بۇگىن الماتىدا قازاقستان مەن قىتاي اراسىنداعى تۋريزم سالاسىنداعى ىنتىماقتاستىق تۋرالى مەموراندۋمعا قول قويىلدى. «قازاقستان – قىتاي» تۋريزم جىلى اياسىندا جاسالعان بۇل مەموراندۋم قىتاي حالىق رەسپۋبليكاسىنان تۋريستەردى تارتۋعا باعىتتالعان جاڭا ستراتەگيالىق مۇمكىندىكتەرگە جول اشادى. بۇل تۋرالى قالالىق تۋريزم باسقارماسىنان حابارلادى, دەپ جازادى Egemen.kz.
الماتى قالاسىنىڭ تۋريزم باسقارماسى مەن شاندۋن پروۆينتسياسىنىڭ تۋريستىك ۇيىمدارى اراسىندا قول قويىلعان كەلىسىمدەر بىرلەسكەن تۋريستىك ونىمدەردى دامىتۋعا, قىتايدان كەلەتىن تۋريستەر اعىنىن ارتتىرۋعا جانە قالانىڭ ينفراقۇرىلىمىن كەڭەيتۋگە باعىتتالعان. بۇل قادامدار الماتىنىڭ حالىقارالىق تۋريستىك ورتالىق رەتىندەگى ورنىن نىعايتىپ, ەكى ەل اراسىنداعى مادەني جانە ىسكەرلىك بايلانىستاردى دامىتۋعا ىقپال ەتەدى.
2024 جىلى الماتى قالاسىنا قىتايدان 99 مىڭنان استام تۋريست كەلگەن, بۇرناعى جىلمەن سالىستىرعاندا 50%-عا ارتىق. مەموراندۋم قىتايدان كەلەتىن ءتۋريزمدى دامىتۋداعى ماڭىزدى كەزەڭ ءارى قوناقجايلىلىق پەن تۋريزم سالاسىنداعى ۇزاق مەرزىمدى, ءوزارا ءتيىمدى ىنتىماقتاستىقتىڭ جاڭا مۇمكىندىكتەرىن اشادى.