تاۋەكەل دەڭگەيى جوعارى كاسىپورىندار سانى ازايدى - مينيستر

«2024 جىلى جازاتايىم وقيعالاردان 1408 ادام زارداپ شەكتى, ونىڭ ىشىندە 202 ادام قايتىس بولدى. 445 مىڭنان استام جۇمىس ورنى ءالى دە زياندى نەمەسە قاۋىپتى دەپ سانالادى. 15 976 ازامات كاسىپتىك ەڭبەك ەتۋ قابىلەتىنەن ايرىلعان: ونىڭ ىشىندە كاسىپتىك اۋرۋلار بويىنشا – 8 204 جانە وندىرىستىك جاراقاتتار بويىنشا – 7 771 ادام. بۇل ساندار ەڭبەكتى قورعاۋ سالاسىنداعى تاسىلدەردى ودان ءارى جۇيەلى جاڭارتۋ قاجەتتىگىن ايعاقتايدى», دەدى سۆەتلانا جاقىپوۆا.

مينيستر ۆەدومستۆو رەسمي باقىلاۋدان تاۋەكەلدەردى باسقارۋعا كوشۋگە, پروفيلاكتيكانى كۇشەيتۋگە جانە قىزمەتكەرلەردىڭ الەۋمەتتىك قورعالۋىن ارتتىرۋعا باعىتتالعان شارالار تۋرالى حاباردار ەتتى.

ەڭ الدىمەن, تاۋەكەلگە باعدارلانعان قاداعالاۋدى دامىتۋ جانە ەڭبەكتى قورعاۋدى تسيفرلاندىرۋ. 2024 جىلدان باستاپ 80 كورسەتكىش نەگىزىندە وندىرىستىك تاۋەكەلدەردىڭ دەڭگەيى جوعارى كاسىپورىنداردى اۆتوماتتاندىرىلعان رەجيمدە ايقىنداۋعا مۇمكىندىك بەرەتىن ەڭبەك تاۋەكەلدەرىنىڭ كارتاسى ەنگىزىلدى, ونىڭ 23-ءى ەڭبەك جاعدايلارىنا نەگىزدەلگەن.

«وسى اقپاراتتىق جۇيەنى ەنگىزۋ باستالعاننان بەرى جوعارى تاۋەكەل ايماعىنان 3 مىڭ كاسىپورىن شىعارىلىپ, 90 مىڭنان استام قىزمەتكەر قامتىلدى. تاۋەكەل دەڭگەيى جوعارى كاسىپورىندار سانى 2 589-دان 1 799-عا دەيىن قىسقاردى. ەڭبەك تاۋەكەلدەرىنىڭ كارتاسى ىقتيمال بۇزۋشىلىقتاردىڭ سەبەپتەرىن جويۋدا جۇمىس بەرۋشىلەردى قولداۋعا كۇش سالۋ ارقىلى ينتسيدەنتتىك دەن قويۋدان پرواكتيۆتى پروفيلاكتيكاعا كوشۋگە مۇمكىندىك بەردى», دەپ اتاپ ءوتتى مينيستر.

ەكىنشى – ەڭبەك جاعدايلارىن جاقسارتۋ. قازىرگى ۋاقىتتا ەڭبەك جاعدايلارىن مەرزىمدى ولشەۋدى (ايىنا, توقسانىنا, جىلىنا ءبىر رەت) ءارتۇرلى ۋاكىلەتتى ورگاندار – دەنساۋلىق ساقتاۋ مينيسترلىگى, توتەنشە جاعدايلار مينيسترلىگى (ونەركاسىپتىك قاۋىپسىزدىك بولىگىندە) جۇرگىزەدى. الايدا, بۇل ولشەمدەر فراگمەنتتىك سيپاتتا بولادى, ۆەدومستۆولار اراسىندا شاشىراڭقى جانە ءبىرتۇتاس كورىنىستى قالىپتاستىرۋعا مۇمكىندىك بەرمەيدى.

«ەڭبەك جاعدايلارىن ەپيزودتىق ولشەۋ جۇيەسىنەن زياندى جانە قاۋىپتى جۇمىس ورىندارىنا باسا نازار اۋدارا وتىرىپ, ۇزدىكسىز تسيفرلىق مونيتورينگ جۇرگىزۋگە كوشۋ ۇسىنىلادى. تەحنيكالىق تۇرعىدان بۇل «ەڭبەكتى قورعاۋ جانە قاۋىپسىزدىك» بىرىڭعاي اقپاراتتىق جۇيەسىنە قوسىلعان داتچيكتەردى ەنگىزۋ ارقىلى جۇزەگە اسادى», دەپ جالعاستىردى سۆەتلانا جاقىپوۆا.

