارى الماتىعا ۇلكەن قىزىعۋشىلىق تانىتقان
ء«بىز ءۇشىن ورتالىق ازياداعى وسى اسەم قالا وتە قىزىقتى تۋريستىك باعىت. مەنىڭشە, الماتى - تاۋلاردىڭ ەتەگىندەگى بىرەگەي قالا ءارى ونىڭ زاماناۋي دامۋى ۇلتتىق رۋحقا وتە باي ەكەن. ءبىر كەزدە وسى ارۋ قالادا بولامىن دەپ ۇمىتتەنەمىن», دەپ ءوز ويىمەن ءبولىستى سەۋل تۇرعىنى كيم دجيۋن.
وسى ارادا وڭتۇستىك كورەيالىق تۋريستەردىڭ الماتىعا دەگەن قىزىعۋشىلىعى جىل سايىن ارتىپ كەلە جاتقانىن, 2024 جىلى كورەيا رەسپۋبليكاسىنان كەلگەن تۋريستەر سانى 20114 ادامعا دەيىن كوبەيىپ, بۇل 2023 جىلمەن سالىستىرعاندا 3,2%-عا ارتىق ەكەنىن اتاپ وتكەن ءجون.