عىلىم جانە جوعارعى ءبىلىم مينيسترلىگى 16 مامىردان نەگىزگى ۇبت باستالعالى 164 مىڭنان استام تەستىلەۋ وتكىزىلگەنىن مالىمدەپ, ءۇش اپتالىق ارالىق قورىتىندىنى شىعاردى, دەپ جازادى Egemen.kz.
تالاپكەرلەردىڭ 74%-ى تەستىلەۋدى قازاق تىلىندە, 26%-ى ورىس تىلىندە جانە 136 ادام اعىلشىن تىلىندە تاپسىرعان.
ءۇشىنشى اپتانىڭ قورىتىندىسى بويىنشا تالاپكەرلەردىڭ 69%-ى شەكتى بالل جيناعان. بەس ءپان بويىنشا ورتاشا بالل 65-ءتى قۇرادى. ەڭ جوعارى 140 باللدى تۇركىستان وبلىسىنىڭ تۇلەگى ءابىلحان جانىبەك ءبىرىنشى اپتادا تىركەگەن.
قازىرگى تاڭدا تەستكە قاتىسۋشىلاردىڭ باسىم بولىگى, اتاپ ايتقاندا, 18%-ى «ماتەماتيكا-فيزيكا», 15%-ى «بيولوگيا-حيميا» پاندەر كومبيناتسياسىن تاپسىردى. 14%-ى «شىعارماشىلىق ەمتيحان» كومبيناتسياسىن تاڭداعان.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن دە قولايلى جاعداي جاساۋدىڭ ارقاسىندا ۇبت-عا 477 تالاپكەر قاتىسقان.
تالاپكەرلەر تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الادى. تەحنيكالىق سەبەپتەر بويىنشا اپەللياتسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياتسيا قاراستىرىلعاننان كەيىن جەكە كابينەتتە قولجەتىمدى بولادى.
ۇبت ءوتىپ جاتقان ءۇش اپتادا 206 ەرەجە بۇزۋشىلىق انىقتالعان. 98 تالاپكەر سمارتفونداردى, شپارگالكالاردى جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلگەن. تاعى 108 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلىپ, ناتيجەلەرى جويىلعان. وزگە ادامداردىڭ ورنىنا كىرۋ فاكتىلەرى انىقتالعان جوق.
2025 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
نەگىزگى ۇبت 7-شىلدەدە اياقتالادى.