ءۇشىنشى – وندىرىستە زارداپ شەككەندەردى الەۋمەتتىك قورعاۋ شارالارىن جەتىلدىرۋ. 2024 جىلدان باستاپ كاسىپتىك ەڭبەككە قابىلەتتىلىگىنەن ايرىلۋ بويىنشا ساقتاندىرۋ تولەمدەرىن تاعايىنداۋ كەزىندە قىزمەتكەردىڭ كىناسىن ەسەپكە الۋ جويىلدى. 2015 جىلعى مامىردان كەيىن ەڭبەك ەتۋ قابىلەتىنەن ايىرىلعان قىزمەتكەرلەرگە تەڭ كوزقاراستى قامتاماسىز ەتۋ بويىنشا جۇمىس جۇرگىزىلىپ جاتىر. ماقساتى – ساقتاندىرۋ جاعدايى باستالعان كۇن بويىنشا كەمسىتۋشىلىكتى جويۋ. ماسەلە قر قارجى نارىعىن رەتتەۋ جانە دامىتۋ اگەنتتىگىمەن, قر قارجى مينيسترلىگىمەن جانە جۇمىس بەرۋشىلەر بىرلەستىكتەرىمەن بىرلەسىپ پىسىقتالىپ جاتىر.

ءتورتىنشى – زياندى ەڭبەك جاعدايلارىندا جۇمىس ىستەيتىن قىزمەتكەرلەردى قولداۋ. 2024 جىلدان باستاپ 55 جاسقا تولعان جانە مىندەتتى كاسىپتىك زەينەتاقى جارنالارى جۇيەسىنە كەمىندە 7 جىل قاتىسقان ادامدار ءۇشىن ارنايى تولەمدەر ەنگىزىلدى. زياندى جاعدايلاردا ەڭبەك ەتكەن, بىراق مكزج-دا رەسمي راستالعان تاجىريبەسى جوق ادامداردى قامتۋ قاراستىرىلىپ جاتىر.

«سونىمەن قاتار, قاۋىپتى ايماقتارداعى جۇمىسشىلار سانىن وڭتايلاندىرۋ كەزىندە جۇمىس كولەمىن مىندەتتى ستاندارتتاۋ بويىنشا تاسىلدەر ازىرلەنىپ جاتىر. بۇل جۇمىسشىلاردى وندىرىستىك تاۋەكەلدەردىڭ جاسىرىن وسۋىنەن قورعايدى. زياندى نەمەسە قاۋىپتى ايماقتارداعى جۇمىسشىلار سانىنىڭ كەز كەلگەن قىسقارۋى رۇقسات ەتىلگەن جۇكتەمەلەر مەن ورىندالاتىن جۇمىس كولەمدەرىنىڭ نورماتيۆتىك نەگىزدەمەسىمەن سۇيەمەلدەنۋى كەرەك», دەپ حابارلادى ەڭبەك مينيسترلىگىنىڭ باسشىسى.

بەسىنشى – ۇجىمدىق شارتتار مەن الەۋمەتتىك ارىپتەستىك تۋرالى كەلىسىمدەردى تسيفرلاندىرۋ. مينيسترلىك جوبانى دايىنداۋدان باستاپ قول قويۋعا جانە قىزمەتكەرلەردى حاباردار ەتۋگە دەيىنگى بارلىق تسيكلدى قامتيتىن ەلەكتروندىق ۇجىمدىق شارتتار جۇيەسىن ەنگىزدى. سالالىق جانە نەگىزگى كەلىسىمدەردى قوسا العاندا, شارتتاردىڭ تسيفرلىق فورماتىنا كوشۋ بارلىق دەڭگەيدەگى ەڭبەك جاعدايلارىنىڭ اشىقتىعى مەن بىرىڭعاي ستاندارتىن قامتاماسىز ەتەدى.

التىنشى – كاسىپوداقتار ينستيتۋتىن نىعايتۋ. حالىقارالىق تاجىريبە ەڭبەكتى قورعاۋ تالاپتارىنىڭ ساقتالۋىن كۇندەلىكتى باقىلاۋدا كاسىپوداق ۇيىمدارى ماڭىزدى ءرول اتقاراتىنىن دالەلدەيدى.

