قازاقستاندا يپوتەكالىق نەسيەلەر بويىنشا ەڭ جوعارى مولشەرلەمە قايتا قارالدى. ەندى ول جىلدىق 20 پايىزدان اسپاۋى ءتيىس — بۇعان دەيىن بۇل شەك 25 پايىز بولعان, دەپ حابارلايدى Egemen.kz.
ءتيىستى شەشىمدى قارجى نارىعىن رەتتەۋ جانە دامىتۋ اگەنتتىگى مەن ۇلتتىق بانك قابىلدادى.
سىياقى مولشەرلەمەسىن تومەندەتۋ تۋرالى نورما 2025 جىلدىڭ ءساۋىر جانە مامىر ايلارىندا قول قويىلعان ەكى ۆەدومستۆونىڭ بىرلەسكەن قاۋلىسىندا بەكىتىلدى. بۇل قۇجات 2024 جىلدىڭ تامىزىنان باستاپ كۇشىندە بولعان بۇرىنعى قاۋلىعا وزگەرىستەر ەنگىزەدى.
جىلدىق ءتيىمدى سىياقى مولشەرلەمەسى (جتسم) — بۇل نەسيەنىڭ بارلىق كوميسسيالار مەن تولەمدەردى ەسكەرە وتىرىپ ەسەپتەلەتىن ناقتى قۇنى. جوعارعى شەكتى مولشەرلەمەنىڭ بەلگىلەنۋى بانكتەرگە يپوتەكالىق نەسيەلەردى وسى مولشەرلەمەدەن جوعارى پايىزبەن بەرۋگە تىيىم سالادى.
ماڭىزدىسى, بۇل شەكتەۋلەر تەك جاڭا شارتتار جاسالعان كەزدە عانا ەمەس, بۇعان دەيىن بەرىلگەن نەسيەلەر بويىنشا مولشەرلەمەلەر وزگەرگەندە نەمەسە جاڭا كوميسسيالار ەنگىزىلگەندە دە قولدانىلادى.
ادىلەت مينيسترلىگىندە تىركەۋدەن وتكەن سوڭ قۇجات «ادىلەت» بازاسىنا ەنگىزىلەدى. الايدا ونى قازىردىڭ وزىندە قارجى نارىعىن رەتتەۋ جانە دامىتۋ اگەنتتىگىنىڭ رەسمي سايتىنان كورۋگە بولادى.
بۇعان دەيىن ۇلتتىق بانك وكىلدەرى يپوتەكانىڭ 10, 15, 20 جىلعا 11-12 پايىزبەن بەرىلۋىنىڭ ءوزى قازاقستاندىقتار ءۇشىن اۋىر جۇك ەكەنىن ايتقان بولاتىن.