«بۇل ءرولدى كۇشەيتۋدە كاسىپوداقتاردىڭ اۆتوماتتاندىرىلعان جۇمىس ورنى قۇرىلدى, اتالعان جۇيە ەڭبەك جاعدايلارى تۋرالى اقپاراتقا قول جەتكىزۋدى جانە بۇزۋشىلىقتاردى جەدەل تىركەۋدى قامتاماسىز ەتەدى. بۇل كاسىپورىن دەڭگەيىندە اعىمداعى باقىلاۋ فۋنكتسيالارىن جۇزەگە اسىرۋعا, قوعامدىق باقىلاۋدىڭ ءرولىن كۇشەيتۋگە جانە مەملەكەتتىك قاداعالاۋدىڭ ءفورماليزمىن ازايتۋعا مۇمكىندىك بەرەدى», دەپ اتاپ ءوتتى سۆەتلانا جاقىپوۆا.

جەتىنشى – كاسىپورىننىڭ تسيفرلىق بەيىنىنىڭ مودەلى ازىرلەنىپ جاتىر, ول ەڭبەكتى قورعاۋدىڭ بارلىق پارامەترلەرىن جەكە قورعانىس شارتتارى مەن قۇرالدارىنان كەپىلدىكتەر مەن وتەماقىلارعا دەيىن قامتيدى. ماقساتى – ەڭبەك قۇقىقتارىن قورعاۋ جانە قاۋىپسىز ەڭبەك جاعدايلارىن قامتاماسىز ەتۋ.

«جۇمىس مىنا باعىتتارعا بايلانىستى بيزنەس-پروتسەستەردى اۆتوماتتاندىرۋدى قوسا العاندا, ەڭبەكتى قورعاۋ سالاسىنداعى پروتسەستەردى تولىق تسيفرلاندىرۋمەن سۇيەمەلدەنەتىن بولادى: جۇمىس ورىندارىنداعى جاعدايلاردى باعالاۋ جانە وزەكتەندىرۋ; جەكە قورعانۋ قۇرالدارىن ۇسىنۋ; زياندى جاعدايلاردا جۇمىس ىستەگەنى ءۇشىن كەپىلدىكتەر مەن وتەماقىلاردى ىسكە اسىرۋ; كاسىپورىنداردىڭ تسيفرلىق كارتاسىندا ەڭبەكتى قورعاۋ جاي-كۇيىنىڭ ءتۇيىندى پارامەترلەرىن قامتيتىن كاسىپورىننىڭ تسيفرلىق بەيىنىن قالىپتاستىرۋ. مۇنداي جۇيە تاۋەكەلدەردى ەرتە انىقتاۋعا, الدىن الۋ جۇمىستارىن جۇرگىزۋگە جانە ەڭبەك جاعدايلارىنىڭ وزگەرۋىنە جەدەل دەن قويۋعا مۇمكىندىك بەرەدى», دەدى مينيستر.

سەگىزىنشى – مەملەكەتتىك باقىلاۋدى جەتىلدىرۋ. وعان: جۇمىس بەرۋشىنىڭ تەكسەرۋ تۋرالى مىندەتتى حابارلاماسىنىڭ كۇشىن جويۋ; مەملەكەتتىك ينسپەكتورلارعا ومىرگە قاۋىپ تونگەن كەزدە جۇمىستى توقتاتا تۇرۋ جونىندەگى وكىلەتتىكتەردى بەرۋ; جوسپاردان تىس تەكسەرۋلەر كەزىندە شەكتەۋ تەكسەرۋ پاراقتارىنان باس تارتۋ ۇسىنىلادى.

بۇل باستامالار رەسمي ءتاسىلدى جويۋعا جانە ينسپەكتسيالىق قىزمەتتىڭ تيىمدىلىگىن ارتتىرۋعا باعىتتالعان. زاڭناماعا ەنگىزىلەتىن ءتيىستى تۇزەتۋلەر كەلىسۋ ساتىسىندا.

توعىزىنشى – رەتتەۋشى كەدەرگىلەردى جويۋ. 

«كەيبىر جاعدايلاردا ەڭبەكتى قورعاۋدى قامتاماسىز ەتۋ تەتىكتەرى جەدەل دەن قويۋدى جانە شۇعىل شەشىمدەر قابىلداۋدى تالاپ ەتەدى. بۇل رەتتە, رەتتەۋشىلىك اسەردى مىندەتتى تالداۋعا جانە «اتامەكەن» ۇكپ-مەن كەلىسۋگە قاتىستى كاسىپكەرلىك كودەكستىڭ جەكەلەگەن ەرەجەلەرى جەدەل دەن قويۋ مۇمكىندىگىن شەكتەيدى. مينيسترلىك قىزمەتكەرلەردىڭ ءومىرى مەن دەنساۋلىعىنا قاۋىپ توندىرەتىن جاعدايلاردا راسىمدەردى قۇقىقتىق وڭتايلاندىرۋ بويىنشا ۇسىنىستار دايىندادى.

جوسپاردان تىس تەكسەرۋلەر كەزىندە تەكسەرۋ پاراقتارىن پايدالانۋ جەكە ماسەلە بولىپ تابىلادى. ءبىز ولاردى جوسپارلى تەكسەرۋلەردە قولدانۋ قاجەتتىلىگىمەن بولىسەمىز, بىراق قىزمەتكەرلەر مەن كاسىپوداقتاردان وتىنىشتەر تۇسكەن جاعدايدا مۇنداي تاجىريبە مەملەكەتتىك ەڭبەك ينسپەكتورلارىنىڭ ارەكەتتەرىن شەكتەيدى. ەگەر قىزمەتكەر كورسەتكەن بۇزۋشىلىق بەكىتىلگەن تەكسەرۋ پاراعىنا ەنگىزىلمەسە, ينسپەكتوردىڭ شارا قولدانۋعا قۇقىعى جوق. بارلىق جاعدايلاردى تەكسەرۋ پاراقتارىمەن قامتۋ مۇمكىن ەمەس. وسىعان بايلانىستى ءتيىستى تۇزەتۋلەر دايىندالدى», دەدى ەڭبەك مينيسترلىگىنىڭ باسشىسى.

ونىنشى – حالىقارالىق ىنتىماقتاستىقتى دامىتۋ جانە حالىقارالىق ەڭبەك ۇيىمىنىڭ (بۇدان ءارى – حەۇ) ستاندارتتارىن ەنگىزۋ. حەۇ باس ديرەكتورى جيلبەر ۋنگبونىڭ قازاقستانعا ساپارى بارىسىندا ەلىمىزدە حەۇ-نىڭ جوبالىق كەڭسەسىن اشۋ تۋرالى ۋاعدالاستىققا قول جەتكىزىلدى.

سونىمەن قاتار, ەڭبەك رەسۋرستارىن دامىتۋ ورتالىعى بازاسىندا حەۇ-نىڭ تۋرين وقۋ ورتالىعىنىڭ فيليالىن اشۋ بويىنشا بەلسەندى جۇمىس جۇرگىزىلىپ جاتىر. بۇل: شەتەلگە شىعۋدىڭ قاجەتتىلىگىنسىز ەڭبەك قاۋىپسىزدىگى جونىندەگى مامانداردى جۇيەلى جانە ساپالى دايارلاۋدى ۇيىمداستىرۋعا; وزىق حالىقارالىق تاجىريبەلەردى ەسكەرە وتىرىپ, ۇلتتىق كادرلاردىڭ بىلىكتىلىگىن ارتتىرۋعا; الەۋمەتتىك ارىپتەستەر, مەملەكەتتىك ورگاندار مەن حالىقارالىق ۇيىمدار اراسىنداعى ينستيتۋتسيونالدىق بايلانىستاردى نىعايتۋعا; ورتالىق ازياداعى ەڭبەكتى قورعاۋ سالاسىنداعى قۇزىرەتتەردىڭ وڭىرلىك ورتالىعى رەتىندەگى قازاقستاننىڭ ءرولىن كۇشەيتۋگە مۇمكىندىك بەرەدى.

سونداي-اق, «شاحتالارداعى قاۋىپسىزدىك تۋرالى» №176 كونۆەنتسيانى راتيفيكاتسيالاۋعا دايىندىق جۇمىستارى جۇرگىزىلىپ جاتىر.

ءسوز سوڭىندا سۆەتلانا جاقىپوۆا ەڭبەك مينيسترلىگى ەڭبەكتى قورعاۋدىڭ زاماناۋي, ءادىل جانە ءتيىمدى جۇيەسىن قۇرۋعا باعىتتالعان مەملەكەت باسشىسى مەن ۇكىمەتتىڭ تاپسىرمالارىن ورىنداۋدى جالعاستىراتىنىن باسا ايتتى.